Génesis 13:1-18
13 Ari isoquijantanajari Abrama Egiptoqui, yaanajiro ijina jeri itomitsori Lot aisati maaroni timimoyetiriri ipayetavaqueriri pincatsari. Ipianaja quipatsiqui NÉgueb, isavicapaaji.
2 Yora Abrama ashitaarantincari ini. Itimimotanaqueri oshequi quireequi, oro aisati oshequi ivirapee.
3 Impoiji ipiajeitanaja, intsiquero icantajeitanaja irosati yareetantajaro nampitsijaniqui Betel. Impoiji yovaanaja isavicajeitapaaquenta peerani iroaquera ipocantaca, imontetapaajaro Betel jero Ai.
4 Aitaque peerani yovetsicapaaquerori altar yaventajari Tasorentsi, iquenquetsatacaajiri aisati.
5 Aisati Lot ashitaarantincari ini iriori. Iquempetari iriritsori, itimimotanaqueri oshequi irovishate aisati ivacate jeri saviquimojeitiriri.
6 Anta isavicajeivetapaajanta, te ontimasanoteji paashito iroajeiteari ivirapee. Irotaque caari isavicajeitantaja cameetsa.
7 Aisati yora inampirepee Abrama amenajeitinitiriri ivirapee jeri inampirepee iriori Lot amenajeitiniriri ivirapee iriori, yantavacaajeitaca. Aisati opomerentsitimotacari; tempa aitaque isavicajeitiri iriori ishanincapeeni Canaán jeri ferezeopee.
8 Irotaque icantantacariri Abrama Lot: “Tempa ashanincatavacaajeitaca arori. Te oncameetsateji irantavacaajeitea shentajeitiriri maaroni avirapee.
9 Pamene, antearoite oni oca quipatsi. Ocameetsati pincoyeanontea avirori pinijantareanaque jaocarica pinintiri pisaviqueri. Picoirica pisavique quirinca, ari ocameetsati, naroquea savicatsine catonco. Irompa picoirica pisavique catonco, ocameetsati aisati, naroquea savicatsine quirinca.” Irotaque icantaqueriri.
10 Ari yamenacoyetaquero Lot maaroni quipatsi, ineaquero antearoite oirincaiteacota nija Jordán. Oshequi ocameetsaiteaque irosati jatanaintsi nampitsijaniqui pajitachari Sóar. Aisati oshequi nijatenipee jero paashitomashi. Oquempetacaro peerani ivanquiremashini Tasorentsi ora EdÉn aisati oquempetacaro iipatsite egiptosati. (Aitaque ocantaniri tequerani intayeroni Tasorentsi nampitsi ora Sodoma aisati Gomorra.)
11 Irosati icantantacari: “Jero onta nosaviqueri quirinca oirincaiteapainta.” Irosati ijatantanaca quirinca, iquenapainta catsirincaiteri, inijantareanaqueri iriritsori. Yaajeitanajiri inampirepee aisati ivirapee.
12 Isavicajeitapaaque otsapiqui nampitsi pajitachari Sodoma, isavicajeitinta atiripee caari cameetsajeitatsi. Te irisavicajeite cameetsa, oshequi catsini yantimojeitaqueri Tasorentsi caari cameetsatatsi. Irintiquea Abrama savicajeitanajantsi quipatsiqui Canaán.
13 -
14 Ari ijatantacari Lot, impoiji iquemajiri aisati Abrama Tasorentsi icantajiri: “Pamenasanotero oca quipatsi: quirinca, catonco, acaqueroca, intatiquero, maaroni.
15 Irotaque nompashitaquempiri pisavicanteari aisati irotaque irisavicanteari iriori pishanincajeitajeari coajicani.
16 Noshequiacaasanojeitajeri catsini iriori. Oquempeta ovane impanequi, te pimatero piojeitero jaocarica ocaratiri, aisati inquempejeitea iriori, oshequi catsini irinajeite.
17 Meeca pijate pamenayetaitero quipatsi, piotantearori jaoca ocantaiteyetari; tempa antearoite oni nopaquempiri.”
18 Irosati yovantanaja Abrama otimayetinta inchatopee encina irashi shirampari pajitachari MamrÉ. Irotaque quempejitarori nampitsi pajitachari Hebrón. Aitaque isavicapaajiri aisati yovetsicapaajiro altar ipincatsatajiri Tasorentsi.
