Génesis 14:1-24
14 Ari itimi 4 pincatsariyetatsiniri, jero oca ivajiropeeni:
Amrafel, irio pincatsariventiriniri savicajeitatsiniri Sinar.
Arioc, irio pincatsariventiriniri savicajeitatsiniri Elasar.
Quedorlaómer irio pincatsariventiriniri savicajeitatsiniri Elam.
Irio Tidal pincatsariventiriniri savicajeitatsiniri Goim.
2 Yora pincatsaripeeni imanajeitaqueri pincatsariyetatsiniri pashinipeequi nampitsi, caratatsiri 5. Jero oca ivajiropee iriori:
Bera irio pincatsariventironiri nampitsi Sodoma.
Birsá irio pincatsariventironiri nampitsi Gomorra.
Sinab irio pincatsariventironiri nampitsi Admá.
SemÉber irio pincatsariventironiri nampitsi Seboím.
Jeri iriori pincatsariventironiri nampitsijaniqui Bela, opajita aisati Sóar.
3 Yora caratatsiri 5 yapatojeitaqueri oshequi manajeitachari anta oirincaiteacotapai Sidim, otiminta Incajare Catiojari.
4 Yora Quedorlaómer ipincatsariventajeitirini caratatsiri 5 pincatsariyetatsiniri ocarataque 12 osarentsi. Iro caratapaintsiri 13 osarentsi, te incoajeitaje impincatsajeitajeri, irointi icoanaque irimanajeiteri.
5 Ari osarentsitapaaji aisati caratapaintsiri 14, yora Quedorlaómer jeri ivincatsaririntepee acacojeitiriri, intanacaro ijajeitanaque.Imanajeitapaaqueri refaítapee savicajeitatsiri Astarot-carnaim,jeri zuzitapee savicajeitatsiri nampitsiqui Ham,jeri emitapee savicajeitatsiri SavÉ-quiriataim,jeri aisati horeopee savicajeitatsiri toncaaripeequi Seír.
Yanaacojeitaqueri maaroni aisati yoijanajeitanaqueri irosati opampaiteapainta pajitachari El-parán, overaapaacanta caaraiteri.
6 -
7 Ipiantajarori Quedorlaómer jeri maaroni icarajeitaitiri, ishoncajeitanaja irosati yareetantacaro quipatsiqui pajitachari En-mispat. (Opajita aisati CadÉs.) Itsoncapaaqueri yoajeitapaaqueri maaroni amalecitapee. Aisati iquempetapaaqueri iriori amorreopee savicajeivetachaniri Hasesón-tamar.
8 Impoiji iriori pincatsariyetatsiniri Gomorra, Admá, Seboím jero Bela ijajeitanaque oirincaiteacotapai Sidim imanajeitavaqueri pincatsaripee carajeitatsiri 4. Iro cantaincha te irimajeiteriji iranaacojeitavaqueri.
9 -
10 Anta oirincaiteacotapai Sidim otimi oshequi omoropee, otimantari nija tsirejatatsiri quempevetariri tsineri. Ishiajeivetanaca pincatsariyetatsirini sodomasati jeri gomorrasati aisati manajeivetacharini carajeitiriri, ipariajeitaque omoropeequi. Irintiquea pashinipee shiajeitanainchari anta toncaaripeequi.
11 Yora anaacojeitantatsiri iquenajeitanaquero Sodómaqui aisati Gomorraqui yaajeitanaqueri maaroni atiripee, aisati irovaararopeeni pinatasanoyetachari jero iroanaropeeni.
12 Icarajeitanaqueri Lot, itomitsori Abrama, yaajeitanaqueri jero maaroni timimojeitiriri. Irosati ipiajeitantavetanaja irijajeitantajeameri iipatsitepeequi.
13 Ari itimi aparo shirampari shianainchari, caari yoyeeti, icamantapaaqueri Abrama, yora hebreotatsiri, saviquimotirori inchatomashipee encina irashi MamrÉ, yora amorreo. Yora MamrÉ iriotaque irirenti Escol jeri Aner, iriotaque icarajeitiri Abrama.
Yoipacaacoventavajiri Abrama itomitsori
14 Iquemacotantavacariri Abrama itomitsori yayeetanaqueri, irosati yapatojeitantacari inampirepee ishirejeitari timayetaintsiri ivancoqui, icarajeitaque 318. Ijajeitanaque yoijajeitanaqueri aajeivetanacariri itomitsori. Irosati ineajeitantapaacari nampitsijaniqui pajitachari Dan.
15 Ari tsiteniriqui imapocajeitaqueri, imanajeitapaaqueri yanaacojeitaqueri. Ishiajeivetanaca itsipapee. Yoijanajeitanaqueri irosati nampitsi pajitachari Hobá, yavisanaquero nampitsi pajitachari Damasco.
16 Aitaque yaapitsajeitavajiriri maaroni yaajeivetanacari. Aitaque ocantacari yoipacaacoventavajiri Abrama itomitsori jero maaroni timimojeitiriri iriori. Aisati oshequi shiramparipee jero tsinanepee yoipacaacoventajeitavajiri.
Yora Melquisedec icantacoventiri Abrama Tasorentsiqui intasoncaventeri
17 Ipiajeitantajari Abrama aisati maaroni icarajeitiri, yora pincatsaritatsiri Sodómaqui ijatanaque oirincaiteacotapai pajitachari SavÉ itonquiotavajari Abrama. (Opajita aisati Yoirincaiteacota Pincatsari.)
18 Aisati iriori Melquisedec pincatsaritatsiri anta nampitsiqui Salem ijatanaque intonquiotavajeari. Iriotaque cantacoventapinitiriri ishanincapee Tasorentsiqui yora Inquitequiniri. Ineantavajariri, irosati ipajeitantavacari tanta yoajeitapaacari aisati ovaja irajeitapaaqueri. Ari icantacoventaqueri, icantiri:“Abrama, nocoaque intasoncacoventempi Tasorentsi Inquitequiniri,yora vetsiquirori inquite aisati quipatsi,cameetsa irisavicacayempi.
19 -
20 Icameetsatasanotaque Tasorentsi Inquitequiniri;tempa iriotaque amitacotaquempiripanaacojeitantacariri quisajeitimpiri.”
Impoiji ipaarantaqueri Abrama Melquisedec virantsipee aisati ovaararontsipee yaapitsajeitavajiriri quisajeitiriri. Otimirica 10, ipaqueri aparoni. (Icanteetiro oca diezmo.)
21 Impoiji yora pincatsaritatsiri Sodómaqui icantiri Abrama:
—Pishinejeitajenari natiritepee, naajeitanajerita nonampiqui. Irointiquea paajeitanaque ovaararontsi.
22 Ari icantanaqueri Abrama:
—Chapinqui nocantasanotaqueri Tasorentsi Inquitequiniri, yora vetsiquirori inquite aisati quipatsi: ‘Eiro naitiritsi catsini yashijeitari sodomasati.’ Te noncoyeji pincante coajicani: ‘Nashitaarantacaacari Abrama.’
23 -
24 Moncarataca oni naarantitaquempiri pivirapee yoajeitacari natiritepee, te navaqueji narori. Irintiquea pimpaarantajeite Aner, Escol jeri MamrÉ; tempa iriotaque amitacojeitaquenari noipacaacoventantavajariri patiritepee.
