Génesis 18:1-33
18 Irosatiquera isaviqui Abrahama inampiqui MamrÉ, irosati ipocashitantacari Tasorentsi iquempetapaacari atiri. Ari itampaticatapaaque catsirincaiteri isavicaiti iqueapinitiro ivancojaniquiqui ora yovetsiqueetiri iviti virantsipee.
2 Yamenantanacari, ineatiiri mava shirampari icatiimojeitapaacari. Intsipaite ijatashitanaqueri yoivotashitapaacari irosati quipatsiqui, yovetsatapaacari.
3 Icantapaaqueri:
—Aviro, noshaninca, eirotsita pavishitatsi.
4 Namacantavaquempita nija pinquivantajeitapemparori piitipee, impoijiquea pimaoreajeitanaque otsimancaiteaquera inchato.
5 Poanaqueata nompavaquempiri pishintsijeitantanajeari paniijeitanaje.
Ari yacajeitanaqueri:
—Jee, cameetsataque.
6 Ari iqueanaque Abrahama ivancojaniquiqui. Icantiro ijina:
—Pishintsite, paye 20 kilo cameetsapaneri harina, pivetsique tanta iroapempari.
7 Aisati intsipaite ijatanaque iquempoyeirinta ivirapee, icoyeaqueri vacajaniqui cameetsatasanotatsiri. Ipavaqueri inampire, intsipaite yovetsicaqueneri iroajeiteari.
8 Ari yaanaqueneri iroajeiteari yovetsicaqueneriri. Ipaqueri aisati quisopatsatatsiri jeri itsomija. Ari yoajeitaca ara otsitiqui inchato. Ainiroquera yoajeitaca, yora Abrahama yoyeaqueri imperi aisati.
9 Ari itsoncanaquero yoajeitaca, irosati isampitantacari aparoni icarataqueri:
—¿Jaocame iroori pijina?
Yacanaqueri iriori:
—Ainiro tsompoina novancoquira.
10 Ari icanti aisati:
—Pashiniqui osarentsi nompiajanterica, noneajantempi timanaque pijina pitomi.
Ainiro iroori Sara osavicaque ara tsompoina, oquemisantaquero maaroni iquenquetsatacairiri Abrahama.
11 Yora Abrahama aisati ijina imoncaratavacaajeitaca yanteashipatasanojeitaque, te oneaventanajeaji iroori.
12 Oquemavaquero icantaqueri, irosati oshirontashireantanaca. Oquenqueshireanaca: “¡Jaoca noncanteari noneavintsatavacaajea, anteashipatanaque nojime aisati narori!”
13 Iro cantaincha icantanaqueri Tasorentsi Abrahama:
—¡Paita oshirontashireantari pijina! ¡Ojitaquempa iroori oneaca anteashipataque, eiro itimajitsi otomi!
14 ¿Opomerentsitimotanampa? ¡Tempa narotaque Tasorentsi nomatacayero ontimanteari! Pashiniqui osarentsi nompiajanterica, noneajantempi timanaque pijina pitomi.
15 Oquemantacarori Sara oca icantaqueri, otsaroanaque. Ocoavetanaca omanacoteame. Ocantanaque:
—Te noshirontempaji.
Icantanaquero iriori:
—Queario, niotaquempi, pishirontashireaca.
Irotaque icantaquerori.
Icantacoventiri Abrahama Tasorentsiqui savicajeitatsiri Sodómaqui
16 Ari icatiajeitanaja quivantiriri, irijatanteari anta nampitsiqui Sodoma. Ari yoijatavajiri Abrahama anta avotsiqui irivetsatantavajeariri.
17 Ari iquenqueshiretaca Tasorentsi: “Noncamanterita Abrahama oca nanteri; tempa iriotaque intacantearine shequiajeitanajantsineri coajicani. Tempa nocantitacari: ‘Nontasoncacoventempi,’ irosati nontasoncacoventanteariri maaroni atiripee quipatsiquiniri.
18 -
19 Aisati iriotaque nocoyeaqueri, nocoacaaqueri itomipee iriori aisati maaroni irishanincajeitajeari coajicani, inquemisantajeitero maaroni nocantaqueriri aisati irantajeitero cameetsayetatsiri. Nomatasanotanteanariri maaroni nocantaqueriri.”
20 Irosati icamantantacari, icantiri:
—Yora atiripee savicajeitatsiri Sodómaqui aisati Gomorraqui te oncameetsateji irisavicajeite. Oshequi catsini yantajeitaquero caari cameetsatatsi.
21 Meeca nojate anta namenasanoteri, niotasanotanteari queariorica yantasanojeitaquero catsini caari cameetsatatsi.
22 Yora apitetatsiri ijajeitanaque anta Sodómaqui. Irintiquea Tasorentsi ainiroquera itsipatacari Abrahama, iquenquetsatacairi.
23 Ari iquempejitapaacari, isampitiri:
—¿Ariompa pintsoncaqueri yora cameetsatatsiri saviquimotiriri antajeitirori caari cameetsatatsi?
24 Ariorica intime 50 cameetsatatsiri anta nampitsiqui, ¿ariompa pintsoncajeitaqueri? ¿Eirompa pipeacotanaritsi caari cameetsatatsi yantajeitiri?
25 ¡Eirovee pitsoncajeitiritsi! Itimirica cameetsayetatsiri, eiro piquempetacantiritsi irio antaquerori caari cameetsatatsi. Tempa aviro cantacoventajeitiriri maaroni atiri, cameetsa picantacoventanti.
26 Yacanaqueri Tasorentsi iriori:
—Ariorica itimi 50 cameetsatatsiri anta nampitsiqui Sodoma, aitaque nompeacotaqueneri caari cameetsatatsi yantajeitiri savicajeitatsiri, eiro notsoncajeitiritsi maaroni.
27 Icantiri aisati Abrahama:
—Tempa aviro Notasorentsite, oshequi nopincatsatimpi. Naro atiri, pimpeacotenaro noncantapinitempi, eiro pishemanatsi.
28 Irompa incaraterica 45 cameetsatatsiri, ¿ariompa pintsoncajeitaqueri savicajeitatsiri nampitsiqui?
Yacanajiri iriori:
—Ariorica incarate 45, eiro notsoncajeitiritsi.
29 Isampitajiri aisati:
—¿Ariompa pintsoncajeitaqueri incarataquerica 40 cameetsatatsiri?
Yacanajiri iriori:
—Incarataquerica 40, eiro notsoncajeitiritsi.
30 Yovaajiniri aisati, icantasanotiri:
—Eiroyea piquisanatsi, nampiitapinitaquempirorica nosampitempi. Jaaquea incarataquerica 30, ¿ariompa pintsoncajeitaqueri?
Yacanajiri iriori:
—Incarataquerica 30 nompeacojeiteanari maaroni, eiro notsonquirotsi nampitsi.
31 Yovaajiniri icantiri:
—Novincatsarite, oshequi nopincatsataquempi. Nosampitajempi aisati: ¿jaoca incantajeiteari incarataquerica 20 cameetsatatsiri?
Yacanajiri iriori:
—Incarataquerica 20, eiro notsoncajeitirotsi nampitsi.
32 Aiquero icantasanotiri:
—Novincatsarite eiro pishemanatsi, aparo noncantavajempi, eiro nashereajimpitsi aisati. ¿Jaoca pincanteriri ariorica incarate 10 cameetsatatsiri?
Yacanajiri iriori:
—Incaraterica 10, eiro notsoncajeitirotsi nampitsi.
33 Itsoncantanacarori Tasorentsi iquenquetsatacairi Abrahama, irosati ijatantanaja. Impoiji ipianaja Abrahama ivancojaniquiqui iriori.
