Génesis 19:1-38
19 Ari otsitenijencaiteanaji, yareejeitapaacaro apitetatsiri inampire Tasorentsi nampitsi Sodoma. Yora Lot isavicaiti iqueantapinijejitari nampitsi. (Aitaque yapatotapinijeitari savicayetatsiri.) Ineantavacariri ipocajeitaque, intsipaite ijatashitavaqueri yoivotashitapaacari irosati quipatsiqui, yovetsatapaacari.
2 Icantapaaqueri:
—Avirojei, noshaninca, nocoi poijatanaquena novancoqui, pinquivajeitapeerota piitipee, pimaajeitanaqueta. Osaitequera povaajeitanajea.
Icantajeitanaqueri:
—Eiro nojajeititsi, aitaque nomaashijeitavaqueata aca.
3 Aiquero icantatiiri Lot, irosati onimojeitantanacari yoijajeitanaqueri ivancoqui. Yareetacantacariri, yovetsicacantapaaqueneri oanarontsi cameetsari. Yovetsicaqueneri tanta caari conoacha tapiacaarori yoajeitapaacari.
4 Ari itsoncaque yoajeitaca, tequeratsita irimaajeiteji, irosati ipocajeitantapaaca savicajeitatsiri nampitsiqui, evancaripee irosati anteashiparipee iriori. Ishoncajeitapaacaro ivanco Lot.
5 Icajemacojeitapaaqueri. Icantajeitiri:
—¡Jaoca iriori shiramparipee areetapainchari pivancoqui! ¡Poimisoquijajeitenari, nocoajeitaque noonaajeiteri!
6 Irosati isoquijashitantanacari Lot, yashitasanotanaquero irashitacoro.
7 Icantajeitiri:
—Pimajerejeite noshaninca, eiro pantacaajeitiritsi catsini quivantanari caari cameetsatatsi.
8 Irointiquea noimisoquijempi noshintopee caratatsiri apite, tequera oneayeteriji shiramparipee. Iroquea pantacaajeite paitarica picoacaajeitari. Irompa irinti yocapee, eiro catsini pantacaayetiritsi caari cameetsatatsi; tempa iriojeitaque quivantanari.
9 Ari icantajeitanaqueri iriori:
—¡Pishirincanaqueta! ¡Aviro pashinisati, paita picoantari pintiancajeitena! ¡Paamaventea meeca, noatsinaasanoticari avinti!
Irosati yoatsinantajeitacari Lot, itatsincaqueri irashitacoroqui iroariantajeiteariri quipatsiqui.
10 Iro cantaincha yora quivantiriri yashitareaquero ashitacorontsi, yacotashitavajiri yoiminqueajiri tsompoina. Impoiji yashitasanotajiro ashitacorontsi.
11 Irosati iquitapoajatacantacari, ipamipamiyevetanacaro irashitacoro Lot. Te irineajeroji, irosati ishemajeitantanaja, ijajeitanaji.
Yora inampirepee Tasorentsi yoavisaacotajiri Lot
12 Irosati icantantajeitacari quivantajeitiriri Lot:
—¿Timatsimpa pishanincapee aca picarajeitiri? ¿Timatsirica pitomipee, pishintopee, pitineripee? Ocameetsati paajeitanaqueri iriori aisati maaroni timimojeitimpiri. Pijajeite anta areejiqui.
13 Pineaquero, te incameetsajeiteji savicajeitatsiri aca, oshequi yantajeitaquero catsini caari cameetsatatsi. Moncarataca meeca ishemanacari Tasorentsi, meeca itiancajeitaquena nontsoncajeitero nampitsica.
14 Ari ijatashivetacari Lot intinerintajeiteameri coavetachari irayerome irishintopee. Icantavetapaacari:
—¡Pintinaanaque intsipaite! ¡Tsamatiye ashiajeitanaque areejiqui, coraquetaque intsonquero Tasorentsi oca nampitsi!
Iro cantaincha itseencajeitavaqueri, ijivetaca icantashitari; te irijajeiteji.
15 Ari irotimatajantsi onquitaiteaje. Icantajeitiri inampirepee Tasorentsi Lot:
—¡Teerica pincoyeji pincame aca nampitsiqui, pishintsitanaque pishiajeitanaque anta areejiqui! ¡Paanaquero pijina jero pishintopee!
16 Iro cantaincha yora Lot te irishintsiteji irijajeititempa intsipaite. Irosati yacatsajeitantanacari irinti inampirepee Tasorentsi, yoimisoquijajeitaqueri iroavisaacojeitanteariri. Tempa yora Tasorentsi icavintsaaqueri, te incoacayeriji intayea nampitsiqui. Aisati yaanaquero ijina jero irishintopee yoimisoquijajeitaquero iroavisaacojeitanteariri.
17 Isoquijajeitantanacari, icantiri aisati aparoni inampire Tasorentsi:
—¡Pishiajeitanaque anta, eiro picamajeitantatsi, pavisacojeitantajeari! Eiro pamenapaintitsi pitapiiqui, aisati eiro picatiajeitapaatsi oteniitetinta. ¡Pishintsijeitanaque, pijajeite toncaariqui pavisacojeitantajeari!
18 Iro cantaincha icantanaqueri iriori:
—Eirovee, noshanincapee.
19 Cameetsataque pineshinoncajeitaquena pintacotaquena, poavisaacojeitaquena. Iro cantaincha eiro nomatirotsi nareetearo toncaarinta. Ari omapocaquenarica covencatatsiri intianqueri Tasorentsi, noncamitaquea nianqui.
20 Aintiquea nocoaque pishinetena nojate anta nampitsijaniqui quempejiniri. Aitaque noshianaqueri anta navisacojeitantajeari.
21 Icantanaqueri aparoni apitetatsiri inampire Tasorentsi:
—Jee, noquemaquero picantajeitaquenari, eiro notsonquirotsi onta nampitsijaniqui.
22 Meeca pijatitanaquempa intsipaite. Eirotsita notsonquitarotsi nampitsi, pareetavaqueatsita anta.
Orijaniqui oni nampitsi, irotaque ipajitanteetarori Sóar.
Itaaquero Tasorentsi nampitsipee Sodoma jero Gomorra aisati opeaca ijina Lot tivi
23 Yareetantacarori Lot jero irishintopee nampitsijaniqui, quitaiteanaji oni.
24 Irosati yovariantacaro Tasorentsi antearoite paamari aisati icanteetiri azufre, oquempevetapaacaro incani. Otaapaaquero nampitsipee Sodoma jero Gomorra.
25 Otsoncapaaquero maaroni apiiteroqueti aisati otsoncajeitapaaqueri maaroni atiripee savicajeitatsiniri jero maaroni panquirentsipeeni shiocayetatsiniri oteniitetinta.
26 Ainiroquera ishiajeita, ora ijina Lot amenapainti otapiiqui, irosati opeantanaca tivi. Irintiquea ojime jero apiiteroqueti irishinto avisacojeitajantsi.
27 Ari oquitaiteamanaji aisati, ijatamanaque Abrahama iquenquetsatacaaquerinta oshaiteniji Tasorentsi.
28 Yareetantapaacari, yamenacotapaaquero oteniitetinta otimaveitaninta nampitsipee. Ineantacarori tsoncanaca oni, otaanaca maaroni aisati antearoite ocachaajencatanaque jenoqui.
29 Aitaque ocantacari peeroni itsoncantacarori itaaquero Tasorentsi nampitsipee Sodoma aisati Gomorra. Aitaque peerani isavicaveitaniri Lot. Iro cantaincha yora Tasorentsi iquenqueshiretaquero icantaqueriri Abrahama, icavintsaaqueri; irotaque yoavisaacotantacariri itomitsori, caari otaantari paamari.
Jero icantacotari itimantanacari moabitapee jeri amonitapee
30 Impoiji yora Lot te incoyeji irisavique nampitsiqui Sóar, itsaroacaajeitacari savicajeitatsiri. Irotaque ijatantacari anta toncaariqui, yaanaquero apitetatsiri irishinto isavicapaaque anta otimapai omoro imperita.
31 Aparo quitaiteri oquenqueshireaca irishinto jivatatsiri otimi, ocantiro irento:
—Yora apa anteashipatapaaque ini. Aisati te aneeriji shiramparipee asavicajeitaqueca, tecatsi ayeri ajimenteari.
32 Meeca tsame ashinquiterita, irimaacojeitanteeri intimantanajeari itomipee jeri irishanincajeitajeari iriori coajicani.
33 Ari otsitenitanaque opaconataqueri iri ovaja shintsijatatsiri, ari ishinquitanaca. Te irineacotanajeaji, irosati omaacotantacari. Te iriotacotempaji itinantanajari oonaaqueri irishinto.
34 Ari oquitaitetamanaji ocantiro irento impoitatsiri otimi:
—Noonaaqueriyea tsiteniriqui apa. Meeca tsame ashinquitajeri aisati poonanteariri avirori. Antimanteanariri apite itomi irishanincatajeari coajicani.
35 Ari otsitenitanaji opaconatajiri, ishinquitanaja aisati. Irosati oonantacari iroori. Aisati iquempetaja, te iriotacotempaji itinantanajari oonaaqueri irishinto.
36 Irosati itsomontetacantacaro apiiteroqueti irishinto.
37 Ora jivatatsiri otimi itimanaque otomi, opajitaqueri Moab. Iriotaque intacantanacariri moabitapee.
38 Aisati iroori otsipa itimanaque otomi, opajitaqueri Benamí. Iriotaque intacantanacariri amonitapee.
