Génesis 23:1-20
23 Ari ocaratapaaque 127 osarentsite Sara, irosati ocamantaca anta nampitsiqui Hebrón. (Opajita aisati Quiriat-arbá, ora quipatsiquiniri Canaán).
2 Oshequi yoashiretacotanacaro Abrahama aisati iraacotaquero osamani.
3 Ari yojocanaquero ocamaquenta ijinani, ijatashitaqueri hititapee. Icantapaaqueri:
4 —Naro poneachari areejiqui, pashinisati noni. Iro cantaincha meeca nocoaque pimpena capichaji piipatsite nontijantearori nojinani; ari nompinataquempi.
5 Ari yacajeitanaqueri, icantiri:
6 —Pinquemena ashaninca, tecatsi noncantajeite narori; tempa avirotaque icoyeane Tasorentsi saviquimotaquenari aca. Timatsi noipatsitequica oshequi omoropee, ocameetsati pincoyeanontea cameetsatasanotatsiri poantearori pijinani.
7 Iquemantacarori Abrahama icantajeitaqueriri, ari icatianaca yoivotashitanacari ipincatsajeitaqueri.
8 Icantasanotiri:
—Queariorica picoacaasanojeitaquena nontijero nojinani aca, nocoaque meeca pincanteri yora Efrón, itomini Sóhar, impenarota iipatsite otsapitapaacanta, impacotenarota omoro imperita pajitachari Macpelá. Ari nompinataqueri maaroni ovinaro, irotaque nashitasanotantearori noantapiniteariri noshanincapee camayetatsineri.
9 -
10 Ainiro iriori Efrón icarajeitaqueri maaroni ishanincapee, iquemaquero icantaqueri Abrahama. Yora Efrón icoaque inquemajeitavaquero ishanincapee ora incanteriri Abrahama aisati maaroni queayetapaintsiri nampitsiqui.
11 Ari icantiri:
—¡Eiro, ashaninca, pipinatanatsi! Ari nompashitaquempiro quipatsi, nompacotaquempiro omoro poantearori pijinani. Jeri yoca noshanincapee, quemajeitaquerori nocantaquempiri, nompashitempiro quipatsi.
12 Iro cantaincha yoivotashitanajari Abrahama savicajeitatsiri nampitsiqui, ipincatsajeitajiri aisati.
13 Icantajiri:
—¡Pinquemena noncantempi! Nocoaque inquemajeitena pishanincapee; ari nompinataquempiro piipatsite quireequi, impoijiquea nontijero nojinani.
14 Ari icantanajiri iriori Efrón:
15 —Pinquemena ashaninca, picoaquerica pimpinatena, ocarati opinata 400 imentaqui quireequi. Iro cantaincha eiro amatirotsi ancantimentavacayearo ovinaro, ocameetsati pintijero pijinani.
16 Ari onimotaqueri Abrahama oca icantaqueriri, irosati ipinatantacari; ineacojeitaqueri maaroni ishanincapee.
17 Aitaque ocantacari yamanantaquero iipatsite Efrón timatsiri Macpelá, oquempejitaro iipatsite iriori MamrÉ intatiqueroniri iquenapainta catsirincaiteri. Yamanantacotaquero omoro imperita aisati maaroni inchatopee timayetatsiri.
18 Meeca yaajiro Abrahama quipatsi, yashitajaro maaroni. Iquemajeitaqueri maaroni hititapee aisati iriori queayetapaintsiri nampitsiqui.
19 Impoiji itijaquero Abrahama ijinani Macpelaqui, timatsiri iipatsitequi iriori MamrÉ, intatiqueroniri iquenapainta catsirincaiteri; opajita aisati Hebrón.
20 Aitaque ocantacari yashitajaro quipatsi otiminta omoro, ipaqueriri hititapee iroanteariri camayetatsineri.
