Génesis 24:1-67
24 Ari anteashipatasanotanaque ini Abrahama, oshequi itasoncaventasanotiri Tasorentsi paitapeerica yantayetiri.
2 Aparo quitaiteri icajemaqueri yora inampire jivatacantirori yamenacantiro maaroni yashiyetari; anteashipataque ini. Icantiri:
—Nocoaque meeca poyero paco nochaovoriqui, pincantasanotena Tasorentsiqui, yora vetsiquirori inquite aisati quipatsi, ¡eiro pishinetiritsi notomi irayero tsinane savicatsiri aca quipatsiqui Canaán!
3 -
4 Irointi nocoacaaquempi pijate anta nonampiniqui noponeanacanta peerani, ainiro anta noshanincasanoripee narori. Aitaque pamenaiteneriri aparoni tsinane irijinanteari.
5 Ari yacanaqueri inampire icantiri:
—Jaaquea eirorica ocoitsi tsinane oijatena, ¿jaoca noncanteari? ¿Ariompa nompianaque aisati naanaqueri pitomi iriori?
6 Icantanajiri:
—¡Eiro pairitsi, te noncoacayeriji irijate anta!
7 Peerani nosavicaveitani nonampiniqui, yamaquena aca Tasorentsi yora Inquitesati. Icashiacaaquenaro oca quipatsi irisavicajeitanteari noshanincajeitajeari coajicani. Intianquempiri Inampire irijivatanaquempi, pamantaqueanariri notomi irijinanteari.
8 Irompa eirorica ocoitsi tsinane oijatempi, ari oncanteata oca nocantavetaquempiri, eiro pimoncaratirotsi. Iro cantaincha, ¡eiro catsini paanaqueri notomi anta!
9 Irosati yoanquetantacaro iraco icantaqueriri. Icantasanotaqueri:
—Je, aitaque nomataquempiro picoacaaquenari.
10 Ari yovetsicayetaquero cameetsayetatsiri timimotiriri nampitariri, impashitapemparori tsinane. Aisati yaaque 10 iyameyote inampitari quijacotanaqueroneri iraayetanaqueri. Irosati ijatantaca anta inampiqui Nahor, ora quipatsi pajitachari Mesopotamia, icaratanaqueri itsipapee icarajeitiri.
11 Yareetantacari nampitsiqui, isavicapaaque otsapitapaaca. Isaviquimotapaaquero nija quianarentsi imaoreacaapaaqueri cameyopee. Ishaavijiiteanaji ini catsirincaiteri, irotajantsi ontsitenijencaiteaje. Aitaque ocaratiri opocapiniti tsinanepee aacojatapanajante nija.
12 Ari iquenquetsatacaaqueri Tasorentsi, icantiri: “Novincatsarite, tempa avirotaque Tasorentsi ipincatsatiri nampitanari, nocoaque pincavintsayeri, pamitacotena nomoncarateneri icoacaaquenari.
13 Jeraacana meeca nosaviquimotapaaquero quianarentsi nija. Aitaque opocapinitiri evancaropee aacojatapanajante.
14 Nocoaque pincantashireacayearo jaanicarica noncantavaqueri: ‘Pimpena narori nija nire,’ oncantanaquenata: ‘Jee, intsiqueti pire, aisati nompavaquerita iriori piyameyotepee.’ Impoiji niotanaque irotaque picoyeaqueri irijinanteari Isaac, aisati niotanaque queario picavintsaasanotaqueri nampitanari.”
15 Ainiroquera iquenquetsatacairi Tasorentsi, tequera intsonqueroji, irosati opocantaca aparoni evancaro amaque ochomone aacojatanteari nija. Opajita Rebeca, irishinto Betuel yora otomi Milcá, ijina Nahor yora irirenti Abrahama.
16 Ora Rebeca evancaro oni, ocameetsavorotasanotaque, tequera oneayeteriji shirampari. Ari aajatapaaque nija, irosati opiantavetanaja.
17 Ari intsipaite ijatashitaquero, icantavaquero:
—Ashaninca, pimpanaquena pinijate capichaji, nocoaque nire.
18 Ari ocantiri:
—Jee, jeroca, pire.
Irosati oaniireantanacaro ochomone opacotaqueri iraque.
19 Ari iraque, irosati ocantantacari:
—Naacojatavaquenerita piyameyotepee iriori, irirajeitavaqueta irosati inquemantajeitanaquea.
20 Irosati osantanacaro ochomonequiniri irantapinitariqui virantsipee. Oshequi opiapinitaca aacojatapinitaqueneri, irosati iquemantajeitanaca.
21 Ainiro iriori nampirentsi imajeretaque, yamenaquero. Icoaque iriotasanote irotaquerica oca tsinane icoyeaqueri Tasorentsi, aisati queariorica icavintsaaqueri ipocantacari.
22 Iquemantanacari cameyopee irajeitaque, irosati yaantacari aniiyo vetsicachari oro, ocarati 6 gramo otenati, yoaquenero oirinaqui. Aisati ipaquero apite maavacorontsi irosati vetsicachari oro. Ocarati otenati iroori 100 gramo.
23 Impoiji icantiro:
—Pincamantena, ¿jaanicampa shintotimpiri? Aisati ¿timatsimpa ivancoqui piri nomantapempari narori aisati nocarajeitaqueri?
24 Acanaqueri iroori:
—Naro irishinto Betuel yora otomi Milcá, ijina Nahor.
25 Anta ivancoqui apa timatsi pancotsi pimantajeitapempari aisati timatsi oshequi casaveshipee irinareajeitantapempari piyameyotepee, timatsi aisati iroapempari.
26 Irosati itiyeroantanaca quipatsiqui ipasonquitaqueri Tasorentsi. Icantiri:
27 “¡Ariovee, Novincatsarite, tempa avirotaque Tasorentsi iquemisantiri nampitanari. Picameetsatasanotaque, picantani pinintasanotaqueri. Meeca avirotaque amaquenari aca isavicajeitica ishanincapee!”
28 Ora Rebeca jataque oni, oshianaca anta ovancoqui ocamantapaaquero iniro maaroni icantaquerori shirampari.
29 Ainiro aparoni ojariri ipajita Labán, iquemantavacarori ocantapaaqueri aisati ineavaquero aniiyote jero maavacorontsi ipaquerori, irosati ishiantanaca quianarentsiqui irameneri. Ainiroqueratatsi iriori inampire Abrahama quianarentsiqui; ineantapaacariri, yovetsatapaacari.
30 -
31 Icantiri:
—Aviro itasoncaventane Tasorentsi, tsame anta novancoqui. ¡Paitampa pisavicantapaacari aca! Timatsi pancotsi pimantapempari aisati irinareantapempari piyameyotepee.
32 Irosati yoijatantanacari ivancoqui. Yareetantapaacari, yoaniireayetapaaquero Labán yamayetaqueri cameyopee aisati yamaqueneri iroyeari, impoiji yamacotaqueneri iriori nija iquivajeitantapaacarori iitipee.
33 Ari ipajeivetacari iroyeari. Iro cantaincha icantiri:
—Eirotsita noitatsi, nojivatavaquetsita noncamantempiro paita nopocashitaqueri aca.
Icantanaqueri Labán:
—Jee, intsiqueti pincamantena.
34 Icantiri:
—Narotaque inampire Abrahama.
35 Yora Tasorentsi oshequi catsini itasoncaventasanotaqueri, yashitaarantacaasanotacari oshequi catsini iireequite, oro aisati oshequi catsini ivacatepee, irovishatepee, iyameyotepee jeri iraashinotepee aisati timatsi oshequi inampirepee shirampari jero tsinane.
36 Aisati anteashipatasanovetaca ijina ora Sara, iro cantaincha itasoncaventaquero Tasorentsi otimantacanariri aparoni itomi. Meeca iriotaque imperi maaroni timimotiriri.
37 Icantasanotaquena nomoncarateneri icantaquenari: ‘Eiro pishinetiritsi notomi irayero tsinane savicajeitatsiri aca quipatsiqui Canaán.
38 Meeca nocoacaaquempi pijate anta nonampiniqui, isavicajeitinta noshanincasanoripee narori. Pamenaiteneri aparoni tsinane irijinanteari.’
39 Ari nocantavetanacari narori: ‘Jaaquea, eirorica ocoitsi iroori tsinane oijatena, ¿paita nanteri?’
40 Icantanaquena: ‘Timatsi Notasorentsite noquemisantiri, iriotaque tianquempirine Inampire irijivatanaquempi. Iramitacotempi pijatanteari cameetsa anta, pamenanteanariri notomi irijinanteari noshanincasanoripee narori.
41 Pijavetaitea, eirorica icoitsi noshanincapee intianquempiro aparoni evancaro, aitanaji oncantajeata, eiro pimoncaratirotsi nocantavetaquempiri.’
42 “Aitaque ocantacari. Nareetantapaacari meeca anta quianarentsiqui, noquenquetsatacaapaaqueri Tasorentsi, nocantiri: ‘Novincatsarite, aviro Tasorentsi, iquemisantiri Abrahama yora nampitanari; tempa avirotaque amaquenari aca, nocoaque meeca pamitacotenaro oca nopocashitaqueri.
43 Jeraacana meeca nosaviquimotapaaquero quianarentsi. Ariorica ompoque evancaropee aacojatatsineri nija, ora noncantavaquerorica: Pimpena narori capichaji nija nire. Oncantanaquenata iroori: Jee, intsiqueti pire. Aisati naacojatavaquenerita iriori piyameyotepee. Impoiji niotanaque irotaque oca tsinane picoyeaqueri irijinanteari itomi nampitanari.’
44 -
45 Tequeratsita nontsonquero noquenquetsatacairi, irosati noneantavacaro ora Rebeca opocaque amaque ochomone. Ari aacojatapaaque nija, impoiji nocantiro: Pimpena pinijate capichaji niravaqueta.
46 Ari ocantanaquena iroori: Jentsiqueti, pire. Irosati oaniireantanacaro ochomone, opaquena niraque, aisati opajeitaqueri iriori noyameyotepee.
47 Impoiji nosampitiro: ‘¿Jaanicampa shintotimpiri?’ Acanaquena: ‘Naro irishinto Betuel yora itomi Nahor, ojime Milcá.’ Irosati noantacanaro aniiyo oirinaqui aisati nopaquero apite maavacorontsi.
48 Ari notiyeroashitanacari Tasorentsi, nopincatsataqueri aisati nopasonquitaqueri. Tempa iriotaque amaquenari aca namenanteari irijinanteari itomi nampitanari ishanincasanori iriori. Irotaque meeca nopocantacari aca.
49 Meeca pincantasanojeitena avirori, ariorica pincavintsaajeitaqueri nampitanari, pintiancavaqueneri evancaro. Irompa eirorica, pincantena niotanteari narori.”
50 Ari yacanaqueri ojariri jeri iri:
—Cameetsataque oni oca picantaquenari; tempa iriotaque Tasorentsi amaquempiri aca, tecatsi noncantea narori nontsanemparo paantanaquearori.
51 Jero meeca oca Rebeca, paanaqueroqueti; tempa iriotaque Tasorentsi coacaaqueriri nampitimpiri irijinanteari itomi.
52 Iquemantajeitavacarori oca icantajeitaqueriri, irosati itiyeroashitantanajari Tasorentsi, ipincatsataqueri.
53 Ari yaayetaquero inampire Abrahama yamayetaqueri oro, plata, quitsaarentsipee, ipaquero Rebeca aisati ipashitacaro iniro jeri ojariri.
54 Impoiji yoajeitaca aisati irajeitaque inampire Abrahama jeri icarajeitaqueri, ari imaajeitanaque. Ari oquitaiteamanaji itinaajeitamanaja, icantiri:
—Meeca nompiajeitanaje nampitanariqui.
55 Iro cantaincha yora ojariri jero iniro icantajeivetari:
—Eirotsita pijatitatsi, osaviquimotanajenatsita Rebeca oncarate 10 quitaiteri, impoijiquea paanaquero.
56 Icantanaqueri iriori:
—¡Teeve! Te noncoyeji nosavicanaje aisati. Aitaquenea itasoncaventaquena Tasorentsi, meeca ocameetsati nompiatanajea nampitanariqui.
57 Ari icantajeitanaqueri:
—Intsitee ancajemero Rebeca jaocarica ocanti iroori.
58 Ari icajemaquero, isampijeitiro:
—¿Picoimpa poijatanaqueri yoca shirampari?
Acanaqueri:
—Jee, aitaque noijatanaqueri.
59 Iquemantacarori, irosati ishinejeitantacaro ojate Rebeca jero amenaquerori peerani ojananequitapaini, oijajeitanaqueri inampire Abrahama jeri icarajeitiri.
60 Ari icantacoventajeitavaquero maaroni oshanincapee Tasorentsiqui. Icantiro:
—Avirotaque noshaninca, nocoajeitaque irishequiasanojeitanaque catsini pishanincajeitajeari. Nocoacaajeitaqueri yora pishanincajeitajeari iranaacojeiteri maaroni quisajeiterineri, iraajeitantajearori inampipee isavicantajeiveitaniri.
61 Irosati ojatantaca Rebeca jero onampirepee iquijacojeitanacari cameyopee, oijajeitanaqueri inampire Abrahama. Aitaque ocantari yaanaquero Rebeca ojatantacari.
62 Yora Isaac isaviqui quipatsiqui NÉgueb. Incaranqui ijaiti otiminta queanarentsi ipajiyeetiri Ineaquena Aneatsiri. Impoiji ipiapaaja.
63 Ari ishaavijiiteanaji catsirincaiteri, irotajantsi ontsitenitaje isoquijanaque ivancoqui yaniiveetapanajanti paashitomashiqui, irosati ineantavajari areejiqui cameyopee iquenajeitapaaji.
64 Amenantanacari iroori Rebeca oneatiiri Isaac iquenapaaque anta, irosati aniireantanaca.
65 Osampitiri inampire Abrahama, ocantiri:
—¿Jaanicampa yonta shirampari pocaintsiri?
Yacanaquero:
—Iriotaque itomi nampitanari.
Irosati opashivorotantanaca.
66 Yora inampire Abrahama iquenquetsatacaapaaqueri Isaac maaroni jaoca ocantari anta ijaitinta.
67 Irosati yaantanacaro Isaac Rebeca anta ovancojaniquiqui irinironi, ijinantasanotacaro; oshequi inintasanotaquero. Yoashireveitani ocamantacari irinironi, iro cantaincha meeca oimoshirencapaajiri.
Jero ivajiro oshanincajeitaniri Queturá, ora yaajiri Abrahama
(1 Crón. 1.32-33)
