Génesis 25:1-34
25 Ari yaaji Abrahama pashini ijina opajita Queturá.
2 Itimacaajiro itomipee icarajeiti 6. Jero oca ivajiropee: Zimrán, Jocsán, Medán, Madián, Isbac jeri Súah.
3 Ari otimaqueri ijina Jocsán itomipee iriori. Ipajijeitaqueri Sebá jeri Dedán. Jeri ishanincapee iriori Dedán: asureopee, letuseopee jeri leumeopee.
4 Ari otimayetaqueri ijina Madián itomipee iriori. Ipajijeitaqueri: Efá, Éfer, Hanoc, Abidá jeri Eldaá. Iriojeitaque yoca oshanincapeeni iroori Queturá.
5 Yora Abrahama, aneatsiquera ini, ipaqueri itomi Isaac maaroni timimotiriri.
6 Irintiquea yora otomipee pashinipee, ipashiyetacari paitapeerica. Aisati te incoacayeriji Isaac irisaviquimojeiteri, irotaque itiancantacariri irisavicajeite areejiqui, iquenapainta catsirincaiteri, ainiroquera yanei.
Icamantacari Abrahama
7 Ari ocaratapaaque 175 irosarentsite Abrahama.
8 Irosati icamantaca yanteashipatasanotapaaque. Tecatsi oyerine, icamashitaca; itsipatajari camayetaintsiniri.
9 Yora itomi, Isaac jeri Ismael, itijajeitaqueri anta omoroqui imperita nampitsiqui Macpelá, iipatsitequi Efrón itomini Sóhar yora hititapee, timatsiri iipatsitequi MamrÉ iquenapainta catsirincaiteri.
10 Ora quipatsi irotaque yamanaqueriri Abrahama hititapee. Aitaque itijaqueriri itsipataajiri ijinani.
11 Icamantacari Abrahama, itasoncaventaqueri Tasorentsi Isaac. Isavicaquenta otiminta queanarentsi ipajiyeetiri “Irineaquena Tasorentsi Aneatsiri.”
Jero ivajiro ishanincapeeni Ismael
(1 Crón. 1.28-31)
12 Ari otimayetaqueri ijina Ismael itomipee iriori. Iriotaque itomi Abrahamani, itimacaaquerori Agar, ora egiptosato onampireni Sara.
13 Jero oca ivajiropee timayetaintsiri: Nebaiot, Quedar, Adbeel, Mibsam, Mismá, Dumá, Massá, Hadar, Temá, Jetur, Nafís jeri Quedmá.
14 -
15 -
16 Aitaque icarajeitiri iriori 12. Oca ivajiropee ipajitacoyetacaro iipatsitepee iojeitanteetarori jaocarica isavicayetaqueri. Aisati iriotaque jivatacaajetiriri ishanincasanori iriori aparopeequi inampi.
17 Ari ocaratapaaque 137 irosarentsite Ismael irosati icamantaca. Icaratajiri intayetacaroniri icamaque.
18 Yora ishanincapeeni iquenayetanaque, isavicantayetapaacaro quipatsi montetarori Havilá jero Sur aisati omontetaro Egiptoni, quempeji avotsi jatantachari Asiriaqui. Aitaque isavicasanojeitapaaqueri. Oshequi imanatavacaapinijeiveta, iro cantaincha icantani isavicasanojeitaque iipatsitequi.
Itimantacari Jacob jeri Esaú
19 Jero oca icantacotari iriori Isaac, yora itomi Abrahamani.
20 Ocarataque 40 irosarentsite Isaac, yaantacarori Rebeca ora irishinto Betuel, iritsiro Labán. Iriojeitaque arameo savicajeitatsiri quipatsi pajitachari Padan-aram.
21 Ora Rebeca te intimaveiteani otomi, oshiravaroveitani. Iro cantaincha yora ojime icantacoventaquero Tasorentsiqui. Ari itasoncaventaquero, irosati otsomontetantanaca.
22 Iro cantaincha otsipajanitaca aisati yantanatavacaaca. Oquemantacariri, oquenqueshireanaca. Ocanti: “Aitaquerica incanteari coajica ¿paitaquea naneanteari osamani?” Irosati ojatantaca oquenquetsatacaapaaqueri Tasorentsi.
23 Ari iquemaquero. Icantiro:“Yora pitsomontetaquerira incarate apite timatsineri.Irinashijeitanaquea irishanincajeiteari iriori,coajica aparo anaacotantatsine.Yora pijivateri pintimeri,coajica impincatsateri impoitapeerineri.”
24 Ari omoncaratapaaca otimantacariri apiiteroqueti otomi, yoijatavacaapaaca.
25 Yora jivatapaintsiri cashivatsempequini aisati quitioncapitini ishiva. Ari ipajitaqueri Esaú.
26 Yora oijatapaaqueriri quiso yoapaaqueri yajiricaquiitaqueri iiticontajaniquiqui. Irotaque ipajitantacariri Jacob. Ari ocaratanaque 60 irosarentsite Isaac, otimantacariri ijina apiiteroqueti itomi.
Yora Esaú icantaqueri Jacob inquempetajea irio jivatatsiri itimi
27 Ari yanteariyetanaque itomipee Isaac. Yora Esaú icoasanotiro iquenaveeti, oshequi icovintsatanaca. Irintiquea Jacobo cameetsa isaviqui, onimotiri irisavique inampiqui.
28 Ari icoasanotaqueri Isaac yora Esaú; tempa yoacovintsatacari iovintsane. Irointiquea Rebeca onintasanotiri iroori Jacob.
29 Ari aparo quitaiteri icotaque Jacob iroyeari. Impoiji ipocaji iriori irirenti ijaiti iquenaveetaiti, aasanotaqueri itashe aisati imaore.
30 Icantapaaqueri:
—Iyee, notashenivee, irotaintsi noncame. Pimpena capichaji tsitoiqui quiraaquiri picotaquerira.
Irotaque ipajitanteetariri Esaú Edom. (Ora Edom, icanteetiri: quiraaquiri.)
31 Yacanaqueri iriori:
—Jee, aitaque nompaquempi. Iro cantaincha pijivate pincantasanotena nompoyeetajempi, nonquempetantajeari naro jivatatsiri notimi, naajerota quimota impempimeri apa.
32 Ari icantanaqueri:
—Paitampa noncoanteari nashiyetearo. Irotaintsi nainti noncame aaquena notashe, pimpoyetajenaqueti pinquempetajea aviro jivatatsiri pitimi.
33 Icantasanotiri:
—Pincantasanotenaqueti pimoncaratenaro nocantaquempiri; eiro pamatavitanatsi.
Irosati icantasanotantacari, ishinetaqueri impoyeetajeari inquempetajea irio jivatatsiri itimi.
34 Irosati ipantacari tanta jero tsitoiqui quiraaquiri. Itsoncantanacarori Esaú yoaca aisati iraque, irosati icatiantanaja ijatanaji. Te inquenqueshireteroji maaroni imperimeri iriri.
