Génesis 27:1-46
27 Ari anteashipatasanotanaque ini Isaac, te iramenanaje. Aparo quitaiteri icajemaqueri itomi Esaú, yora jivatatsiri itimi, icantiri:
—¡Notomi!
Yacanaqueri:
—¿Paita apa?
2 Icantiri:
—Pineaquena meeca anteashipatasanotapaaquena, eiro osamanititsi noncamanteari.
3 Meeca nocoacaaquempi pijate pinquenaveetaite pinquentaitena poshiniri.
4 Pamaqueri pincotapeenari, cameetsa poameetsataquenari imposhinijencatasanotaque; pamaquenari noyeari. Impoiji noncantacoventempi Tasorentsiqui tequeratsita meeca noncameji, intasoncacoventantempiri.
5 Ari oquemaqueri Rebeca ojime icantaqueriri Esaú. Ijatantanacari iquenaveetiniri iriri, irosati ocantantacari iroori Jacobo, yora impoitatsiri itimi:
—Notomi, noquemaqueri piri icantaqueri pirenti:
6 -
7 ‘Pijate pinquentaitena poshiniri, pincotapeenari poameetsataquenari. Cameetsa imposhinijencatasanotaque, pamaquenari noyeari. Impoiji noncantacoventempi Tasorentsiqui, intasoncacoventantempiri tequeratsita meeca noncameji.’
8 Meeca pinquemisantero noncantempiri.
9 Pijate avirori anta itiminta avirapee, paitena apite chiivojaniqui vatsanti. Noncotenerita piri, cameetsa noaqueneri imposhinijencatasanotaque icoaqueri.
10 Impoiji paanaqueneri iroyeari, irosati incantacoventantempi avinti Tasorentsiqui, tequeratsita incameji.
11 Ari icantanaquero iriori:
—Iro cantaincha yora iye oshequi ishiva irinti, naintiquea te aneeroji.
12 Jaaquea noncanteari impamitavaquenarica apa. Ari iriotavaquena, irijitashitanaquea nantavintsatiri, impoiji incantacoventena Tasorentsiqui iroasanqueteena. Eiro icantacoventanatsi intasoncacoventena.
13 Ocantanajiri iroori:
—Eiro yoasanquetaacantimpitsi avinti, naroquea nainti iroasanquetaacante. Pijatatiyequeti paitenari chiivojaniquipee nocantaquempiri.
14 Ari iquemisantaquero, irosati ijatantaca yaitiniro. Ari ocotaqueneri, cameetsa oaqueneri iposhinijencatasanotaque icoaqueri Isaac.
15 Irosati aantacaro iitsaare Esaú cameetsamaotatsiri yoanontari, oquitsaataqueri Jacobo.
16 Impoiji aaqueneri aisati imeshinapee chiivojaniqui opashicantacari ijempequipeequi aisati itsanoqui. Irosati opantacari ocotaqueneriri aisati tanta.
17 -
18 Ari ijataque yaanaqueneri, icantapaaqueri:
—¡Apa!
Yacanaqueri:
—Jaa, ¿jaanicampi?
19 Icantiri:
—Narotaque pitomi jivatatsiri notimi, namaquempiri noquentaitiri picantaquenari incaaranqui. Pintinayequeti meeca pisavique, poyea. Impoiji pincantacoventena Tasorentsiqui, intasoncacoventantenari.
20 Ari isampitiri:
—¿Picatimaitacampa, notomi, piquentaiti?
Yacanaqueri:
—Jee. Tempa yamitacotaquena Tasorentsisanori Pitasorentsite, yonijaaquenari noquentantacariri.
21 Icantasanotiri:
—Intsitee pimpoque quempejica nompamitempi, avirotasanotaquerica Esaú.
22 Ari ijatashitaqueri quempeji ipamitavaqueri. Icantiri:
—Quempeitaquempiteemi Jacobo pineanequi, iro cantaincha pijempequipeequi quempetasanotaquempi Esaú.
23 Iro caari iotantari, oshequi ishivapee ijempequipeequi, iquempetasanovetacari Esaú. Iro cantaincha irotaintsi incantacoventanteariri, isampitasanotajiri aisati:
—¿Avirotasanotaquempa Esaú?
Yacanajiri:
—Jee, narotaque.
24 -
Icantacoventaqueri Isaac Jacob intasoncacoventeri Tasorentsi
25 Irosati icantantacari Isaac itomi:
—Jentsiqueti notomi, pamaquenaro, noavaqueata piovintsane. Impoijiquea noncantacoventempi Tasorentsiqui intasoncacoventempi.
Ari ipaqueri aisati ipacotaqueri ovaja, yoaca aisati iraque.
26 Ari itsoncanaque yoaca, irosati icantantacari:
—Caate notomi, quempejica, pinintavorotena.
27 Ari ijatashitaqueri quempeji inintavorotapaaqueri. Iquemencatavaquero ojencaaque iitsaare, irosati icantacoventantacari Tasorentsiqui, icanti:“Queariotaque iriotasanotaque notomi.Noquemencataqueri iquempetacaro ojencaaretomirishi itasoncaventaqueriri Tasorentsi.
28 Irio Tasorentsi ovariapinitempirone incani,oshiocanteari pivanquirepee,ontimasanote oitsoqui tirico, jero ova.
29 Oshequi atiri antaveeyetempineaisati impincatsajeitempi itsipapeePimpicatsariventajeiteri pishanincasanoripee;¡impincatsajeitempi iriori!Yora quishimajeitempineri,iroashinoncaajeiteri Tasorentsi.Irintiquea aacameetsajeitempineri,intasoncacoventajeiteri.”
Icoaveta Esaú incantacoventajerime iriori
30 Ari itsoncanaquero Isaac icantacoventaqueri Jacobo. Isoquijantanajari Jacobo irosati yareetantapaaja iriori irirenti Esaú, yamaque iovintsane.
31 Ari icotapaaqueneri iriri, impoiji yaacovetanacanari, icantapairi:
—Apa, pintinayequeti, pisavique. Poyea namaquempirica noquentaitiri. Impoiji pincantacoventena Tasorentsiqui intasoncacoventena.
32 Iquemantacariri icantavaqueri:
—¿Jaanicampimpa?
Yacanaqueri:
—Narotaque pitomi Esaú, jivatatsiri notimi.
33 Ari imajeretanaque iriri iquenqueshireanaca, ipioncatsatanaque. Icantanaqueri:
—¿Jaanicampa jaitatsiri iquentaveetaiti? Noaca incaaranqui yamaitana, tequeratsita pareetajeaji avirori. Nocantacoventaqueri irinti, iriotaque meeca intasoncacoventeri Tasorentsi, incanteani.
34 Iquemantacarori Esaú icantaqueriri iriri, irosati iraasanotantanaca catsini. Icajemanaque:
—¡Apa, nocoaque narori pincantacoventajena Tasorentsiqui!
35 Icantanajiri iriri:
—Eiro nomatajirotsi noncantacoventajempi avirori, ipocaiti pirenti yamatavitaitana. Meeca irio intasoncacoventeri Tasorentsi intasoncacoventempimeri avirori.
36 Ari icantanaque Esaú:
—¡Irotaque ipajinirotantari Jacobo, irinti amatavitantatsiri! ¡Meeca apitetaque yamatavitaquena! Chapinqui ijivataque yamatavitaquena noshinetantacariri ipoyeetajana, iquempetantajari irio jivatatsiri itimi. Meeca yamatavitaquempi avirori, picantacoventantacariri irinti Tasorentsiqui intasoncacoventeri. ¿Eirompa meeca, apa, pimatajirotsi pincantacoventajena narori?
37 Yacanajiri iriori:
—Pamene, aitaque nocantaqueri pirenti impincatsariventempi aisati pimpincatsateri avirori. Aisati inquempejeitea maaroni pishanincajeiteari. Nocantaqueri ontimasanotanaque oshequi oitsoqui ivanquirepee, tirico jero ova. ¿Paitampa, notomi, noncantacoventajatiyempiri meeca avirori?
38 Aiquero icantanaitiiri:
—Apa, ¿eirompa picantacoventavajanatsi aparoni narori? ¡Nocoasanotaque pincantacoventajena!
Ari iraasanotanaja aisati.
39 Irosati icantantanacari:—Aitaque oncanteari:Eiro pisavicantarotsi quipatsi cameetsaiteriaisati eiro opariasanotitsi incani.
40 Avisati piacoventachane incoyeetempirica iroyeetempiaisati avirotaque antaveetenerine pirenti.Iro cantaincha, ariorica pimpincatsaritanaque aviroriimpoijiquea poipacaacoventajea avisati,eiro ipincatsariventanajimpitsi.
Iquenqueshireaca Esaú iroyerime irirenti.
41 Irosati iquisasanotantanacari Esaú irirenti. Iquishimentaqueri icantacoventaqueri irinti iriri Tasorentsiqui. Iquenqueshireaca, icanti: “Meeca incamaquerica apa, noncarateri iyeniro noashiretacoteari, irosati noantaqueari iriori.”
42 Ari oquemacotaqueri iriniro icantaqueri Esaú. Irosati ocantantacari Jacobo:
—Notomi, icoaque pirenti iroyempi impiacoventajea pamatavitaqueri.
43 Meeca pinquemisantena. Pishiapitsatanaqueri intsipaite anta nampitsiqui Harán, isaviquinta nojariri ipajitari Labán.
44 Pisavicaitetsita anta jaocarica oncarate osarentsi. Ariorica incatsimareanajea pirenti, impeacotanajearorica oca pantaqueri, irosati nontiancantajea camantajempineri pimpiantajeari. ¡Te noncoacaajeitempiji pimpeajeitea apiiteroqueti!
45 -
46 Impoiji ocantiri iriori ojime:
—Yoraa, te oncameetsateji ora ishanincapee hitita yaarantaqueri Esaú. Onashita iroori, oshequi oshemashireacaaquena. Ariorica iraaquero Jacobo iriori tsinane canaasato, oshequi noashiretasanotanaquea irosati noncamantaquea.
