Génesis 30:1-43
30 Ari oquisanentaquero Raquel irento, oneaca te ontimajaniteji iroori. Ari ocantavetari ojime:
—Pintimacayena narori. Eirorica pitimacaanatsi, noncameta irointi.
2 Irosati iquisatsatantanacaro, icantiro:
—¡Paita picantantanari! ¿Narompa Tasorentsi? Tempa iriotaque caari shinetempine intime pitomi.
3 Ari ocantiri:
—Jentsite, payero irointi nonampire Bilhá, poonayero. Ariorica intimanaque otomi, nonquempetacanteri irio nashisanori.
Ari iquemisantaquero.
4 Irosati opacantacari ijinantacaro. Ari itsipatacaro, irosati otsomontetantanaca.
5 -
6 Itimantanacari otomi, ocanti Raquel: “Yoca jananequi impajitea Dan; tempa iquemaquena Tasorentsi noquenquetsatacaaqueri. Tempa ineaquena tecatsi nante, irotaque ishinetantacariri itimaque jananequi.”
7 Impoiji itimanaji itsipa otomi Bilhá.
8 Ocanti aisati Raquel: “Yoca jananequi nompajiteri iriori Neftalí; tempa antanavetaquena nirento, iro cantaincha nanaacotaquero nainti.”
9 Ari oneaca iroori Lea te intimajeji aisati otomi, irosati opacantacari iroori onampire Zilpá ijinantacaro.
10 Itimantanacari otomi iroori, ocanti Lea: “¡Ariove, notsataitiro nonampitacaro timajanitatsiri! Meeca nompajiteri Gad.”
11 -
12 Impoiji itimanaji pashini otomi Zilpá.
13 Ocanti aisati Lea: “¡Oshequi noquimoshiretaque! Meeca oncantajeitena notsinanerontepee: ‘Oquimoshiretasanoti Lea’ Irotaque nompajitanteariri yoca jananequi Aser.”
14 Ari omoncarataca yaviitanteetarori tirico. Aparo quitaiteri yora RubÉn, otomi Lea, ijataque oantsiqui. Ineaquero chochoqui icanteetiri mandrágora. (Ijiyevetaca ariorica oaquearo tsinanepee, irotaque ontimajanitantajeari) Yaaquero yamaquenero iriniro ipapaaquero. Oneacotantacarori iroori Raquel, ocantiro:
—Eetio, pimpaarantena narori yamaquempirira pitomi.
15 Ari oshintsitsatanaquero ocantiro:
—¡Paitampa nompaarantantempiri; tempa paapitsataquenari nojime! ¡Meeca picoaque paapitsatenaro mandrágora yamaquenari notomi!
Ocantanaquero iroori Raquel:
—Ariorica pimpaarantaquena, noncanteri ajime intsipatajempi tsiteniriqui.
16 Ari ishaavijiiteanaji catsirincaiteri ipocaji Jacobo yantaveetaiti. Ojatanaque Lea otonquiotavajari, ocantiri:
—Nopaarantaqueroyea iyetio mandrágora yamaquenari atomi. Ocantaquena pintsipatajena meeca tsiteniriqui.
Impoiji otsitenitanaji itsipatajaro.
17 Irosati itimantanaja aisati otomi caratapaintsiri 5; tempa iquemaquero Tasorentsi oquenquetsatacaaqueriri.
18 Itimantanajari, ocanti: “Yoca jananequi nompajitajeri Isacar. Peerani nopacaaqueri nojime nonampire, irotaque meeca ipashitantajanari Tasorentsi pashini notomi.”
19 Impoiji itimaji aisati otomi caratapaintsiri 6.
20 Ocanti: “Ipashitajanari aisati Tasorentsi. Meecaquea irinintasanotajena nojime, aitaquenea notimaqueriri itomipee caratatsiri 6. Meeca nompajiteri yoca Zabulón.”
21 Impoiji otimaque aparo ishinto, vecarantasanotacarori. Opajitaquero Dina.
22 Ari iquenqueshiretajeiro Tasorentsi Raquel, iquemaquero oquenquetsatacaapinitiri. Ari ishinetaquero itimanaque otomisanori iroori.
23 Itimantanacari, ocanti: “Ipeacotacaajanaro Tasorentsi nopashiventavetaca te intimeji notomipee.
24 Cantenane irishinetajena aisati intimanteari pashini.” Irotaque opajitantacariri JosÉ.
Icoaveta Jacobo impianaje inampiqui aisati yamatavitaqueri iriconquiri
25 Otimantacariri otomi Raquel, icantavetari Jacobo iriconquiri:
—Coqui, pishinetajena nompianaje noipatsitesanoriqui.
26 Pimpavajenari notomipee aisati nojinapee; tempa irotaque nantaveeventaqueri ocarataque 14 osarentsi. Pishinetajena meeca nojataje. Piotasanotaquenanea jaoca nocantaca nantaveetaquempi cameetsa.
27 Yacanaqueri iriori, icantiri:
—Eirovee pijatajitsi, aitaque pisaviquimotasanotenari aca. Tempa niotacotashitaquempi, tecatsi camantenane. Itasoncaventasanotaquempi Tasorentsi, irotaque itasoncaventantaquenari narori.
28 Meeca nocoi pincantena jaoca incarate nompinatajempi aisati; aitaque nompinataquempi.
29 Icantanajiri iriori Jacobo:
—Aitaquenea piotacotaquena noquearioventaquero nantaveetaquempi namenaquempiri pivirapee.
30 Peerani nopocantacari, noneapaaqueri te irishequiveiteani pivirapee. Nareetantapaacari nainti, namenapaaquempiri, irosati itasoncacoventantaquempi Tasorentsi, irotaque meeca yoshequiasanotantanacari catsini. ¡Jaoca noncanteari meeca narori nantaveenontantearori nojinapee aisati notomipee!
31 Yovaajiniri aisati icantasanotiri:
—¿Jaocampa incarate picoasanoti nompinatempi?
Yacanajiri iriori:
—Te noncoyeji pimpinatena, irointiquea nocoaque namenajempiri aisati pivirapee.
32 Meeca, pishinetena nojate itiminta povishatepee, nonashitacaayeteari maaroni quisaayetatsiri aisati chiivopee patancaayetachari jeri sanquenamotiyetachari. Iriojeitaque nashiteari narori.
33 Ariorica pijataite, pamenaiteri yora nocoyeanontacari narori, piotasanotanteari cameetsa nantaveetaquempi, te namatavitempiji. Irompa pineapaaqueririca irioshitaquea quitamarori caari patancaayetacha, caari sanquenamotiyetacha aisati caari quisaayetatsi, impoiji piotanaque nocoshitaquempi.
34 Ari onimotaqueri iriconquiri icantaqueriri. Icanti:
—Jee, cameetsataque oca picantaquenari.
35 Ari ijatanaque intsipaite Labán iquempoyeirinta irovishatepee jeri ichiivotepee. Icoyeayetapaaqueri chiivopee sanquenamotiyetachari jeri patancaayetachari aisati ovishapee quisaayetatsiri, irosati ipantacari itomipee iramenanteariri iriori.
36 Ari yaajeitanaqueri anta areejiqui, ocarati mava quitaiteri yaniitanaque.
Irintiquea Jacobo timanaintsi yamenajiniri aisati iriconquiri irovishatepee timaarantanaintsiri.
37 Ari ipesaque eerejempequipee inchato ipajiyeetiri álamo, castaño jero almendro isaraayetaquero, apatsaparopeeni oquitamarotsapayetanaque.
38 Impoiji yoatiaquero anta irapinitantariqui virantsipee. Aitaque yoanquetapinitarori iriori itsinanetepee. Ariorica yoanquetimotapinitacaro yamenaquero inchaquii, irosati itimantayetanaca irijanipee sanquenamotiyetachari aisati patancaayetachari.
39 -
40 Iriotaque inashitacaayetacari, irashiteari iriori Jacobo. Aitaque icantaqueriri itimantanacari ivirapee iriori. Aisati inashitacaayetacanari irashi iriori iriconquiri.
41 Ariorica yoanquetapinitaro vatsayetachari itsinanetepee, yoatiaquero Jacobo inchaquii irapinitantariqui, iramenantapinitearori.
42 Irintiquea matsayetatsiri, ariorica yoanquetapinivetaro itsinanetepee, te iroatiyeneriji irinti. Yora matsayetatsiri iriotaque irashi Labán, irioquea vatsayetachari iriotaque irashi Jacobo.
43 Irotaque yashitaarantasanotantacari. Yoshequiasanotanaque catsini irovishatepee, iyameyotepee, iraashinotepee jeri aisati inampirepee: shiramparipee jero tsinanepee.
