Génesis 31:1-55
31 Ari iquemaque Jacobo icantayetaqueri itomipee iriconquiri: “Iro yashitaarantantacari Jacobo, yaitaqueri apa maaroni ivirapee.”
2 Aisati ineaqueri iriconquiri te iraacameetsatanajeriji, te inquempetajea peerani iroaquerani isaviquimotantapaacariri.
3 Irosati icantantajari Tasorentsi Jacobo, icantiri: “Ocameetsati pimpianaje anta iipatsitequi picharineni jeri piri, isavicajeitinta pishanincapee. Narotaque tsipatanajempine.”
4 Ainiro Jacobo anta yameniniri irovishatepee iriconquiri, ari icajemacantaquero apiiteroqueti ijinapee inquenquetsatacantearori.
5 Areejeitantapaacari, icantiro:
—Oraa, noneaqueri piri te iraacameetsatajenaji, te inquempetajea peerani iroaquera nopocantaca. Iro cantaincha timatsi Tasorentsi iquemisantiri apa, icantani quiso yoaquena.
6 Piojeitaqueronea aviroripee, nocantani noquearioventaqueneri piri nantaveetaqueneri.
7 Irintiquea, oshequi yamatavitapinitaquena impinatantenameri. Iro cantaincha te irishineteriji Tasorentsi iroashinoncayena.
8 Icantamempeaquena: ‘Irio nompempiri patancaayetachari’ Iro cantaincha itimayetanaque irijanipee ioshitaca maaroni patancaayetachari. Impoiji icantajana: ‘Irio nompinatajempiri sanquenamotiyetachari’ Aisati iquempetaca iriori, itimayetanaque irijani ioshitaca sanquenamotiyetachari.
9 Aitaque ocantacari yaapitsataqueri Tasorentsi ivirapee piri, ipaquenari narori.
10 “Aparo quitaiteri omoncarataca oneaventantari virantsipee, nomishitaca. Noneaqueri chiivopee patancaayetachari aisati sanquenamotiyetachari yoanquetacaro itsinanetepee.
11 Impoiji noquemaqueri Inampire Tasorentsi icajemaquena novajiroqui. Ari nacanaqueri nomainequi, nocantiri: ‘Jeraacana.’
12 Ari icantana: ‘Pamenasanoteri catsini. Ari pineavaqueri virantsipee oanquetearoneri itsinanetepee, irioshitaquea patancaayetachari, sanquenamotiyetachari; tempa noneaqueri piconquiri oshequi yamatavitaquempi.
13 Narotaque Tasorentsi nijaaquempiri anta nampitsiqui Betel, poatianaqueronta peerani mapi ora pinashitacaaquenari. Timatsi picantasanotaquenari. Tsame meeca, pimpianaje piipatsitequi pitimaquenta peerani; pojocanajero oca quipatsi.’ ”
14 Ari acanaqueri iroori Raquel jero Lea, ocantiri:
—Queariotaque oca. Anta ivancoqui apa tecatsi incashiacayena timimoyetiriri.
15 Ainti iquempetacantajeitaquena pashinisato noni. ¡Oquempetaca ipimantaquena. Yaaquero maaroni pipinaventaquenari peerani paantapaaquenari!
16 Queariotaque, maaroni ivirapee yaapitsataqueriri Tasorentsi apa, iriotaque ashijei aisati irashi atomipee. Ocameetsati pinquemisantero maaroni icantaquempiri.
Isoquijatantajari Jacobo quipatsiqui Padan-aram
17 Ari ineaqueri Jacobo iriconquiri, te incoyeji irishinetajeri. Irotaque yovetsicaarantajeitantacari irijatantajeari quipatsiqui Canaán isaviquinta iriri. Jatatsi ini iriori iriconquiri anta yameetiri irovishatepee. Ora irishinto Raquel aitapaintiri itasorentsijaniquite. Irosati ijatantaja, yaajeitanaquero ijinapee jeri itomipee iquijacojeitanacari iyameyotepee. Aisati yaanaqueri maaroni timimoyetiri jeri ivirapee yantaveeventaqueri.
18 -
19 -
20 Ijajeitantajari, te incamantanajeriji, yaanaquero maaroni timimotaqueriri. Shintsini ijatanaji imonteanajaro nija ipajitari Éufrates. Iquenanajiro anta toncaariqui ipajitari Galaad. Aitaque ocantacari yamatavitaqueri Jacobo iriconquiri Labán yora arameo.
21 -
Icoaveta Labán iraavajerime Jacobo
22 Ari avisanaque mava quitaiteri, irosati iquemantaca iriconquiri: “Shianaja pitineri.”
23 Ari yapatojeitaqueri ishanincapee, yoijajeitanaqueri iraajeitantavajearirime. Ocarataque 7 quitaiteri yareetantacarori toncaari Galaad.
24 Aitaque imaajeitapaaqueri, irosati iconijamainetimotantacari Tasorentsi imainequi. Icantaqueri: “Pinquemena, eiroyea piquisatsatapairitsi pitineri.”
25 Ari oquitaiteamanaque yovaajeitamanaja, irosati yareetantavajari Jacobo isavicajeitapaaquenta toncaariqui Galaad. Aitaque isavicajeitapaaqueri icarajeitaqueri ishanincapee.
26 Icantapaaqueri:
—¡Paita pantaqueri! ¡Paita pamatavitantaquenari! ¡Pamitajeitaquenaro noshintopee, piquempetacantaquero pimanatacoventaitiro!
27 ¡Paita pamatavitantaquenari pimananaja pishiapitsatajana! ¡Te pincamantimatanajenaji! Pincamantanajename, ari noimoshirencajeitavajempime, cameetsa novetsajeitavajempime.
28 Irompa meeca te nonintavorotimatavaqueroji noshintopee jeri aisati nocharinepee, novetsajeitantavaquearirime. ¡Oca pantaqueri, te oncameetsateji! Piquempetacari caari iotatsi.
29 ¡Ari noashinoncaajeitaquempime meeca! Iro cantaincha tsiteniriqui icantaquena Tasorentsi, yora iquemisantiri piri. ‘Eiroyea piquisatsatapairitsi pitineri.’
30 Meeca noncantempi: pijatajequeti pishiretasanotajarorica inampiqui piri, ¿paitaquea picoshitantanaquenari notasorentsitepee?
31 Ari icantanaqueri iriori Jacobo:
—Iro caari nocamantantanajimpi, notsaroaque. Naamaaquempi paapitsajeitavajenaro pishintopee.
32 Meeca timatsirica nocarajeitica coshitanaquempiri pitasorentsite, ¡ocameetsati incame! Jero meeca acarajeitica pincantasanotena; timatsirica namitaquempiri, ari paanajero.
Iro cantaincha te iriotacoteroji ijina Raquel iroyeata coshitanaqueriri.
33 Ari iqueanaque Labán ivancojaniquiqui Jacobo icoayevetajari. Aisati yovaavetanaca irishintoqui Lea jero apitetatsiri onampirepee. Iro cantaincha tecatsi irinee. Impoiji yovaashitanacaro iroori Raquel.
34 Iro cantaincha aitaque incaaranqui aaqueri, oaqueri tsompoina osavicantaririqui cameyo osavicacotaqueri. Ari itsoteayevetacaro yamenaarantayevetacaro, te irineajeriji.
35 Impoiji ocantiri Raquel:
—Apa, eiroyea piquisanatsi. Te nontsatayempaji nosavique, noneaventatiya, irotaque caari nocatianta.
Ari ineaqueri Jacobo iriconquiri itsoteayevetacaro yamenaarantayevetacari itasorentsijanquite. Iro cantaincha te irineajeriji.
36 Irosati iquisantanaca icantiri:
—¡Paitampa nantitaquempiri! ¡Paita nocoshitanaquempiri poijatimentaquenari!
37 Aitaquenea pitsoteayevetacaro pamenaarantayevetaquena maaroni. ¡Paita pineajiri meeca! ¡Jentsite, pamaquero aca pimpiotero aneajeitantearori maaroni, ayojeitanteari jaanicarica ashiyetarori!
38 Pamene, ocarataque 20 osarentsi nantaveetaquempi. Cameetsa namenaquempiri maaroni pivirapee, te incamapiniteji aisati te noncoshitimatempiji aparoni noyeari.
39 Ariorica yoapinitacari maniti, nopinatajimpiri. Aisati ariorica icoshiyeetaquempi quitaiteriqui aisati tsiteniriqui, picoacotapinitaquena ivinaro.
40 Nocantani namenapinitaquempiri maaroni quitaiteripeequi, aisati oshequi nomasavitimentaqueri. Aisati tsiteniriqui oshequi nocatsincatimentaqueri aisati aapinitaquena novochoquine.
41 Ocarataque 20 osarentsi nosaviquimotaquempi pinampiqui nantaveetantaquempiri, meeca maaroni yocapee iriotaque nashisanori. Ocarataque 14 osarentsi nantaveetaquempi naantacarori pishintopee. Aisati ocarati 6 osarentsi nantaveeventaqueri novirapee. Iro cantaincha picantani pamatavitapinitaquena pimpinatantenameri.
42 Eirome itasoncaventaname Tasorentsi, yora iquemisantiri Abrahamani aisati iriotaque iquemisantiri apa Isaac, tecatsi timimotenaneme catsini, nompocashitajeame meeca. Iro cantaincha ineaquena Tasorentsi nashinoncaaca aisati iotaquero noquearioventaquempiro nantaveetaquempi. Irotaque imishitacantaquempiri tsiteniriqui icantantaquempiri: ‘¡Eiro piquisatsatiritsi pitineri!’
Yora Jacobo jeri Labán icantavacaasanojeitaca: Tsame aacameetsatavacaajeitea
43 Ari icantanajiri iriori Labán Jacobo:
—Oca noshintopee, yoca nocharinepee aisati ovishapee pineajeitaqueri, iriojeitaque nashi. ¡Jaoca noncantajeitajerori meeca noshintopee aisati otomipee!
44 Aitanaji oncanteata: tsamatiye aacameetsatavacaajea. Tsame meeca ampiote mapi onquenqueshireacantajeiteeri acantavacaasanotaca apiiteroqueti aacameetsatavacaajea.
45 Ari onimotanajiri Jacobo. Irosati yaantaca aparoni mapi, yoatiaquero. Icantiri ishanincapee:
—Pamajeitaque avirori mapi pimpiojeitero aca.
Ari yamajeitaque maaroni ipiojeitaquero. Itsoncaquero, irosati yoimojeitantacaro.
46 -
47 Ari ipajitaquero Labán irineanequi iriori arameo Jegar Sahadutá. Aisati ipajitaquero Jacobo irineanequi iriori hebreo Galaad.
48 Impoiji icantiri Labán:
—Oca apiojeitaquerica mapi, irotaque quenqueshireacaajeiteene acantavacaasanojeitaca: ‘Tsame aacameetsatavacaajeitea.’
Irotaque ipajitantacarori isavicajeitapaaquenta Galaad.
49 Aisati ipajitaquero Mispá. Iro ipajitantacarori, icanti Labán:
—Eirorica aneavacaajeivetajatsi, irio Tasorentsi amenacoventajeiteene.
50 Ariorica poanatero noshintopee aisati ariorica paaque pashini tsinane, omavetaquea eiro ayotacotavacaajeitatsi; iro cantaincha timatsi Tasorentsi iriotaque neajeiteeneri irinti.
51 Icantajiri aisati:
—Pamene, jero oca apiojeitaquerica mapi aisati avatiaqueri.
52 Irotaque quenqueshireacaajeiteene, eiro avisajeitirotsi anquisavacaajeitanteari:
53 Tempa ainiro Tasorentsi iquemisantiri picharineni Abrahama aisati nocharineni Nahor. Iriotaque cantacoventeene iroashinoncaajeitanteeri ariorica amatavitavacaaquea.
Ari icantasanotaqueri Jacobo Tasorentsiqui:
—Yora Tasorentsi iquemisantiri apa, iotaquero nomoncaratero nocantasanotaquempiri.
54 Impoiji itaaqueneri Tasorentsi ivira. Irosati icajemajeitantacari maaroni ishanincapee jeri ishanincapee iriori iriconquiri. Yoacaajeitacari cameetsa. Ari imaajeitaque toncaariqui.
55 Ari oquitaiteamanaji itinaajeitamanaja, irosati yovetsajeitantanajaro Labán irishintopee aisati icharinepee, inintavorojeitanajiri. Impoiji icantacoventajeitaqueri Tasorentsiqui, irosati ipiajeitantanaja inampiqui.
