Génesis 33:1-20
33 Impoiji ineajeitavaqueri Jacobo irirenti Esaú ipocaque, icarajeitapaaqueri 400 shiramparipee. Intsipaite yapatojeitaquero ijinapee, inashitacaayetacaro ocarajeitaqueri otomipee aisati inampirepee.
2 Yoijivataaquero apitetatsiri inampire ocarajeitaqueri otomipee. Impoiji oijatapaaquero Lea ocarajeitaqueri iroori otomipee aisati iroori Raquel, otsipatacari otomi JosÉ.
3 Irosati ijatashitantavacari. Ocarataque 7 yoivotashitapinitanacari irirenti irosati quipatsiqui, ipincatsatantavacariri. Irotaintsi inquempejitapemparime.
4 Iro cantaincha yora Esaú ishiashitapaacari irinti, yavitsanotapaaqueri inintavorotapaaqueri. Ari iraajeitanaca apiiteroqueti.
5 Yoipacantanacarori yavitsanotavacaajeita, irosati yamenantanaca ineajeitaquero tsinanepee aisati jananequipee. Ari isampitiri:
—¿Jaanicampa yontapee?
Yacanaqueri:
—Iriojeitaque notomipee itasoncaventaquenari Tasorentsi.
6 Irosati ojatashitantacari iroori inampirepee jeri otomipee, iquempejijeitapaacari yoivotashijeitapaacari irosati quipatsiqui.
7 Impoiji iroori Lea jeri otomipee aisati oquempejeitaca oivotashijeitapaacari. Ari impoitanaque iroori Raquel jeri otomi oivotashitapaacari.
8 Ari isampitiri aisati:
—¿Jaoca pincanteriri virantsipee yora noneajeitanaqueri nianqui avotsiqui nopocantacari?
Yacanaqueri iriori:
—Iriotaque notiancacantaquempiri, nopashitaquempiri paacameetsatantavajenari.
9 Icantanaqueri:
—Teeve iye, timatsi nashi narori oshequi, te noncoyeji nayeri. Iriotaque pashi avirori.
10 Ari icantasanotiri:
—Payeritave, iye. Iriotaque nopashitaquempiri; tempa oshequi noquimoshiretapaaji noneapaajimpi paacameetsatavajana. Oquempetimotaquena irio noneasanotaqueri Tasorentsi. Irotaque nocantantimpiri: ‘Payeri, nopaquempiri.’ Tempa itasoncaventaquena Tasorentsi yashitaarantacaaquena, tecatsi coiteimotenane.
Aiquero icantasanotiri. Ari onimotanaqueri Esaú, irosati icantantanaca:
—Jee, aitaque naaqueri.
11 -
12 Impoiji icantiri:
—Tsamequeti nonampiqui, poijatitanaquena ancaratavacaajeitanaquea.
13 Ari icantanaqueri Jacobo iriori:
—Eirove, iye, nomatirotsi noijatitanaquempi. Pineajeitaquerinea notomipeeca, tequera irishintsijeiteji iraniite. Aisati oshequi novira timatsiri irijanipee, ariorica irimacojeitanaque nianqui, ari incamajeitaque.
14 Ocameetsati pijivatanaje avinti, coraquetaquena narori nimpoitanaje. Jentsiquero noncantacaajeitanaqueari notomipee aisati novirapee. Ari aneavacaajeari anta pinampiqui Seír.
15 Icantiri:
—Jee, ari cameetsataque. Irintiquea nojocanaquempi aparopee natirite amitacotanaquempineri.
Icantanajiri iriori:
—Eirove, iye, aitanaji. Te noncoyeji amitacotenane.
16 Ari ipiajeitanaja Esaú inampiqui Seír.
17 Iro cantaincha yora Jacobo iquenanajiro Sucot, aitaque yovetsicapaaqueri ivancojaniquipee. Aisati yaaque inchashipee yovetsicajeitapaaqueneriri iriori ivirapee yamampeajeitacari. Aitaque isavicajeitapaaqueri. Irosati ipajitantacaro Sucot.
18 Impoiji yovaanaja aisati. Irosati imontetacotantapaajaro nampitsi Siquem.
19 Aitaque yamantapaaqueriri quipatsi itomipee Hamor iriri Siquem, ipinaventaquero 100 imentaqui quireequi. Aitaque isavicajitapaaqueri,
20 aisati yovetsicaque altar intaanteanariri Tasorentsi virantsi. Ipajitaquero El-Elohe-Israel. (Ocanti aneanequi: Tasorentsi, iriotaque Itasorentsite Israel.)
Aitaque ocantacari yareetantajari Jacobo quipatsiqui Canaán iponeantanajari quipatsiqui Padán-aram. Yareetaja cameetsa, tecatsi oyerine.
