Génesis 34:1-31
34 Ari otimi aparoni irishinto Jacobo opajitari Dina. Itimacaaquerori Lea. Ojataque nampitsiqui Siquem oquivantiro evancarorontepee.
2 Ineantavacarori Siquem, yaashitavacaro yantaquero. Iriotaque itomi Hamor yora heveo, savicacantatsiri nampitsiqui.
3 Oshequi inintasanotaquero, icoacaaquero onintanaqueri iriori.
4 Irosati iquenquetsatacantacari iriri. Icantiri:
—Apa, pijatacayena iriqui tsinane pincantacoventena. Nocoaque nayero.
5 Ari iquemacotaqueri Jacobo yantitaqueri Siquem irishinto, iro cantaincha tecatsi incante. Yoyeajeitajiritsita itomipee impocajeitaje, ijajeiti anta yamenajeitiri ivirapee.
6 Ijatacantacariri Hamor itomi inquenquetsatacayeri Jacobo. Ainiroquera iquenquetsatacairi, irosati yareejeitantapaaja iriori itomipee. Ari iquemapaaquero oca avisaintsiri, iquisasanotapaaca. Te oncameetsatimoteriji catsini oca yantacaaquerori iritsiro.
7 -
8 Ari iquenquetsatacaajeivetacari iriori, icantiri:
—Yoca notomi oshequi icoasanotaquero pitsiro. Meeca nocoaque pishineteri irayerota.
9 Nocoaque ashanincatavacaajeitea. Naajeitero pishanincapee aisati avirori, paajeitero noshanincapee narori.
10 Pisaviquimojeitena aca. Jero oca quipatsi pisavicantajeiteari. Aisati ocameetsati pimpimantajeite aca nonampiquica aisati ocameetsati pamanantajeite quipatsi.
11 Impoiji yora Siquem icantiri iri Dina jeri ojariripee:
—Nocoaque onimojeitempi pimpacayenaro. Ari nompashitaquempi paitarica pincoacotaquenari, omavetaquea pincoacotasanotaquenarica oshequi, ari nomataquero nompaquempi. Iro cantaincha pishinetero nayerota.
12 -
Itoyeantashijeitaca siquemisati
13 Ari yacajeitanaqueri itomipee Jacobo. Icantashijeitacari:
—Eiro nomajeitirotsi nompacayempiro tsio, pinashita avirori; te pintoyeanteaji. Oshequi poashiventajeitena.
14 -
15 Picoaquerica nompacayempiro, ocameetsati pinquempejeitajena narori, pintoyeantajeitajea avirori. Eirorica pitoyeantajeitatsi, eiro nopimpirotsi. Aisati inquempejeitajea iriori maaroni pishanincapee.
16 Impoijiquea ashanincatavacaajeitea, paajeitero noshanincapee narori aisati naajeitero pishanincapee avirori. Impoijiquea nosaviquimojeitempi, ancaratavacaajeitea maaroni.
17 Irompa teerica onimotempiji nocantajeitaquempiri pintoyeantajeitea, ari novaajeitanajea jaocarica, naanajero tsio.
18 Ari onimotaqueri Hamor aisati itomi icantajeitaqueriri.
19 Ipiantanajari, te iroisamaninqueroji intsipaite itoyeantajeitaca; tempa icoasanotaquero irayero irishinto Jacobo. Yora Siquem oshequi ipincatsatiri ishanincapee iriri. Irosati ijatantaca jeri iriri anta iqueapiniyeetironta nampitsi ipimantapiniyeetinta ovararontsipee. Icantiri savicajeitatsiri:
20 -
21 —Yonta shiramparipee yaacameetsajeitajee, irisaviquimojeitee aca; tempa antearoite oni aipatsite. Ocameetsati iramanantayete aca anampiqui. Impoijiquea cameetsa aajeititeri irishintopee aisati iriori iraitajeiteero ashintopee.
22 Icoajeitaque meeca irisaviquimojeitee iriori. Iro cantaincha ancarajeitanteariri, timatsi icoacaajeitaqueeri anteri. Ocameetsati antoyeantajeitea maaroni, anquempejeitanteariri iriori.
23 Yora ivirapee aisati maaroni timimojeitiri, iriotaque ashijei maaroni. Tsame meeca ancantajeite: ‘Jee, cameetsataque.’ Impoijiquea irisaviquimojeitee.
24 Ari onimojeitanaqueri maaroni shiramparipee savicajeitatsiri nampitsiqui. Irosati itoyeantajeitantanaca maaroni.
Yoajeitaqueri itomipee Jacobo siquemisatipee
25 Ari ocarataque mava quitaiteri, ainiroquera ocatsijeitaqueri, irosati ijatantanaca Simeón jeri Leví, yora ojariripee Dina, inampiqui. Yoajeitapaaqueri maaroni shiramparipee, tecatsi incantajeitanaquea impiajeitavaqueari iriori.
26 Aisati yoaqueri Hamor jeri itomi, irosati yaantanajaro iritsiro ivancoqui, ijajeitanaji.
27 Impoiji ijajeitanaque iriori itsipapee irirenti, iquisacoventajeitacaro iritsiro.
28 Yaajeitanaqueri irovishatepee, ivacatepee, ishaashinotepee timavetachari inampiqui aisati pashitomashiqui,
29 aisati maaroni irovararoni timimojeitiriniri. Impoiji yaajeitanaquero tsinanepee jeri jananequipee caari yoajeiti.
30 Impoiji yora Jacobo icantavaqueri itomipee Simeón jeri Leví:
—Avirojeitaque pomerentsitacantenane, meeca inquisajeitee canaaneopee jeri ferezeopee, irampatojeitea iromanajeitena. Tempa te ashequiajeiteji, aitaque iroajeitaquee maaroni.
31 Icantanaqueri iriori:
—¡Ocameetsatimpa yantashititayeetenaro tsio, iquempetacantaquero iroorica antashiyetariri shiramparipee!
