Génesis 37:1-36
37 Irosati isavicaque Jacobo quipatsiqui Canaán, isavicacairini peerani iririni. Jero icantacotari iriori itomipee. Evancariquera ini JosÉ, ocarataque 17 irosarentsite, ari icarajeitiri irirentipee yora otomipee Bilhá aisati Zilpá, yamenajeitiniri irovishatepee iriri. Yora JosÉ icamantapinitiri iriri yantayetaqueri caari cameetsatatsi irirentipee.
2 -
3 Yora Israel, ipajita aisati Jacobo, inintajeivetacari itsipapee itomi. Iro cantaincha inintasanotaqueri irinti JosÉ. Iro inintasanotantacariri, anteashipatanaque ini itimantacari iriori. Irotaque yovetsicantacanariri iitsaare cameetsamaotasanotatsiri iquitsaataqueri.
4 Ari iotanaque irirentipee yanaacojeitaqueri inintasanotiri irinti iriri. Irosati iquisajeitantacari, te irovetsatimateariji.
5 Aparo tsiteniriqui imishitaca JosÉ. Impoiji oquitaiteamanaque icamantajeitaqueri irirentipee oca imishitacari. Aiquero ijatatii iquishimentasanotanaqueri.
6 Icantiri:
—Pinquemajeite, nocoaque noncamantajeitempiro nomishitacari.
7 Noneaca atimajeitaque tiricomashiqui apesacojeitaquero, aaquero aisopatijeitaquero. Ora nashi oatiaca nianqui. Iro pashipee avirori oshoncajeitacaro nashi, oivotashijeitacaro opincatsajeitaquero.
8 Iquemajeitantacarori oca icamantaqueriri, icantajeitanaqueri:
—¿Picoaquempa pimpincatsariventena? ¡Pijitacantimpa ari nompincatsajeitaquempi!
Ari iquisanentimentasanojeitanaqueri imishitacari. Yaamaajeitanacari ishemetashitaca, icoaque iranaacojeiteri iriori.
9 Impoiji imishitaja aisati. Ari icamantajeitajiri aisati irirentipee, icantiri:
—Pinquemajeitena nomishitajayea aisati. Noneaqueri catsirincaiteri aisati cashiri jeri iriori impoquiropee icarajeiti 11, ipincatsajeitaquena maaroni.
10 Iquemantacariri iriri icamantaqueriri irirentipee, irosati ishintsitsatantanacari. Icantiri:
—Notomi, ¡paita oshiacaaventiri ora pimishitacari! ¡Pijitacantanampa narori jero piniro aisati pirentipee ari nompincatsajeitaquempi!
11 Yora irirentipee aiquero iquisasanotanaqueriri. Irintiquea iriri oshequi iquenqueshireaquero oca imishitacari itomi.
Yora irirentipee ipimantaqueri JosÉ
12 Ari aparo quitaiteri yora irirentipee JosÉ yaajeitanaqueri ivirapee iriri yoacaajeitari paashito anta nampitsiqui Siquem.
13 Ari avisanaque aparopee quitaiteri icantiri Israel JosÉ:
—Pamene notomi, yora pirentipee ijajeitaque nampitsiqui Siquem yoacaajeitari ovishapee paashito. Nocoaque pijate pamenajateri.
Ari icanti JosÉ:
—Jee, aitaque nojataque.
14 Icantiri iriri:
—Jee, cameetsataque. Pijate pamenajanteri pirentipee aisati ovishapee, impoiji pimpiaje pincamantapaajena jaoca icantajeitari.
Ari itiancaqueri Israel itomi, iponeanaca oirincaiteacotapai nampitsi Hebrón irosati yareetantacaro nampitsi Siquem.
15 Yareetantapaacarori, itimpinaacaque nianqui avotsi. Ari ineaqueri aparoni shirampari, isampitiri:
—¿Paita picoayetiri aca?
16 Yacanaqueri JosÉ:
—Nocoayevetajari iyepee. Nocoi pincamantena jaoca yoacaajeitariri ovishapee paashito.
17 Icantanaqueri:
—Jajeitaji ini. Noquemaqueri icantajeiti: ‘Tsame ajataje anta nampitsiqui Dotán.’
Irosati ijatantaca anta icoajeitajiri. Aitaque ineajeitapaajiriri.
18 Ari ineajeitavaqueri areejitatsiquera, iquenquetsacaavacaajeitaca jaoca incanteari iroanteariri.
19 Icantavacaajeitanaca:
—¡Pamenerite yonta mishiveetachari, coraquenirotaque ini!
20 Tsame avavaquerita, impoiji anteteri anta omoronaqui. Impoiji ancantajeitapeeri apa: ‘Yatsicaqueri covencatatsiri.’ ¡Amenavaquerita jaoca oncantanaqueari imishitapinitari!
21 Iquemantacarori RubÉn icantajeitaqueri irirentipee, te onimoteriji. Te incoyeji irinti iroyeri. Irointi icoaque irintacoteari, impoiji intiancajeri iririqui. Irotaque icantantavetacariri:
—Eirove airitsi arenti, aisati eiro aposhiritsi. Irointiquea pinteteri ara omoroqui caaraiteriqui.
22 -
23 Ari iquempejitantapaacariri JosÉ irirentipee, irosati yajiricantavacari isapoquitavaqueri iitsaare. Irosati itetantacari omoronaqui pirijatatsiri. Ari ijatanaque RubÉn irameneacoventeri irovishate.
24 -
25 Impoiji isavicajeitanaque irirentipee yoajeitaca. Irosati ineajeitantavacari ipocajeitaque ishanincapee Ismael iponeajeitaca Galaad. Iquijacojeitapaacari iyameyotepee irijajeite anta Egiptoqui impimantayete. Yamajeitaque oshequi casancajayetatsiri icanteetiri bálsamo jero mirra.
26 Ari icantajeitiri Judá irirentipee:
—Eirovee airitsi JosÉ. Tsame ampimantavaquerita irointi, iraanaquerita Egiptoqui yonta pocajeitaintsiri. Paitampa aantajeari avaqueririca, irointi amanaiteroni. Tempa ari ompomerentsitimotanaque, aisati tempa iriotaque arentisanori.
Ari onimojeitaqueri maaroni irirentipee icantaqueriri.
27 -
28 Ari iquempejijeitapaaque yora pimantajeitatsiri. Icarajeitaqueri ishanincapee Madián. Irosati yaantaitari JosÉ ipimantavaqueri. Yora amanantaqueriri ipinaventanaqueri 20 imentaqui quireequi. Irosati yaantanacari anta Egiptoqui.
29 Impoiji ipocavetapaaja iriori RubÉn. Ijatashivetapaajari omoronaqui yamenavetapaajari intiancantajearimeri iririqui. Iro cantaincha te irineapaajeriji. Ari yoashiretacotasanotapaacari catsini, itsereanaquero iitsaare.
30 Impoiji ipiapaajaro isavicajeitaquenta irirentipee. Icantapaaqueri:
—Teeve aneajeriji arenti. ¡Jaocaquea noncanteari meeca narori!
31 Ari icamantaqueri yantaqueri. Impoiji yaajeitaque aparoni chiivo, yoaqueri. Ipantayetaquero iriraja iitsaareni JosÉ.
32 Irosati itiancacantantajanari iriri. Icantavaqueri aanajirori: “Pincantapeeri apa: ‘Noneajeitaquero oca quitsaarentsi anta. ¿Iroorica irashi pitomi, caariricampa?’ ”
33 Yareetantacari, yonijaapaaqueri. Ari iotavajiro Jacobo. Icantanaqueri: “¡Irotaque iitsaare notomi! ¡Paitaquea oaqueriri! Naamaaca yatsicaqueri covencatatsiri.”
34 Ari yoashiretacotasanotanacari, itsereanaquero iitsaare. Iquitsaatacaro otsipa yoashiretantari. Icantani iraacotasanotaqueri itomini.
35 Yora itomipee aisati irishintopee icoajeiveta iroimoshirencajerime. Iro cantaincha te incoyeji. Aiquero catsini iraacotasanotanaqueri. Icanti: “Noncanteani niraacoteri notomi, irosati noncamantaquea.”
36 Ari yareejeitaca aanaqueriri JosÉ Egiptoqui, ipimantaqueri. Ipapaaqueri atiri pajitachari Potifar, yora amitacotiriri faraón, pincatsaritatsiri Egiptoqui, aisati iriotaque jivatacairiri manajeitachari shentiriri.
