Génesis 41:1-57
41 Ari avisanaque apite osarentsi. Aparo tsiteniri imishitaca pincatsari. Ineaca icatiaca otsapijaqui antearoja nija pajitachari Nilo.
2 Ineaqueri vacapee vatsanti cameetsatasanotatsiri icontejatapaaque nijaqui, icarati 7. Icatiajeitapaaca otsapijaqui yoapaacaro shiocayetatsiri.
3 Impoiji icontejatapaaque pashinipee aisati icarati iriori 7. Te incameetsateji irinti, matsajeitaque ini. Aisati icatiajeitapaaca iriori otsapijaqui, iquempejijeitapaacari itsipapee vatsanti.
4 Impoiji yora matsayetatsiri yoajeitacari vatsantipee, itsoncajeitaqueri maaroni.
Ari itinaaveita pincatsari, iquenqueshireaquero oca imishitacari.
5 Ari imaanaji, impoiji imishitaja aisati. Ineaquero aparoni ominca tirico cameetsatasanotatsiri. Ocarati 7 opaqui oshequi catsini oitsoquipee.
6 Impoiji oshiocanaque pashini aisati ocarataque iroori 7 opaqui. Iro cantaincha pirijapaquiitaque irointi, otaaquero catsirincajencatatsiri tampea quenapaatsiri isotoapiniti catsirincaiteri.
7 Ora pirijapaquijeitatsiri oajeitacaro cameetsatasanotatsiri, otsoncaquero maaroni.
Ari itinaanaja aisati, iotanaque irointi imishiro.
8 Ari oquitaiteamanaque oshequi iquenqueshireasanotaquero oca imishitacari aisati itsaroanaque. Irosati icajemacantajeitantavetacari ishanincapee iotasanoyevetarori mishirentsipee aisati iotashiyevetarori avisayetatsineri coajica. Icamantajeivetacari ora imishitacari, iro cantaincha te irimajeiteroji iriotacojeitero oshiacaaventiri.
9 Impoiji yora jivatacairiri papinitiriri pincatsari irapinitiri icantiri:
—¡Novincatsarite, timatsi nopeacotacari, meeca noquenqueshireapaajiro!
10 Peerani piquisantaquenari jeri aisati yora jivatacaajeitiriniri vetsicapinitirori pitantane. Poiminqueacantajeitantaquenari caravosoqui.
11 Aparo tsiteniriqui imishitaca, aisati narori nomishitaca. Otimaque aparopee oshiacaaventayetiri nomishijeitacari.
12 Aisati ainiro aparoni evancari hebreotatsiri nocarataqueri. Iriotaque iroveranaro jivatacairiri amenajeitiriri poiminqueacantayetiri. Nocamantajeitaqueri nomishijeitacari, impoiji icamantasanojeitaquenaro oshiacaaventayetiri.
13 Ari omoncarataca maaroni icamantajeitaquenari. Meeca aisatitapaajana nopapinitajimpiro pirapinitiri. Irintiquea yora pashini, pitsatacantaqueri icamantacari.
Icamantaqueri JosÉ pincatsari oshiacaaventiri imishitacari
14 Iquemantacarori oca icamantaqueriri, irosati icajemacantantacari intsipaite JosÉ yoimisoquijacantajiri caravosoqui. Ari yameetacantanaquero iishi aisati iquitsaatanaca pashini iitsaare cameetsamaotatsiri. Irosati ijatashitantacari pincatsari.
15 Ineantavacariri, icantavaqueri:
—Timatsi nomishitacari. Aca meeca te aneeriji camantenaroneri paita oshiacaaventayetiri. Iro cantaincha noquemacotaquempi aviro iotirori oshiacaaventiri mishiveerentsi.
16 Icantanaqueri iriori:
—Novincatsarite, te naro iotashitearone apaniro. Timatsi Tasorentsi, iriotaque iotacantayetirori irinti oshiacaaventayetiri mishiveerentsi.
17 Ari icamantaqueri pincatsari JosÉ:
—Jero oca nomishitacari: Noneaca nocatiaca otsapijaqui nija Nilo.
18 Noneaqueri icontejatapaaque vacapee vatsanti cameetsatasanojeitatsiri icarati 7. Yoapaacaro shiocayetatsiri otsapijaqui nija.
19 Impoiji icontejatapaaque pashinipee aisati icarajeiti iriori 7. Irintiquea te incameetsajeiteji catsini, matsayeitaque ini. Tecatsi noneimate aca Egiptoqui vacapee quempetearineri yora nomishitacari caari cameetsajeitatsi.
20 Impoiji yora matsayetatsiri yoajeitapaacari yora vatsantipee caratatsiri 7; itsoncajeitaqueri maaroni.
21 Iro cantaincha yoasanovetaca, irosati icantajeita imatsayetaque catsini iquempetani.
“Irosati notinantavetaita.
22 Ari nomaanaji, impoiji nomishitaja aisati. Noneaquero aparoni ominca tirico cameetsatasanotatsiri, ocarati 7 opaqui, oshequi catsini oitsoquipee.
23 Impoiji oshiocanaque pashini, aisati ocarataque iroori 7 opaqui. Iro cantaincha irointi te oncameetsateji, pirijapaquiitaque oni. Otaaquero catsirincajencatatsiri tampea quenapaatsiri isotoapiniti catsirincaiteri.
24 Ora pirijapaquitatsiri oajeitacaro cameetsatasanotatsiri; otsoncaquero maaroni. Nocamantajeivetacari iotasanojeivetachari, iro cantaincha te iriotimateroji catsini oshiacaaventayetiri.”
25 Ari icantiri JosÉ:
—Novincatsarite, omoncaratavacaaca oca apite pimishitacari. Icamantitaquempi Tasorentsi timatsi iranteri coajica.
26 Yora pineaqueri vacapee vatsanti cameetsatasanotatsiri carajeitatsiri 7, aisati oquempetaca ora pineaqueri caratatsiri 7 opaqui tirico cameetsatasanotatsiri, oshiacaaventa 7 osarentsipee ontimasanotanteari panquirentsi.
27 Aisati iquempetaca yora vacapee pineaqueri caratatsiri 7 matsatasanoyetatsiri catsini, aisati ora pineaqueri 7 opaqui tirico caari cameetsatatsanotatsi catsini, pirijapaquitasanotatsiri otaaqueri catsirincajencatatsiri tampea, oshiacaaventiro 7 osarentsipee eiro otimantajatsi panquirentsipee.
28 Irotaque nocantaquempiri. Icamantasanotaquempiro Tasorentsi iranteri.
29 Oncarataque 7 osarentsipee, ontimasanoyetanaque catsini panquirentsipee aca Egiptoqui.
30 Impoijiquea ompocapaaque iroori 7 osarentsipee ontashentsiiteasanotantanaqueari catsini. Eiro otimanajitsi catsini iroajeitanajeari maaroni atiripee savicajeitatsiri. Tecatsi quenqueshireajerone otimasanovetanaca panquirentsipee peerani.
31 Ontashentsiiteasanotanaque catsini, eiro otimanajitsi capichaji oquempetani otimasanotini.
32 Novincatsarite, oca apitetatsiri pimishitacari, iotacaasanotaquempiro Tasorentsi iranteri; eiro osamanititsi irimatantearori. Irotaque imishitacantaquempiri apite.
33 “Irotaque ocameetsatantari pincoyee aparoni shirampari quenqueshireasanotachari timatsiri iotantari, incantanteariri maaroni atiripee paitapeerica irantajeiteri.
34 Aisati pincoyee pashinipee jivatacantajeitatsineri anta nampitsipeequi. Ariorica ontimasanotanaque oitsoqui panquirentsipee, irimoncarayetero 5, ocameetsati aparoni impaqueri quempoyeeroneri inquempoyeacantantearori cameetsa. Iro pashinipee 4 irotaque iroajeiteari.
35 Pincantajeiteri irampatoajeiterota ora panquirentsipee impantajeiteariri maaroni atiripee iroajeiteari.
36 Irotaque iroajeitanaqueari atiripee coajicani ariorica ontashentsiiteanaque, eiroquea icamajeitantatsi.”
Ipeaqueri faraón JosÉ jivatacantatsiri Egiptoqui
37 Ari ineacameetsataquero pincatsari icamantaqueriri JosÉ aisati maaroni iriori amitacojeitiriri.
38 Impoiji icantiri pincatsari amitacojeitiriri:
—¡Te aneeriji shirampari iotasanotatsiri otimantashiretari Ishire Tasorentsi, quempetariri yoca!
39 Irosati icantantacari JosÉ:
—Tecatsi anaacotempine piquenqueshiretasanoti aisati otimimotimpi iotantsi. Iotacaasanotaquempiro Tasorentsi oca picamantaquenari.
40 Meeca nocoacaaquempi aviro jivatacaajeiterineri maaroni noshanincapee aca nampitsiqui nopincatsariventajeitiri. Pincantajeiteri paitarica irantayeteri. Impincatsajeitempi, inquemisantajeitero maaroni pincantajeiteriri. Naroquea pimpincatsate apaniro; tempa narotaque pincatsarisanori.
41 Meeca nopeaquempi aviro jivatacaajeiterineri maaroni savicajeitatsiri aca Egiptoqui.
42 Irosati yaantacari iraniiyote iracotsapaquiniri otimantari iseeyote ipincatsaritantari, isatecaqueneri iracotsapaquiqui JosÉ. Aisati iquitsaatacantaqueri cameetsamaotasanotatsiri iitsaare pincatsari. Aisati inenquetacantaqueri oro itsanoqui.
43 Impoiji itetacantaqueri shiacomentotsiqui oijatapairori ishiacomento pincatsari, iquenanaque nianqui nampitsi. Yora jivatanaqueriri JosÉ icantajeitiri maaroni ishanincapee shintsijenca: “¡Pimpincatsatavaqueri, pintiyeroashitavaqueari maaroni!” Aitaque icantacari JosÉ ipincatsariventajeitaqueri maaroni egiptosatipee.
44 Jero aisati icantaqueriri:
—Narotaque pincatsarisanori. Nocantasanotimpi meeca: aviro cantacantajeiterine maaroni atiripee paitarica irantajeiteri.
45 Irosati ipajitantacari JosÉ Safenat-panÉah. Aisati yaacaaqueri ijina, opajita Asenat. Irotaque irishinto Potifera, antaveetiniriri ijitasorensitiri anta nampitsiqui pajitachari On. Aitaque icantacari JosÉ ipincatsariventajeitaqueri maaroni egiptosatipee.
46 Ari ocarataque 30 irosarentsite JosÉ, yayeetantanacariri anta pincatsariqui.
Irosati isoquijantanaca ivancoqui pincatsari iquenayetanaque, itsoteaquero maaroni nampitsipee Egiptoquiniri.
47 Ari omoncaratapaaca 7 osarentsipee otimasanotantanacari catsini panquirentsipee.
48 Imataquero JosÉ yaarantacantayetaquero. Aisati yapatotacantayetaquero tirico yaanaquero nampitsipeequi quempejiniri, iquempoyeacantasanoyetaquero.
49 Yapatotacantasanotaquero oshequi catsini tirico, oquempetacaro impanequi. Te irimateroji iriotero jaocarica ocarati; tempa oshequi catsini.
50 Tequerata areeteaji tashentsi, ari itimacaaquero ijina JosÉ apite itomi.
51 Ipajitaqueri jivatatsiri itimi ManasÉs; tempa icanti: “Ipeacotacaaquenaro Tasorentsi nashinoncaavetaca aisati iriori noshanincapee.”
52 Yora itsipa ipajitaqueri Efraín; tempa icanti: “Ishinetaquena Tasorentsi itimaque notomipee aca nampitsiqui nashinoncaavetacaca.”
53 Ari avisanaque 7 osarentsipee otimasanotantanacari oshequi panquirentsi Egiptoqui.
54 Irosati intantanaca otashentsiiteanaque caratatsineri 7 osarentsi. Omoncarataca icantitacariri JosÉ pincatsari peerani. Oshequi itasheajeitanaque atiripee anta pashinipeequi nampitsi. Ainti otimanaque Egiptoqui oanarontsi.
55 Yora savicajeitatsiri Egiptoqui ijatashijeitaqueri pincatsari yamanajeivetapaacari tirico. Iro cantaincha icantajeitavaqueri: “Irio pijatashijeite JosÉ, pinquemisanteri paitarica incantajeitavaquempiri.”
56 Otashentsiiteantanacari maaroni Egiptoqui irosati yashitareacantantacaro JosÉ pancotsi iquempoyeacantantacarori tirico, impimantajeitaqueneri egiptosatipee. Tempa aiquero ojatatii otashentsiiteasanotanaque catsini.
57 Tecatsi iraajeitanajero iroajeitanajeari atiripee nampitsipeequiniri. Irotaque ipocajeitantanacari Egiptoqui yamanantajeiti tirico.
