Génesis 42:1-38
42 Ari iquemacotaquero Israel timatsi oshequi oanarontsi anta Egiptoqui. Icantiri itomipee: “¿Paita pisavicashijeitantacari pamenavacaashijeitaca?
2 Icamanteetaquena timatsi tirico anta Egiptoqui. Pijate pamanantajeitaite avajeiteari, eiroquea acamajeitantatsi.”
3 Irosati ijajeitantanaca itomipee icarajeitanaque 10 iramanantajeite tirico.
4 Irintiquea yora Benjamín, irirentisanori JosÉ, te irishineteriji iriri irijate. Yaamaacari impeaquea iriori iquempetaca ipeaca JosÉ peerani.
5 Ijajeitantacari icarajeitanaqueri itsipapee savicajeitatsiri quipatsiqui Canaán; tempa otashentsiiteasanojeitaque maaroni.
6 Yora JosÉ iriotaque jivatacantatsiri Egiptoqui. Iriotaque pimantaniriri atiripee tirico yora poneayetachari pashinipeequi nampitsi. Yareejeitantapaacari irirentipee, ipincatsajeitapaaqueri yoivotashijeitapaacari irosati quipatsiqui.
7 Ineantavacariri JosÉ irirentipee, iotavajiri. Iro cantaincha iquisatsatavaqueri irineanequi egiptosati. Iquempetacantashitaca teerica irioteriji. Icantairi:
—¡Avirojei! ¿Jaoca piponeajeitari?
Yacajeitanaqueri:
—Noponeajeita quipatsiqui Canaán. Nopocajeiti aca namanantajeite tirico.
8 Iotavajiri irinti JosÉ irirentipee, irintiquea te iriojeitapaajeriji.
9 Impoiji iquenqueshireanajiro JosÉ imishitacotacariri peerani. Icantajiri aisati:
—¡Avirojei amenanontanari! Pipocajeiti piotanteari teerica naamaventajeiteaji.
10 Ari icantajeitanaqueri:
—¡Teeve, novincatsarite! Iro nopocajeitantacari namanantajeite narori tirico.
11 Yoca nocarajeitaquerica iriojeitaque iyepee, itomipee apa. Naro ashanincapee cameetsajeitatsiri, queario caarina amenanontajeitempineri.
12 Icantasanotiri:
—¡Teeve, pitseeyani! Queario pipocajeiti pamenanontana piotanteari teerica naamaventajeiteaji.
13 Icantajeitanajiri:
—Queario nocantajeitaquempi. Narojeitaque iyepee, nocarajeitini 12. Iro cantaincha aparoni peaincha, te aneajeriji. Nosavicajeiti meeca quipatsiqui Canaán. Apaniro ini apa. Aisati timatsi iye impoitatsiri itimi, iriotaque meeca itsipatari.
14 Iro cantaincha icantanajiri aisati:
—¡Tempa nocantaquempi, avirojeitaque amenanontajeitanari!
15 Meeca noneantajempi queariorica oca picantajeitaqueri. Eiro noshinetajimpitsi pimpiajeitanaje, irosati impocanteari pirenti impoitatsiri itimi. Eirorica pimoncaratirotsi nocantaquempiri, ario iroashinoncaaquempi pincatsari.
16 Nocoaque meeca aparoni picarajeitica jatatsineri iraiteri. Irintiquea itsipapee noiminqueacantajeri caravosoqui. Nocoaque niotasanote queariorica picantajeitaquena. Irompa teerica, ari niotanaquempi avirojei amenanontajeitanari. ¡Eirorica pimoncaratirotsi nocantaquempiri, ario iroashinoncaaquempi pincatsari!
17 Irosati yoiminqueacantantacari caravosoqui maaroni irirentipee ocarataque mava quitaiteri.
18 Iro mavatapaatsiri quitaiteri, icantiri:
—Oshequi nopincatsatiri Tasorentsi. Pimoncaratero meeca nocantaquempiri, impoijiquea eiro noacantimpitsi.
19 Avirotasanojeitaquerica ashanincapee cameetsari, meeca pojocanaquerita aparoni pirenti caravosoqui. Avintiquea jajeitajantsine paajeitanaque tirico iroajeiteari maaroni pishanincapee.
20 Iro cantaincha pamaquenari pirenti impoitatsiri itimi, niotasanotanteari queariorica picantaque. Irompa teerica, ari noacantempi maaroni.
Ari icantajeitanaqueri:
—Jee, aitaque nomoncarajeitaquero.
21 Ari icantavacaajeitanaca irineanequi iriori:
—Queariotasanotaque, te oncameetsateji oca antajeitaqueri peerani apimantaqueri arenti. Te anquemisanteriji icantasanovetaquee: ‘Eiro pipimantanatsi, pintacotena.’ Aneajeivetacari oshequi yashinoncaanaca. Iro cantaincha te ancavintsayeriji. Meeca irotaque opomerentsitimotantaqueeri arori.
22 Ari yacanaqueri iriori RubÉn:
—Tempa nocantajeivetaquempi: ‘Eiro poashinoncairitsi arenti.’ Iro cantaincha te pinquemisantenaji. Irotaque meeca iroashinoncaimentajeitanteeriri Tasorentsi.
23 Iro cantaincha te iriojeiteji iquematsataquero JosÉ icantavacaajeitacari. Tempa iro iquenquetsatacantacariri incaaranqui irineanequi egiptosati, timatsi pashini ovaqueneriri irineanequi iriori irirentipee.
24 Iquemantacarori JosÉ icantavacaajeitacari irirentipee, oshequi ocantimonentanacari. Ijatanaque nijanteaji iraapaaca. Impoiji ipiashitapaajari isavicajeitaquenta iquenquetsatacaajeitapaaqueri. Irosati yoisotacantantacari Simeón, yoiminqueacantaqueri. Ineacojeitaqueri itsipapee irirenti.
25 Impoiji icantaqueri inampirepee: “Pijaayeteneri tirico iyoshitaaritepeequi. Aisati pinteyetajeneri iireequite. Impoiji pimpavajeri iroajeitanajeari avotsiqui.” Ari imajeitaquero maaroni.
26 Impoiji yoanquejeitaqueneri iraashinotepeequi tirico, irosati ijajeitantanaja.
27 Ari nianqui avotsi irimaajeitanajenta. Yaaquero aparoni iyoshitaarite, yoisoreaquero impanteariri iraashinote iroyeari. Irosati ineantajari iireequite itetavajiniriri.
28 Ari icantiri irirentipee:
—¡Pamenerite noireequiteca, yoipiavajanari jerica noyoshitaaritequi!
Ineajeitantacariri, itsaroasanojeitanaque catsini. Icantavacaajeitanaca:
—¡Paita yantaqueeri Tasorentsi!
29 Yareejeitantapaajari quipatsiqui Canaán, icamantajeitapaaqueri iriri maaroni avishimojeitaqueriri anta Egiptoqui. Icantiri:
30 —Yora shirampari jivatacantatsiri Egiptoqui, iquisatsatavaquena. Icantavaquena: ‘Avirojei amenanontatsiri.’
31 Iro cantaincha nocantajeitanaqueri narori: ‘Caarina amenanontajeitimpiri; narojei ashaninca cameetsari.
32 Nocarajeitini 12 iyepee. Apaniro ini apa. Iro cantaincha aparo peaincha te aneajeriji. Irintiquea impoitatsiri itimi, ainiro icaratiri apa anta nonampiqui.’
33 “Impoiji icantanaquena: ‘Meeca noneantajeitempi niotanteari queariorica picantajeiti: Narojei cameetsari ashanincapee. Meeca pojocanaqueri aparoni pirenti. Avintiquea jajeitajantsine paajeitanaque tirico iroajeitavaqueari pishanincapee.’
34 “Aisati icantavaquena: ‘Ariorica pimpiajante, pamaquenariyea pirenti impoitatsiri itimi. Ariorica pamajeitaquenari, impoiji niojeitanaquempi queario avirojei ashanincapee cameetsari, caarimpi amenanontantatsiri. Irosati noimisoquijacantantajeari caravosoqui pashini pirenti. Impoijiquea cameetsa pimpocapinijeite aca nampitsiqui pamanantapinijeite tirico.’ ”
35 Impoiji yashireacojeitapaaquero tirico iyoshitaaritepeequi. Irosati ineajeitantajari iireequitepee yoantayetaririqui, yoipiajeitavajiniriri. Ineajeitantajariri, itsaroasanojeitanaque catsini, aisati iquempetanaca iriori iriri itsaroanaque.
36 Impoiji icantiri Israel itomipee:
—Avirojei picoaque intsoncajeitea notomipee, impeajeitea. Peerani ipeaca JosÉ, meeca ipeaja iriori Simeón. ¡Meeca picoajeitaque paanajeri aisati Benjamín impeantajeari iriori! ¡Oshequi opomerentsitimotasanotaquena oca avishimotaquenari!
37 Icantanaqueri RubÉn iriri:
—Apa, naronea aanaquerine iye Benjamín aisati narotaque amenerine anta, aisati noimpiajempiri. Irompa eirorica noipiajiritsi, ari poyeri notomipee apitetatsiri.
38 Iro cantaincha icantanajiri iriori:
—Te noncoyeji catsini paanaqueri pirenti anta; tempa peerani icamaque JosÉ, meeca apaniro inaque iriori. Naamaaca paitarica avishimotaquerine nianqui incamaquerica, oshequi noashiretacotanaqueari irosati noncamantaquea narori. Pineavetaquena meeca anteashipatasanotapaaquena.
