Génesis 46:1-34
46 Irosati ijatantanaca Israel icarajeitanaqueri maaroni ishanincapee aisati yaajeitanaqueri ivirapee jero maaroni timimoyetiriri. Yareejeitantapaacari nampitsi Beerseba, ari yoaqueneri virantsipee Tasorentsi iquemisantiniri iririni Isaac.
2 Ari tsiteniriqui iconijatimotaqueri Tasorentsi, icajemaqueri ivajiroqui, icantiri:
—Jacobo.
Yacanaqueri iriori:
—Jaa, ainirona aca.
3 Icantiri:
—Narotaque Tasorentsi iquemisantiri pirini. Eiro pitsaroitsi, ocameetsati pijajeite Egiptoqui.
4 Quiso noanaquempi anta. Aitaque nontasoncacoventajeiteriri pishanincajeitajeari coajicani, irishequiasanojeitantanajeari. Aisati narotaque oimpiajeitajerine coajicani piipatsitequica. Ariorica pincamaque, aisati incaratajempi iriori pitomi JosÉ.
5 Ari iponeajeitanaja nampitsiqui Beerseba yora itomipee itetaqueri shiacomentotsiqui iriri, ijinapee jeri itomipee iriori, itiancacantaqueneriri pincatsari.
6 Ijajeitantanacari Jacobo Egiptoqui, icarajeitanaqueri ishanincasanoripee yaajeitanaqueri vacapee, ovishapee jero maaroni timimojeitaqueriri quipatsiqui Canaán.
7 Aisati yaajeitanaqueri itomipee, irishintopee, icharinepee jero isaropee.
8 Jero oca ivajiro itomipee Israel aisati icharinepee jajeitaintsiri Egiptoqui. Jero ivajiropee itomipee RubÉn, yora jivatatsiri itimi:
9 Hanoc, Falú, Hesrón jeri Carmí.
10 Jero ivajiropee itomipee iriori Simeón:Jemuel, Jamín, óhad, Jaquín, Sóhar jeri aisati Saúl, otomi tsinane canaasato.
11 Jero ivajiropee itomipee iriori Leví:Guersón, Quehat jeri Merari.
12 Jero ivajiropee itomipee iriori Judá:Er, Onán, Sela, Fares jeri ZÉrah. (Yora Er jeri Onán camaque ini anta quipatsiqui Canaán.) Yora Fares itimacaaquero ijina itomipee ipajita Hesrón jeri Hamul.
13 Jero ivajiropee itomipee iriori Isacar:Tola, Puá, Job jeri Simrón.
14 Jero ivajiropee itomipee iriori Zabulón:SÉred, Elón jeri Jahleel.
15 Iriojeitaque yoca otomipee Lea, timajeitaintsiri anta Padán-aram. Impoiji aparoni oshinto pajitachari Dina. Iriojeitaque oshanincajeitaniri Lea, icarajeiti 33 yapatoajeitanaca shiramparipee aisati tsinanepee.
16 Jero ivajiropee itomipee iriori Gad:Sefón, Haguí, Esbón, Suní, Erí, Arodí jeri Arelí.
17 Jero ivajiropee itomipee iriori Aser:Imná, Isvá, Isví jeri Beriá. Jero aisati iritsiro opajita SÉrah. Yora Beriá itimacaaquero ijina itomipee iriori; ipajita HÉber jeri Malquiel.
18 Iriojeitaque otomipee iroori Zilpá, ora onampire Lea. Iriojeitaque oshanincajeitaniri Zilpá, icarajeiti 16 yapatoajeitanaca.
19 Jero ivajiropee otomipee iroori Raquel:JosÉ jeri Benjamín.
20 Jero ivajiropee itomi iriori JosÉ itimacaaquerori ijina Asenat:ManasÉs jeri Efraín. Iriotaque timaintsiri anta Egiptoqui. Ora Asenat irotaque irishinto Potifera antaveetiniriri ijitasorentsite anta nampitsiqui On.
21 Jero ivajiropee itomipee iriori Benjamín:Bela, BÉquer, Asbel, Guerá, Naamán, Ehí, Ros, Mupim, Hupim jeri Ard.
22 Iriojeitaque oshanincajeitaniri Raquel jeri Jacobo, icarajeiti 14 yapatoajeitanaca.
23 Jero ivajiro itomi iriori Dan:Husim.
24 Jero ivajiropee itomipee iriori Neftalí:Jahseel, Guní, Jezer jeri Silem.
25 Iriojeitaque otomipee iroori Bilhá, ora onampire Raquel. Icarajeiti 7 yapatoajeitanaca.
26 Iriojeitaque yoca ishanincasanori Jacobo jajeitaintsiri Egiptoqui, icarajeiti 66 shiramparipee. Oshequi onaveta ijinapee aisati itomipee iriori, iro cantaincha te irimoncarajeiteroji.
27 Jeri itomipee iriori JosÉ caratatsiri apite, timaintsiri anta Egiptoqui. Yapatoajeitanaca maaroni ishanincasanori Jacobo icarajeiti 70, areejeitainchari Egiptoqui.
28 Ari yareejeitantacarori quipatsiqui pajitachari Gosen, itiancaqueri Jacobo itomi, yora Judá, incamanteri JosÉ impocanteari iririqui iraavajeri.
29 Iquemantavacariri JosÉ irirenti, ari icantiri inampire: “Povetsiquenaro shiacomentotsi, nojateta naavajeri apa.” Yareetantapaacari, ineapaajiri iriri; yavitsanotapaajiri aisati iraanaca osamani ishempaqui.
30 Impoiji icantiri Israel itomi JosÉ:
—Notomi, meeca noneapaajimpi aneatsimpiquera. Moncarataca meeca, irosati noncamanteari.
31 Impoiji icantiri JosÉ irirentipee aisati ishanincasanoripee.
—Meeca nojate noncamanteri pincatsari: ‘Areejeitapaaca maaroni noshanincapee savicatsiniri quipatsiqui Canaán. Ipocaji irisaviquimojeitapaajena.
32 Yamajeitaqueri maaroni irovishatepee, ivacatepee aisati maaroni timimojeitiriri. Irotaque yantaveere iriori ivirajeitari.’
33 Aisati icantiri:
—Ariorica incajemacantaquempi pincatsari irisampijeitavaquempirica: ‘¿Paita pantaveejeitiri?’ Pincanteri: ‘Novirajeitari ovishapee. Noquempetajari intacantananiri peerani.’ Impoijiquea incantajeitempi: ‘Pisavicajeitapee quipatsiqui Gosen.’ Yora egiptosati te irishinejeitiri isaviquimojeiteri virayetariri ovishapee.
34 –
