Génesis 50:1-26
50 Yora JosÉ yavitsanotavaqueri iririni, inintavorotavaqueri aisati iraacotasanotavacari.
2 Impoiji icantiri amitacotiriri yora aavintantajeitatsiri: “Povetsiqueri meeca ivatsa apani. Poyeneri casancajari inquisotantanaqueari, eiro ipatsantatsi.” Ari imajeitaquero.
3 Ocarataque 40 quitaiteri yoyeaquero iquisotantanacari ivatsani.
Ari iraacojeitaqueri iriori egiptosatipee ocarataque 70 quitaiteri.
4 Ari icaratanaji iraacojeitarini, irosati ijatashitantacari JosÉ amitacoyetiriri pincatsari. Icantapaaqueri:
—Pineacameetsajeitanarica, nocoaque povaajeiteneri pincatsari oca noncantempiri:
5 ‘Chapinqui tequeratsita incameni apa, icantasanotanaquenari: Ariorica noncamaque, pintijajantena omoroqui novetsicaqueri quipatsiqui Canaán. Nocoi meeca pishinetena nojate nontijajeri apani. Ariorica nontijaiteri, irosati nompiantajea.’
Irosati yovantacanari pincatsari oca icantaqueriri JosÉ.
6 Ari icantavaqueri:
—Jee, pijatequeti pintijajanterita pirini anta, pimoncaratero icantanaquempiri.
7 Irosati ijajeitantaca JosÉ intijajeri iririni anta. Icarajeitanaqueri maaroni amitacojeitiriri pincatsari.
8 Aisati icarajeitanaqueri ishanincasanoripee Jacobo: yora ishanincasanoripee JosÉ aisati ishanincasanoripee irirentipee. Irintiquea jananequipee aisati vacapee jeri ovishapee timajeitanaintsi quipatsiqui Gosen.
9 Oshequi catsini oijajeitanaqueriri JosÉ ishiacojeitanaca shiacomentotsipeequi. Irio itsipapee iquijacojeitanacari cavaayopee.
10 Yareejeitantapaacarori nija Jordán iquenapai catsirincaiteri, otimi quempeji nampitsi pajitachari Goren-ha-atad, yapatotimentajeitapaajari iraacojeitapaajiri aisati Jacoboni. Yora JosÉ iraacotasanotaqueri iririni ocarataque 7 quitaiteri.
11 Ineajeitantacariri savicajeitatsiri quipatsiqui Canaán, icantajeiti: “Pameneri yonta egiptosatipee, yapatotimentajeitari camatsiri iraacotasanojeitari.” Irotaque ipajitantacarori isavicajeitapaaquenta Abel-misraim.
12 Ari imoncarajeitaquero itomipee icantanaqueriri iririni.
13 Yaajeitanajiri anta quipatsiqui Canaán itijajiri. Iro itijajeitantacariri omoro imperita Macpelá, yamanaqueriniri peerani Abrahamani Efrón, yora hitita. Irotaque intijantajeiteari ishanincasanoripee camayetatsiri. Ora quipatsi aisati omoro otimi iquenapai catsirincaiteri, oquempejitaro inampini MamrÉ.
14 Ari itsoncanaquero itijaqueri JosÉ iririni, irosati ipiantanajaro Egiptoqui icarajeitanajiri irirentipee jeri tsipajeitariri.
Itsaroacaajeitacari irirentipee JosÉ
15 Icamantacari Jacoboni yora irirentipee JosÉ iquenqueshirejeitanaca: “Meecaata inquisajeitanaquee JosÉ, impiacoventajea peerani avashinoncaajeitaqueri.”
16 Irosati itiancantajeitaca camanterineri JosÉ, icantapaaqueri:
“Tequeratani incameni apa, icantasanojeitaquena: ‘Pincanteri JosÉ impeacojeitempiro caari cameetsatatsi pantaqueri, poashinoncantacariri peerani pipimantaqueri.’ Irotaque nocantasanojeitantimpiri meeca, pimpeacojeitenaro caari cameetsatatsi nopimantaquempi peerani; tempa narojeitaque quemisantiriri Tasorentsi, iquemisantiri apani.”
Ainiroquera iquenquetsatacairi camantiriri JosÉ, irosati ocantimonentasanotantanacari iraasanotanaca catsini.
17 -
18 Impoiji yareejeitapaaca iriori irirentipee, yoivotashijeitapaacari irosati quipatsiqui, icantajeitapaaqueri:
—Jeraacana, meeca pimpeajeitena piveranaro.
19 Ari icantanaqueri JosÉ.
—Eiro pitsaroacaajeitanatsi. Eiro nomatirotsi nonquempeteari Tasorentsi.
20 Piquenqueshirejeivetaca peerani poashinoncayename, iro cantaincha ipashinitajiro Tasorentsi caari cameetsatatsi imatacaaquenaro cameetsayetatsiri oca pineajeitaqueri meeca; iroavisaacojeitanteariri oshequi atiripee caari icamajeitanta.
21 Irotaque meeca, eiro pitsaroashijeitatsi. Aitaque nompapinijeitaquempi poajeiteari aisati iriori pitomipee.
Irotaque icantavaqueriri JosÉ irirentipee cameetsa, irosati iquimoshirejeitantanaja.
Icamantacari JosÉ
22 Ari icantani isavicaque JosÉ Egiptoqui, icarajeitaqueri maaroni ishanincapee. Ocaratanaque 110 irosarentsite.
23 Aisati ineanaqueri icharinepee, yora itomipee Efraín, aisati ineanaqueri, itomipee iriori Maquir, itomi ManasÉs.
24 Aparo quitaiteri icantajeitiri irirentipee:
—Irotaintsi meeca noncame. Queario iramitacojeitempi Tasorentsi. Iroimpiajeitanajempi coajicani anta quipatsiqui ora icashiacaajeitaqueriniri peerani Abrahamani, Isaacani jeri apani, irisavicajeitanteari ashanincajeitajeari coajicani.
25 Impoiji icantasanojeitaqueri maaroni ishanincapee:
—Queario iramitacojeitempi Tasorentsi. Ariorica omoncaratapaaquea oca, ocameetsati paanajero notonquini pintijapaajero anta. Meeca pincantasanotena ariorica pimajeitaquenaro oca nocantaquempiri.
Ari icantasanojeitanaqueri:
—Jee, aitaque nomajeitaquempiro.
26 Irosati ocaratapaaque 110 irosarentsite JosÉ, ari icamaque anta Egiptoqui. Icamantacari, yovetsiqueetaquero cameetsa ivatsani, yoyeetaqueneri casancajari eiro ipatsantatsi. Aisati iquempoyeetaqueri cajóqui.
