Génesis 6:1-22
6 Yoshequiasanojeitantanacari catsini atiripee, ineajeitaquero quemisantajeitiriri Tasorentsi ocameetsavorojeitaque tsinanepee. Irosati icoyeanontajeitantaca inintacaajeitacari, ijinantajeitacaro.
2 -
3 Iro cantaincha te onimoteriji Tasorentsi oca yantajeitaqueri. Icanti: “Yoca savicajeitatsiri te incameetsajeiteji; tempa atiri ini. Oshequi yantajeitaquero caari cameetsatatsi. Eiro noshinetajiritsi intimaje incanteani. Meeca oncaratavaje 120 osarentsi intimajeitavaje.”
4 Yora aajeitaquerori tsinanepee itimacaajeitaquero itomipee antearitsantsayetatsiri. Iriojeitaque peerani irioperori catsini manajeitachari.
5 Ari ineaquero Tasorentsi oshequi catsini caari cameetsatatsi yantajeitaqueri atiripee. Icantani iquenqueshiretapinijeitaquero irantajeitero caari cameetsatatsi.
6 Oshequi ocantimonentanacari catsini Tasorentsi ineacojeitaqueri oca yantajeitaqueri irovetsicane.
7 Icanti: “Nontsoncajeitajerita maaroni atiri novetsicajeivetacari quipatsiqui aisati maaroni virantsipee, noshicayetachari aisati vanquiyetachari. ¡Oshequi ocantimonentaquena yantajeitaqueri!”
8 Irintiquea ineacameetsataque Tasorentsi NoÉ.
Yovetsicaquero NoÉ antearo pitotsi
9 Jeroca cantacotiriri iriori NoÉ: Yora NoÉ icameetsatasanotaque, icantani iquemisantasanotaqueri Tasorentsi. Te inquempejeiteariji itsipapee, apaniro icanta iquearioventaqueneri icoacairiri.
10 Icarajeitiri NoÉ itomipee: Sem, Cam jeri Jafet.
11 Ineaquero Tasorentsi quipatsi jaaca catsini caari cameetsatatsi aisati oayeritantsi. Maaroni atiripee te incameetsajeitanaje, yoavacaajeitanaca.
12 -
13 Irosati icantantacari Tasorentsi NoÉ: “Nocoaque nontsoncajeitajeri maaroni atiripee. Iriotaque cantacaajeitacarori oshequi catsini yoavacaapinijeitaca. Aitaque nontsoncajeitajeri aisati maaroni novetsicajeitaqueri.
14 Meeca povetsique antearo pitotsi. Pivancotaquero aisati pintantoyetaquero tsompoina. Impoiji pintsineyetaquero tsompoina aisati acaqueroca, eiro oqueajatantatsi nija.
15 Jeroca pincantaquerori: oncarate 135 metro otsantsate. Iroquea otsaranca oncarate 22 metro ari nianqui. Aisati oncarate 13 metro ojenoquite ari nianqui.
16 Aisati poavitaquero oncarate mava; aparo ishaaviji, otsipa nianqui, impoijini jenoqui vecarantapemparoneri. Aisati pimorontaquero otantoqui jenoqui otataroqui ari ishaaviji oncarate nianqui metro, pamenacotanteari. Impoiji povetsique pashitacoro.
17 Coraquetaque nontianquero antearoite incani, ooncanaquea incajaretanaque, anaanaquero maaroni quipatsi. Ontsoncajeiteri maaroni timantajeivetariri, incamajeitanaque.
18 Avintiquea nomoncaratempiro noncantasanotempiri. Aviro queajeitanaintsiri pitotsiqui, pincaratanaqueri pitomipee, pijina aisati paniropee.
19 Aisati pintejeiteri maaroni virantsipee. Incarayetaque apitepee, aparo shirampari, aparo tsinane. Inquempejeitempita paneajeitaje.
20 Aisati pinquempejeitaqueri maaroni itsipapee nashiyetachari: vanquiyetachari, virantsipee jeri noshicayetachari quipatsiqui. Oncanteataquea iraneajeitantajeari iriori.
21 Impoiji pintejeitero maaroni paitapeerica poajeiteari aisati iroajeiteari iriori poshiniripee.”
22 Ari imataquero NoÉ maaroni icantaqueriri Tasorentsi.
