Génesis 9:1-29
9 Irosati itasoncaventantajari Tasorentsi NoÉ aisati itomipee. Icantiri: “Irishequiasanojeitanaje catsini pitomipee, intsoteanajero maaroni quipatsipee intimantajeitanajearo.
2 Maaroni virantsipee, arayetatsiri, aniiyetatsiri aisati nijaasatipee intsaroacaajeitanaquempi; tempa avirotaque pincatsariventajeiterineri.
3 Iriotaque nopajeitaquempiri maaroni poshiniripee aisati maaroni paitapeerica shiocayetatsiri poajeiteari.
4 Iro cantaincha te noncoacayempiji poajeitearo vatsatsi timatsiri iriraja; tempa irotaque oaneiriri iriori.
5 Noshinecoventeri oantayetatsiri, iriorica atiri aisati virantsi; iroyeeteri iriori.
6 “Ariorica iroante atiri,ocameetsati iroyeetajeri iriori.Tempa yora atiri novetsicaqueri,iquempetaquena narori.
7 Nocoaque irishequiasanojeitanaje catsini pitomipee,intsoteajeitanajero intimantajeitanajearo quipatsipee.”
8 Impoiji icantajiri Tasorentsi NoÉ aisati itomipee: “Meeca noncarajeitempi aisati pishanincajeitajeari coajicani.
9 -
10 Aisati nonquempejeiteri maaroni poshinirintsiyetatsiri picarajeitaqueri pavisacojeitaji.
11 Eiro catsini nopashinitirotsi noncantempiri. Eiro napiitajirotsi nooncajero aisati quipatsiqui. Eiro nontsoncajeitajiritsi atiripee aisati maaroni poshiniripee.
12 Jeri meeca savirentsi noaqueri mencoriqui. Incanteani inquenqueshireacaapinitempiro queario nocantaquempi. Pincanteani pineapiniteri ariorica ompariye incani.
13 -
14 Ariorica nomencorijencaiteacayero quipatsiqui, aitaque pineeriri inconijate iriori intapoitempa.
15 Aisati narori nonquenqueshiretapinitero nocarataquempi, eiro napiitajirotsi nooncajero aisati nontsoncajeitajero maaroni.
16 Ariorica intime savirentsi mencoriqui, noncanteani nonquenqueshiretero.
17 Iriotaque iotacaasanojeiterine maaroni atiripee savicajeitatsiri quipatsiqui oca nocantasanotaquempiri aisati iriori maaroni poshiniripee.”
Yantaqueri NoÉ aisati itomipee
18 Jero ivajiro itomipee NoÉ: Sem, Cam, Jafet. Iriotaque sotoaajeitajantsiri pitotsiqui. (Yora Cam iriotaque iriri Canaán.)
19 Yoca mavatatsiri itomipee NoÉ aisati ishanincajeitaniri, iriotaque tsoteanajirori itimayetanaji quipatsipeequi.
20 Yora NoÉ iriotaque panquiveetatsiri, ijivataji ipanquitajiro ovamashi.
21 Aparo quitaiteri ishinquitacaro oja. Te irineacotajeaji isapocaveetanaquero iitsaare, inareatsempequitaca nianqui isavicajeitinta ivancojaniquipeequi yovetsiqueetiri ivitipee chiivo.
22 Yora Cam, iriri Canaán, ineantacariri iriri yojoquitsempequitaca. Ari ijatanaque icamantiri apitetatsiri irirenti.
23 Iquemantavacariri Sem jeri Jafet, irosati ijatantaca yaanaque maatsarantsi impashicantajeariri, ipashicajeitanacaro ishempaqui. Yaniijeitanaque itapiiqui, eiro yamenantaritsi iriri, irosati ipashicantapaajari.
24 Ari ipishinquireantanajari NoÉ, iotacotaqueri itomi Cam yamenaqueri.
25 Ari icantimataqueri. Icanti:“¡Eiro icameetsatitsi Canaán!Iriotaque peranarontsi yoashinoncasanoteri irirentipee.”
26 Icanti aisati:“Icameetsatasanoti Tasorentsi;iriotaque iquemisantiri Sem;irioquea Canaán, iveranaro.
27 Ishineteri Tasorentsi Jafet irishequiajeitanaque,aisati irisaviquimojeiteri Sem;irioquea Canaán, iveranaro.”
28 Ari avisanaque incajaretantacaniri, itimanajitsita NoÉ aisati ocarati 350 osarentsi.
29 Ari omoncaratapaaca 950 irosarentsite, irosati icamantaca.
Jero ivajiro ishanincapeeni NoÉ
(1 Crón. 1.5-23)
