Josué 1:1-18
1 Icamantacari Moiseshini quemisantasanotiriri Tasorentsi, ari iquenquetsatacaaqueri Tasorentsi Josué, itomini Nun, amitacotiriri Moiseshini; icantiri:
2 “Camaque meeca Moiseshini quemisantanari. Meeca nocoacaaquempi aviro jivatacaajeitanajerine pishanincapee, pimonteacaajeitanajeri intatiqueronta nija Jordán. Avirotaque areetacaajeitearine quipatsiqui nocashiacaaquempiri pisavicantajeiteari.
3 Tempa nocantasanotitacari Moiseshini: ‘Nomperi pishanincajeitajeari maaroni quipatsi irareejeiteari oponeanaquea caaraiteriqui, jero otishiqui Líbano, irosati antearojaqui Éufrates jero maaroni iipatsitequi hititapee, irosati incajarequi Mediterráneo.’
4 -
5 Noncanteani quiso noyempi, eiro catsini nojoquimpitsi noquempetiri Moiseshini. Ariorica irimanayeevetempi, eiro imayeetimpitsi iranaacoyeetempi.
6 Eiro pitsaroitsi, irointi pishintsishiretanaque, pimatantearori pimpajeiteri pishanincapee quipatsi nocashiacaaqueriri irisavicajeitanteari. Tempa nocashiacaasanotaqueri intacantajeitaquempiniri.
7 Irotaque nocoacaasanotantaquempiri, eiro pitsaroitsi, irointi pishintsishiretasanotanaque. Pimoncaratasanotero maaroni nocantacantiri yoametanaquempiri Moiseshini. Eiro pipeacotarotsi ocantayetiri, pimatantearori paitapeerica pantayeteri.
8 Pincanteani pampiitapinitero pineanatapinitero nocantacantiri sanquenatacotainchari. Pinquenqueshiretapinitero quitaiteripeequi aisati tsiteniripeequi, pimatantearori ocantayetiri. Ariorica pimajeitaquero oca, cameetsa pintimajeitanaque.
9 Narotaque cantaquempiri: eiro pitsaroitsi; pishintsishiretanaque aisati eiro picantashiretitsi. Tempa narotaque Tasorentsisanori Pitasorentsite. Noncanteani quiso noyempi jaocapeerica pijayeteri.”
Yora ishanincajeitaniri Israel yovetsicajeitaca irimanajeitanteari
10 Irosati icantantacari Josué jivatacaayetiriri ishanincapee:
11 “Meeca pijajeite pisavicayetinta, pincantajeiteri ashanincapee irovetsicajeiteta oanarontsipee; tempa omavatapaaquerica quitaiteri amonteajeitero nija Jordán, aajeitantearori quipatsi impashijeiteeri Atasorentsite.”
12 Aisati iquenquetsatacairi iriori jivatacaajeitiriri ishanincasanoripeeni Rubén, Gad jeri Manasés, savicaarantaintsiri intatiquero nija Jordán. Icantiri:
13 —Pinquenqueshirejeitajero icantasanotaqueri Moiseshini, quemisantasanotiriri Tasorentsi. Tempa icantajeitaquempi: ‘Oca quipatsi irotaque ipaquempiri Tasorentsi, pisavicantajeiteari avirori, pimacoreajeitanteari.’
14 Meeca nocoacaajeitaquempi, maaroni manajeitachaneri, pijivajeitanaqueri ashanincapee, pamitacojeitena amanatacoventajeitero quipatsi. Irointiquea pijinapee, pitomipee jeri pivirapee poisavicajeitanaquerotsita aca piipatsitequi acaqueroquica nija Jordán ipanaquempiri Moiseshini.
15 Ariorica omoncarataquea impajeitaqueri iriori Tasorentsi quipatsi irisavicajeitanaquerica cameetsa, iquempetaquempi avirori ipajeitaquempi; impoijiquea pimpiajeitajero aca piipatsitequi ipajeitanaquempiri Moiseshini, quemisantiriri Tasorentsi, pisavicasanojeitantapempari.
16 Ari onimojeitaqueri, icantajeiti:
—Jee aitaque nomajeitaquero picantajeitaquenari aisati jaocarica pincoacayenari, nojayete.
17 Noncanteani nonquemisantajeitempi, noquempetiri Moiseshini noquemisantirini iriori. Irointiquea nocoacaasanotaquempi, quiso iroyempi Tasorentsi piquemisantiri, iquempetiri Moiseshini.
18 Maaroni piatsatempineri, caari quemisanterone pincantaveteari, ocameetsati incame. Queario nocoacaasanotaquempi, eiro pitsaroitsi, irointi pishintsishiretanaque.
