Josué 11:1-23
11 Iquemantacari iriori Jabín pincatsariventirori anta nampitsiqui Hasor, itsoncajeitaqueri ishanincajeitaniri Israel savicayetatsiniri nampitsipeequi, irosati itiancacantantacanari camanterineri Jobab, pincatsariventirori anta nampitsiqui Madón jeri yora pincatsariventirori anta nampitsiqui Simrón aisati iriori pincatsariventirori anta nampitsiqui Acsaf,
2 aisati iriori maaroni pincatsariyetatsiri toncaaripeequi catoncoquiniri, jero oirincaiteacotapai nija Jordán, oquirincatanaque incajare Quinéret, opampaiteyetapai aisati quempejitarori nampitsi Dor irosati anta iqueapinitinta catsirincaiteri,
3 aisati iriori cananeopee savicajeitatsiri anta isotoapinitinta catsirincaiteri aisati anta iqueanajinta, aisati iriori amorreopee, hititapee, ferezeopee, jebuseopee savicayetatsiri toncaaripeequi, jeri iriori heveopee saviquimoyetirori toncaari Hermón Mizpáquiniri.
4 Yocapee pincatsariyetatsiri yapatojeitaqueri maaroni manajeitachari carajeitiriri, oshequi catsini iyavaayotepee jero ishiacomentopee. Icarajeitaqueri oshequi catsini manajeitachari, iquempejeitacaro impanequi timatsiri otsapijaqui incajare, eiro amatiritsi ayojeiteri jaocarica icarajeitiri.
5 Maaroni yocapee icantavacaajeitaca: “Tsame amitacotavacaajeitea.” Irosati ijajeitantanaca ivancotimojeitapaacaro nijapee quipatsiquiniri Merom, irimanajeitanteariri ishanincajeitaniri Israel.
6 Ari icantiri Tasorentsi Josué: “Eiro pitsaroacaajeitaritsi, tempa osaitequera, oquempetaca meeca, noshinetaquempiri pintsoncajeiteri maaroni, poajeiteri. Impoiji pincarajitayeteri iitipee iyavaayotepee aisati pintaitayeteri ishiacomentopee.”
7 Irosati ijatantanaca Josué, icarajeitanaqueri manajeitachari, yareejeitacaro nijapee quipatsiquiniri Merom isavicajeitapaaquenta. Ari imapocaqueri imanajeitapaaqueri, imatacaasanojeitaqueri Tasorentsi yanaacojeitantacariri. Aiquero ijatatii yoijanajeitanaqueri irosati antearoitequi nampitsi Sidón aisati Misrefot-maim, irosati opampaiteapai Mispá timatsi isotoapinitinta catsirincaiteri. Itsoncajeitaqueri catsini, tecatsi timanajantsine.
8 -
9 Ari imoncarataquero Josué icantaqueriri Tasorentsi. Icarajitayetaqueri iitipee iyavaayotepeeni quisajeitiriri aisati itaaquero ishiacomentopeeni.
10 Ipiajeitantajarori, irosati imanajeitantanacaro nampitsi Hasor, yoaqueri pincatsaritatsiniri. Ora nampitsi irotaque antearoitetatsiniri, aitaque yapatojeitaniri pincatsariyetatsiniri yacacotavacaajeitantari.
11 Itsoncasanojeitaqueri, yoajeitaqueri savicajeitatsiniri aisati itaanaquero inampini.
12 Aisati iquempeyetanaquero otsipapee nampitsi isavicantayetari pincatsariyetatsiniri acacoyevetacariri, itsoncasanojeitanaqueri catsini. Imoncarataquero icantanaqueriri Moiseshini, quemisantiriri Tasorentsi.
13 Iro cantaincha te intayeroji nampitsipee timayetatsiri toncaaripeequi, apatiro itaaquero nampitsini Hasor.
14 Ari itsoncasanojeitaqueri, yoajeitaqueri savicajeitatsiniri nampitsipeequi, tecatsi timanajantsine. Irosati yaajeitantacaro iipatsitepeeni jeri ivirapeeni aisati paitapeerica yashiyetaniri.
Imoncarataquero Josué icantanaqueriri Moiseshini
15 Ari imoncarataquero Josué icantaqueriri Tasorentsi Moiseshini, tecatsi impeacotaquea aparoni.
16 Aitaque icantajeitacari Josué jeri ishanincapee, imanatacoventaquero maaroni toncaaripee, quipatsi Négueb aisati Gosen jero opampaiteacoyetapainta nija Jordán, jero aisati maaroni toncaaripee jero pampaitepee isavicajeitapaaquenta ishanincapeeni Israel.
17 Oponeanaca toncaariqui Halac, oquempejitapai Seír, irosati Baal-gad opampaiteayetapai otishi Líbano, aisati oirincaiteapaaca toncaari Hermón. Icantani imanajeitaqueri ishanincajeitaniri Israel, irosati itsoncantajeitacariri aisati yoajeitaqueri maaroni pincatsariventayetironiri quipatsipee
18 -
19 Tecatsi catsini iraacameetsajeitaque savicajeitatsiri nampitsipeequi. Apatiro yaacameetsajeitaqueri heveopee savicajeitatsiri nampitsiqui Gabaón. Irintiquea pashinipee itsoncajeitaqueri.
20 Iriotaque Tasorentsi cantacaashireacaacariri iquisoshiretantanacari imanajeitantacariri ishanincapeeni Israel, itsoncasanojeitantacariri irinti. Te incavintsaajeiteriji. Imoncarataquero icantaqueriri Tasorentsi Moiseshini.
21 Aisati imanajeitaqueri Josué ishanincapeeni Anac savicajeitatsiniri nampitsipeequi toncaariquiniri Hebrón, Debir, Anab aisati maaroni toncaaripeequiniri savicayetatsiri iipatsitepeeniqui Judá jeri maaroni ishanincapeeni Israel.
22 Itsoncasanojeitaqueri. Tecatsi timanajantsine ishanincapeeni Anac yora antearitsantsayetatsiniri maaroni anta iipatsitequi ishanincajeitaniri Israel. Apatiro itimayetanaque nampitsipeequi Gaza, Gat aisati Asdod.
23 Aitaque icantajeitacari Josué imanatacoventajeitaquero maaroni quipatsi, yaasanojeitantacarori. Imoncarataquero icantaqueriri Tasorentsi Moiseshini. Ari ipavacaayetacaro quipatsi aparopee ishanincasanoripee isavicantajeitacari, aisati irisavicajeitanteari coajicani. Impoiji isavicasanojeitanaque cameetsa, te irimanajeitajeaji aisati.
