Josué 12:1-24
12 Yora ishanincajeitaniri Israel itsoncajeitanaqueri pincatsariyetatsiniri savicayetatsiniri antaqueronta Jordán, oponeanaca iipatsiteni nijaqui Arnón, irosati toncaariqui Hermón aisati maaroni oirincaiteacotapai nija Jordán, isotoapinitinta catsirincaiteri.
2 Itsoncajeitanaqueri Sihón, yora amorreo pincatsaritatsiniri anta inampiniqui Hesbón. Oponeanaca iipatsiteni ipincatsariventiniri nampitsiqui Aroer timatsiri otsapijaqui Arnón. Oponeanaja aisati nianqui oirincaiteapai, irosati nijateniqui Jaboc, overapaaca iipatsite iriori ishanincapeeni Amón (onianquitapai Galaad).
3 Irosati ojatanaque oirincaiteacotapai nija Jordán antaquerontinta isotoapinitinta catsirincaiteri, oponeanaca incajarequi Quinéret, irosati incajarequi Catiojari. Aisati ojatanaque Bet-jesimot catonco, irosati oirincaiteapaaca toncaari Pisgá.
4 Aisati itsoncajeitanaqueri Og pincatsariventironiri Basán. Iriotaque apanivanitatsiniri refaítapee savicayetatsiniri Astarot aisati Edrei.
5 Oponeanaca iipatsite iriori ipincatsariventiniri toncaariqui Hermón, irosati Salcá aisati maaroni inampiqui Basán, irosati overapaaca iipatsite iriori Guesur aisati Maacá, irosati onianquirequi Galaad, overapaaca iipatsiteni Sihón, pincatsaritatsiniri inampiniqui Hesbón.
6 Yora Moiseshini jeri ishanincajeitaniri Israel itsoncajeitaqueri yoajeitaqueri pincatsariyetatsiniri. Impoiji ipajeitaqueri iipatsitepeeni ishanincasanorini Rubén jeri Gad aisati ipaarantaqueri ishanincasanorini iriori Manasés.
Quipatsipee imanatacoventajeitaqueri Josué
7 Yora Josué jeri ishanincajeitaniri Israel, itsoncajeitaqueri pincatsariyetatsiniri savicayetatsiniri quipatsiqui otsapijaqui Jordán iqueapinitinta catsirincaiteri. Oponeanaca iipatsiteni Baal-gat oirincaiteapai otishi Líbano, irosati toncaariqui Halac irosati quipatsi Seír. Irotaque oca ipayetanaqueriri Josué ishanincasanoripee isavicajeitantacari aisati irisavicajeitantajeari irishanincajeitajeari coajicani.
8 Jero otsipa quipatsipeeni pincatsariyetatsiniri toncaariquiniri, oirincaiteacotapai nija Jordán oirincaiteayetapaaca toncaaripee, ocaaraiteayetapai jero néguebiquiniri. Irotaque iipatsitepee hititapee, amorreopee, cananeopee, ferezeopee, heveopee jeri jebuseopee.
9 Jeri pincatsaripee itsoncajeiteetanaqueri, pincatsariventironiri nampitsipeequi:Jericó, Ai quempejitarori Betel,
10 Jerusalén, Hebrón,
11 Jarmut, Laquis,
12 Eglón, Gezer,
13 Debir, Gueder,
14 Hormá, Arad,
15 Libná, Adulam,
16 Maquedá, Betel,
17 Tapúah, Héfer,
18 Afec, Sarón,
19 Madón, Hasor,
20 Simrón-merón, Acsaf,
21 Taanac, Meguido,
22 Quedes, Jocneam ora toncaariquiniri Carmelo,
23 Dor quipatsiquiniri pajitachari Dor,Goím ora nampitsiquiniri Guilgal,
24 jero Tirsá.
Icarajeiti 31 pincatsaripeeni yapatoajeitanaca.
