Josué 13:1-33
13 Ari anteashipatasanotanaque ini Josué, icantiri Tasorentsi: “Meeca anteashipatasanotanaquempi, ainiroqueratatsi oshequi quipatsi tequera pintsonquero pimanatacoventero.
2 Ainirotatsi maaroni quipatsi isavicajeitantari filisteopee aisati guesureopee, oponeanaca nijaqui Sihor, otsapiqui Egipto isotoapinitinta catsirincaiteri, irosati overapaaca nampitsi Ecrón catonconiri, irotaque aisati iipatsite cananeopee, aitaque isavicayetiri filisteopee caratatsiri 5 jivatacantayetatsiri nampitsipeequi: Gaza, Asdod, Ascalón, Gat jero Ecrón. Ainirotatsi aisati isavicajeitantari iriori aveopee oquirincatanaque. Irotaque iipatsite maaroni cananeopee oponeanaca inampipeequi savicajeitatsiri sidonosatipee, irosati Afec otsapitapaaca iipatsite amorreopee.
3 -
4 -
5 Ainirotatsi aisati isavicajeitantari giblitapee jero maaroni otishiqui Líbano irosati isotoapinitinta catsirincaiteri aisati oponeanaca Baal-gad, oirincaiteapaaca toncaari Hermón, irosati iqueapiniyeetantaroriqui Hamat.
6 Nomatacaajeitempi pojocajeiteri maaroni savicajeitatsiri nampitsiqui Sidón aisati maaroni savicajeitatsiri toncaaripeequi poneanainchari otishiqui Líbano irosati Misrefot-maim. Avirori payeterine ishanincajeitaniri Israel quipatsi, irashitasanotantearori. Pimoncaratero nocantaquempiri.
7 Ocameetsati meeca pimpayeteri caratatsiri 9 pishanincasanoripee aisati timaarantaintsiri ishanincasanoripeeni iriori Manasés.”
Quipatsi intatiqueroniri nija Jordán
8 Yora ishanincasanoripeeni Rubén, Gad jeri cashetatatsiri ishanincasanoripeeni Manasés, ipanaqueri Moiseshini quipatsi intatiqueroniri nija Jordán, isotoapinitinta catsirincaiteri.
9 Oponeanaca nampitsiqui Aroer timatsiri otsapijaqui Arnón aisati ipayeetaqueri nampitsi timatsiri nianqui oirincaiteacotapai aisati maaroni opampaiteti jenoqui toncaari Medebaquiniri irosati Dibón.
10 Apatoanaca maaroni inampipeeni Sihón, yora ishaninca amorreopee pincatsaritatsiniri nampitsiqui Hesbón, irosati overapaaca inampi ishanincajeitaniri Amón.
11 Aisati ipayeetaqueri quipatsi Galaad, iipatsite guesureopeeni jeri maacateopeeni, irosati toncaariqui Hermón jero maaroni quipatsi Basanquiniri irosati Salcáqui.
12 Apatoanaca ipincatsariventiniri Og pincatsariventironiri Basán aisati Astarot jero Edrei. Iriotaque apanivanitatsiniri refaítapee itsoncajeitanaqueri Moiseshini.
13 Irintiquea guesureopee aisati maacateopee, te intsoncajeiteriji irinti. Iriotaque saviquimojeitiriri ishanincajeitaniri Israel irosati icanta meeca.
14 Irintiquea ishanincasanoripeeni Leví te imperiji iipatsite, tempa irashijeiteari yamayetiri ishanincapee intaarantayeteneriri Tasorentsi impincatsatanteariri; tempa irotaque icantitacariri.
Iipatsite ishanincasanoripeeni Rubén
15 Jero ipanaqueriri Moiseshini quipatsi ishanincasanoripeeni Rubén, imoncarataqueri icaratasanojeiti iriori.
16 Oponeanaca iipatsite nampitsiqui Aroer, otsapijaqui Arnón, jero nampitsi timatsiri nianqui oirincaiteacotapai aisati maaroni opampaiteti jenoqui toncaari Medebaquiniri.
17 Irosati ojatanaque nampitsiqui Hesbón jero nampitsipeequiniri timayetatsiri jenoqui toncaari opampaiteti: Dibón, Bamot-baal, Bet-baal-meón,
18 Jahas, Cademot, Mefáat,
19 Quiriataim, Sibmá, Séret-sáhar timatsiri toncaariqui oirincaiteapai.
20 Bet-peor, Bet-jesimot jero oirincaiteapaaca toncaari Pisgá.
21 Irojeitaque timatsiri opampaiteti jenoqui toncaari, aisati maaroni ipincatsariventiniri Sihón amorreo savicatsiniri Hesbón, itsoncajeitaqueri Moiseshini yoajeitanaqueri; aisati jivatacantayetatsiniri savicatsiri Madiánaqui amitacotiriniri: Eví, Réquem, Sur, Hur jeri Reba.
22 Aisati yoaqueri Balaam itomini Beor iotashiyetachaniri aisati oshequi pashinipee.
23 Aitaque overaacari iipatsite iriori ishanincasanoripeeni Rubén imoncarataqueri icaratasanojeiti ishanincapee oconoancaro maaroni nampitsipee jero tsipanampiyetarori, irosati areetantaca nijaqui Jordán.
Iipatsite ishanincasanoripeeni Gad
24 Jero iipatsite ishanincasanoripeeni iriori Gad, ipanaqueriri Moiseshini. Imoncarataqueri icaratasanojeiti iriori.
25 Oponeanaca Jazer jero nampitsipeequiniri Galaad, onianquirequi iipatsite ishanincapeeni Amón, irosati nampitsiqui Aroer timatsiri omonteroqui Rabá.
26 Jero aisati quipatsiqui otiminta nampitsi Hesbón, Ramat-mispé jero Betonim aisati nianqui omontetacaro Mahanaim, irosati overapaaca oipatsite nampitsi Debir.
27 Aisati ipajeitaqueri oirincaiteapai otiminta Bet-aram, Bet-nimrá, Socut jero Safón, apanivanitapaintsiri ipincatsariventiniri Sihón. Aitaque overaacari iipatsite intatiqueroqui nija Jordán isotoapinitinta catsirincaiteri, irosati oquirincatanaque incajarequi Quinéret.
28 Irotaque maaroni nampitsipee ipajeitaqueriri Moiseshini ishanincasanoripeeni Gad, imoncarajeitaqueri icaratasanojeiti iriori.
Iipatsite ishanincasanoripeeni Manasés
29 Aisati ipanaqueri Moiseshini iipatsite cashetatatsiri ishanincasanoripee Manasés, imoncarataqueri icaratasanojeiti iriori.
30 Yaajeitaquero yashiveitaniri Og pincatsariventironiri Basán, oponeanaca iipatsite iriori Mahanaim ocarajeiti 60 nampitsipee irashipeeni Jaír,
31 Ora nianquiniri Galaad aisati nampitsipee Astarot jero Edrei. Maaroni ocapee irotaque irashi cashetani ishanincajeitaniri iriori Maquir itomini Manasés; imoncarataqueri icaratasanojeiti iriori.
32 Irotaque oca quipatsipee ipayetanaqueriri Moiseshini irosati isavicajeitantapaacari opampaiteapai moabaquiniri, intatiqueroqui nija Jordán isotoapinitinta catsirincaiteri, omonteroqui Jericó.
33 Irintiquea ishanincasanoripeeni Leví, te imperiji quipatsi irashiteari, irointi icantaqueri: “Yora Atasorentsite aquemisantajeitiri iriotaque pajeitempineri coiteimojeitempineri.”
