Josué 17:1-18
17 Jero iipatsite yaajeitaqueri ishanincasanoripeeni iriori Manasés itomini José, jivatatsiri itimi. Yora Maquir manatincari ini, iriotaque itomini Manasés jivatatsiri itimi, iriotaque iriri Galaad; yaajeitaquero iriori quipatsi Galaad jero Basán intatiqueroniri nija Jordán isotoapinitinta catsirincaiteri.
2 Aisati ipishonquimentaquero quipatsipee iraayeteri pashinipee itomipeeni Manasés: Yora Abiézer, Hélec, Asriel, Siquem, Héfer jeri Semidá. Imoncarataqueri icarajeiti. Iriojeitaque itomipeeni Manasés aisati icharinepeeni José.
3 Yora Selofhad itomini Héfer icharineni Galaad itomini Maquir icharineni Manasés, te intimeji itomi irointi irishintopee ocarajeiti 5: Mahlá, Noá, Hoglá, Milcá jero Tirsá.
4 Ari ojatashijeitaqueri antaveetatsiri Eleazar, Josué jeri jivatacantajeitatsiri; ocantapaaqueri: “Nocoi pimpena narori quipatsi piquempejeitaqueri pashinipee noshaninca. Tempa icantasanotaqueri Tasorentsi Moiseshini, pimpantenari narori quipatsi.” Irosati ipantacaro, iquempejeitaqueri pashinipee oshaninca. Imoncarataquero icantaqueriri Tasorentsi.
5 Irotaque ipajeitantacariri ishanincasanoripeeni Manasés iipatsite caratatsiri 10 aisati quipatsi Galaad jero Basán, timatsiri intatiqueroqui nija Jordán isotoapinitinta catsirincaiteri.
6 Ari ipajeitaquero irishintopee iquempetaqueri shiramparipee, ora quipatsi Galaad irotaque irashi pashinipee oshanincajeitaniri.
7 Ari oponeanaca iipatsite overapaaca irashi ishanincasanoripeeni iriori Aser irosati nampitsiqui Micmetat, montetarori Siquem, irosati jatanaintsi quirincaniri Tapúaqui, ocontejatapai nija.
8 Ora nampitsi Tapúah irotaque quipatsi irashi ishanincasanoripeeni Manasés, irosati nampitsiqui Tapúah. Aitaque isavicajeitiri ishanincasanoripeeni Efraín.
9 Impoiji ojatanaque quirinca irosati osantenitapai Caná. Omontetavacaaca inampipee ishanincasanoripeeni Efraín aisati Manasés, ora osanteni catonconiri overapaaca irotaque irashi ishanincasanoripeeni Manasés, irosati sotoapaintsi incajarequi.
10 Yora ishanincasanoripeeni Efraín overapaaca iipatsite quirincaniri osanteniqui, aisati omontetacaro iipatsite ishanincasanoripeeni Manasés, irosati jatanaintsi incajarequi Mediterráneo. Aitaque overaanacari. Ari oijatanaquero irosati overantapaaca catonco iipatsitequi iriori ishanincasanoripeeni Aser, irosati overantapaaca iipatsitequi iriori ishanincasanoripeeni Isacar isotoapinitinta catsirincaiteri.
11 Aisati yaacojeitaquero nampitsipee, timayetatsiri iipatsitequi ishanincasanoripeeni Isacar jeri Aser. Aisati yaacojeitaquero tsipanampiyetarori: Bet-seán, Ibleam, Dor, Endor, Taanac, Meguido jero mavatatsiri otishijaniqui.
12 Iro cantaincha te irimateroji irisavicantajeitearoji ocapee nampitsi; tempa yora canaaneopee ipiajeitacari irosati isavicajeitaque.
13 Ari osamaniiteanaque ineaperotasanojeitanaca ishanincajeitaniri Israel, irosati icoacotapinijeitantacari impapiniteri quireequi. Iro cantaincha te irojocajeiteriji.
Yaacojeitaquero ishanincajeitaniri José inchatomashipee
14 Yora ishanincajeitaniri José ijatashijeitaqueri Josué icantapaaqueri:
—¿Paitampa pipantajeitaquenari capichaji quipatsi? Oshequi catsini nonajeitaque, tempa itasoncaventaquena Tasorentsi.
15 Ari icantanaqueri Josué:
—Pishequitasanojeitaquerica catsini, teerica pimoncarajeitearoji, ocameetsati pijajeite iipatsitequi ferezeopee jeri refaítapee, paajeitapeero inchatomashipee.
16 Icantajeitanaqueri iriori:
—Queario, onta inchatomashipee eiro nomoncarajeitarotsi. Aisati yora canaaneopee savicajeitatsiri opampaiteapai timatsi ishiacomentopee ashiroyetatsiri. Aisati iquempejeita savicajeitatsiri Bet-seán jero tsipanampiyetarori, aisati iriori savicajeitatsiri opampaiteapai Jezreel.
17 Ari icantanaqueri Josué:
—Iro cantaincha oshequi catsini pinajeiti aisati pineaperotasanojeita.
18 Ocameetsati paajeitero maaroni toncaaripee otiminta inchatomashipee irosati overapaaca, eiro paarantitsi capichaji. Omaveteata ineaperotasanojeita savicajeitatsiri aisati otimayeveta ishiacomentopee ashiroyetatsiri, aitaque pimataqueri pintsoncajeiteri.
