Josué 2:1-24
2 Ainiroquera isavicajeitapaaque Sitimiqui, itiancaque Josué apite amenanonterone nampitsi; icantiri: “Nocoi pijate pamenanontaitero quipatsi aisati nampitsi Jericó.”
Ari ijatanaque irosati yareetantacaro. Iqueapaaque ovancoqui tsinane antashiyetariri shiramparipee pajitachari Rahab; irotaque imaimotapaaqueri.
2 Ari otsitenijencaiteanaji irosati icamanteetantacari pincatsaritatsiri, icantaqueri:
—Areetapaaca ishanincapeeni Israel ovancoquinta Rahab. Irioyeata amenanonterone anampica.
3 Iquemantacari, irosati itiancantaca amenerine ovancoqui. Icantapaaquero:
—Poimisotoajeitenarita areetapaaquempiri pivancoqui, irinti amenanonteeri.
4 Iro cantaincha aitaque omanataqueri incaaranqui, ocantiri:
—Jee, queariotaque aitaque ipocapanaintiri aca; iro cantaincha te niotavaqueriji jaocarica iponeari.
5 Jajeitanaji incaaranqui otsitenijencaiteantanajari, tequeratsita irashiyeetajero ashitacorontsi. Te nioteji jaocarica iquenanajiri. Picoirica poijajeitanaqueri intsipaite, naamaaca ari pineavajeri nianqui.
6 Iro cantaincha ainiro omanaqueri ovancoqui jenoqui, opiotironta lino oisopatiyetiri oroantanaqueari.
7 Ari ijajeitanaque ishanincapee pincatsari yoijanajeivetanacari. Iquenanaquero jatantachari nijaqui Jordán, irosati yareejeitantacaro oquiripejatapai. Ijajeitantanacari, yashitasanoyeetaquero ashitacoro nampitsi iqueantapinijeitari.
8 Yora amenanontirori, tequeratsita irimayeji, ari ataitashitanaqueri Rahab, ocantapairi:
9 —Niotaque yora Tasorentsi impajeitempiro oca quipatsi. Icantashireacaasanotaquena, notsaroacaasanojeitantaquempiri, aisati iquempejeitaca maaroni noshanincapee savicajeitatsiri aca.
10 Tempa noquemacojeitaquempi jaoca picantacari piponeajeitantanajari Egiptoqui. Yora Tasorentsi ipirijataquempiro incajare Quitioncari, pavisajeitantacari. Aisati niojeitaque iriotaque matacaajeitaquempiri pitsoncajeitantanacariri poajeitanaqueri amorreopee jeri apitetatsiniri ivincatsarite pajitachaniri Sihón jeri Og, savicajeitatsiniri intatiquero nija Jordán.
11 Irotaque notsaroacaasanojeitantaquempiri, tecatsi materone irijatashijeitempi irimanayeetempi. Tempa yora Pivincatsarite Tasorentsi piquemisantajeitiri, iriotaque pincatsariventajeitiriri inquitesati aisati quipatsisati.
12 Irotaque nocantantimpiri meeca pincantasanojeitena ariorica pimajeitaquero pintacotena aisati noshanincapee, noquempejeitaquempi avirori nintacotavaquempi cameetsa. Tempa ineajeitaquee Tasorentsi. Piotacaasanotena meeca ariorica pimoncarataquenaro nocantajeitaquempiri.
13 Nocoasanotaque poavisaacojeitena, eiro poanatsi aisati apa, ina, nojariripee, nirentopee jero maaroni timimoyetanari.
14 Ari icantanaquero:
—Aitaque nomajeitaquero oca picantaquenari, eiro noajeitimpitsi. Iro cantaincha, eiroya picamantayetitsi oca nocantaquempiri. Aitaque noncavintsaajeitaquempi ariorica impajeitaquenaro Tasorentsi oca quipatsi.
15 Ora Rahab timatsi ovanco jenoqui otantotacoroqui nampitsi. Irosati aantacaro soocatsa oaniireacojeitajiri omoroqui amenacotantayetari, isotoantanajari amenanontirori.
16 Ari ocantiri:
—Pijataje pinquenanaje toncaariquinta, eiroquea ineajeitantavajimpitsi coajeitimpiri. Pimanavaqueatsita anta oncarate mava quitaiteri impiajeitavajetsita aca. Impoijiquea pinquenajeitanajero piquenapaaquenta.
17 Ari icantanaquero iriori:
—Jee, aitaque aisati narori nomoncarajeitaquempiro picantasanotaquenari.
18 Iro cantaincha noncantempi: Ariorica pineavaquena nompocajeitaque, ocameetsati pintsatero omoroqui oca soocatsa quitioncatsari poaniireantajanari. Aisati pampatojeiteri pivancoqui piri, piniro, pijariripee jeri ishanincasanoripee piri.
19 Jaanicarica sotoanaintsine pivancoqui, irisati oacantajanchane. Te naro cantacaashijeitearone. Irompa iriorica noshanincapee oaarantapaaquerine pivancoquiniri, naro cantacaajeitearone.
20 Aisati ariorica pincamantacoyetaquena, eiro nomajeitirotsi nomoncaratempiro oca nocantasanovetaquempiri.
21 Ari ocantanaqueri:
—Jee, aitaque oncanteari.
Ari ovetsatavajari, irosati ijatantanaja. Impoiji otsataquero iroori soocatsa quitioncatsari omoroqui.
22 Iquenajeitanaquero anta toncaariqui, imanajeitaca ocarataque mava quitaiteri ainiroquera iriori manayetachari icoacoayevetari. Iro cantaincha te irineavajeriji, irosati ipiajeitantaja inampiqui.
23 Impoiji yoirincajeitanaja iriori amenanontantatsiri, imonteanajaro nija Jordán irosati yareetantaja isavicajeitapaaquenta ishanincapee. Ari icamantayetapaaqueri Josué maaroni ineayetaitiri aisati avishimoyevetacariri.
24 Icantiri: “Queario ipaqueero Tasorentsi maaroni quipatsi. Aisati yora savicajeitatsiri nampitsipeequi, oshequi itsaroacaasanojeitaquee catsini.”
