Josué 20:1-9
20 Ari iquenquetsatacaajiri Tasorentsi Josué, icantiri:
2 “Pincanteri pishanincapee incoyeeta nampitsipee iraventeari oavacaashitachari, nocantaqueriri Moiseshini.
3 Intimerica aparoni iroashitaqueari ishaninca, teerica intsataashiteari iroyeri, ocameetsati irishianaque nampitsipeequi iraventapemparo, eiroquea yoantaritsi ishaninca camaintsiri, impiatacoventantajeariri.
4 “Ariorica irareetapaaquearo nampitsi ashitacoroqui, ocameetsati incamantasanotapeeri jivatacantajeitatsiri paita ishiantanacari. Impoijiquea irishineteri inqueanaque aisati impavaqueri irisavicantapempari.
5 Ariorica iroijavetanaqueari ishaninca camaintsiri, yora jivatacantajeitatsiri nampitsiqui eiro ishinecoventiritsi iroyeri. Tempa te intsataashiteariji iroyeri, te iro inquisanenterini.
6 Yora shianainchari ocameetsati irisavique nampitsiqui irosati incantacoventantajeari maaroni savicajeitatsi nampitsiqui. Incanteani irisavique irosati incamantaqueari iriori jivatacairiri antaveeyetatsiri. Impoijiquea impianaje inampiqui iponeanaca peerani ishiantacari.”
7 Irosati icoyeantaca ishanincajeitaniri Israel nampitsipee iraventapiniyeeteari: Ora Quedes Galileaquiniri, timatsiri toncaaripeequi iipatsitequi ishanincasanoripeeni Neftalí; jero Siquem, timatsiri toncaaripeequi iipatsitequi ishanincasanoripeeni Efraín; jero Quiriat-arbá (opajita aisati Hebrón), timatsiri toncaaripeequi iipatsitequi ishanincasanoripeeni Judá.
8 Jero aisati intatiquero nija Jordán, opampaiteapai jenoqui toncaari caaraiteriquiniri, isotoapinitinta catsirincaiteri otiminta Jericó. Icoyeaquero nampitsi Béser iipatsitequi ishanincasanoripeeni Rubén; anta quipatsiqui Galaad icoyeaquero Ramot timatsiri iipatsitequi ishanincasanoripeeni Gad; aisati quipatsiqui Basán icoyeaquero nampitsi Golán iipatsitequi ishanincasanoripeeni Manasés.
9 Irotaque oca nampitsipee icoyeajeitaqueri iraventajeiteari ishanincajeitaniri Israel aisati pashinisati saviquimojeitiriri, ariorica iroaqueri itsipa, teerica intsataashiteariji iroyeri. Eiroquea imatantaritsi iroyeri ishaninca camaintsiri arirorica incoavetea impiacoventajearime, tequeratsitarica incantacoventeriji.
