Josué 21:1-45
21 Yora jivatacaajeitiriri ishanincajeitaniri Leví ijataque anta nampitsiqui Siló, timatsiri iipatsirequi canaaneopee, inquenquetsatanteariri antaveetatsiri Eleazar jeri Josué aisati jivatacantajeitatsiri ishanincasanoripeeni Israel, icantapaaqueri: “Nopoqui noncantajeitempi: peerani icantasanotaqueri Tasorentsi Moiseshini pimpajeitantenari nampitsipee nosavicajeitanteari. Aisati pimpacotenaro paashitomashi iroajeiteari novirapee.”
2 -
3 Irosati ipajeitantacari ishanincajeitaniri Israel ishanincapeeni iriori Leví nampitsipee jero paashitomashi iipatsitepeequiniri. Imoncarataquero icantaqueriri Tasorentsi.
4 Ari ijivataque yojoquimentaquero nampitsipee yaajeitaqueri ishanincapeeni Quehat, iriotaque ishanincajeitaniri Aarón antaveeyetatsiri. Yaajeitaquero 13 nampitsipee iipatsitequiniri ishanincasanoripeeni Judá, Simeón jeri Benjamín.
5 Aisati pashinipee ishanincasanoripeeni Quehat, yaajeitaquero 10 nampitsipee iipatsitequiniri ishanincasanoripeeni iriori Efraín aisati Dan jeri ishanincasanoripeeni Manasés savicajeitaintsiri acaqueroca nija Jordán iqueapinitinta catsirincaiteri.
6 Impoiji ishanincasanoripeeni iriori Guersón, yaajeitaquero 13 nampitsipee iipatsitequiniri ishanincasanoripeeni Isacar, Aser, Neftalí, jeri pashini ishanincasanoripeeni Manasés savicantajeitapaacarori quipatsi Basán.
7 Jeri ishanincasanoripeeni iriori Merari, yaajeitaquero 12 nampitsipee iipatsitequiniri ishanincasanoripeeni Rubén, Gad jeri Zabulón.
8 Yora ishanincajeitaniri Israel ipajeitaqueri ishanincapeeni Leví nampitsipee yojoquimentaqueri, aisati ipacoyetaqueri paashitomashi. Imoncarataquero icantaqueriri Tasorentsi Moiseshini.
9 Ora nampitsipee iipatsitequiniri ishanincasanoripeeni Judá jeri Simeón isanquenatacoteri,
10 irotaque ipayetaqueriri ishanincasanoripeeni iriori Quehat yora ishanincajeitaniri Aarón, tempa iriojeitaque jivataintsiri yaaquero nampitsi.
11 Ora quipatsi toncaaripeequiniri Quiriat-arbá (pajitachari aisati Hebrón). Irotaque intarori inampini ishanincapeeni Anac antearitsantsatatsiniri aisati yaacotaquero paashitomashi.
12 Irointiquea quipatsi timayetatsiri nampitsiqui aisati tsipanampiyetarori, irotaque irashi Caleb itomini Jefuné.
13 Ora nampitsi Hebrón, irotaque aisati iraventeari jaanicarica oavacaachane, irotaque ipajeitaqueriri ishanincapeeni antaveetatsiri Aarón. Jero oca pashini nampitsipee: Libná,
14 Jatir, Estemoa,
15 Holón, Debir,
16 Ain, Jutá jero Bet-semes. Ocarati 9 nampitsipee aisati ipacoyetaqueri paashitomashi.
17 Aisati iriori iipatsite ishanincasanoripeeni Benjamín ipajeitaqueri: Gabaón, Gueba,
18 Anatot jero Almón, ocarati 4 nampitsipee, ipacoyetaqueri paashitomashi.
19 Ari ocarati apatoanaca 13 nampitsipee yaaqueri antaveeyetatsiri ishanincapeeni Aarón. Yaacojeitaquero aparopeeni paashitomashi.
20 Jeri pashini ishanincajeitaniri Quehat, ipayeetaqueri nampitsipee iipatsitequiniri iriori ishanincasanoripeeni Efraín.
21 Onta toncaaripeequiniri iipatsitequiniri ishanincapeeni Efraín, ipayeetaqueri nampitsi Siquem, irotaque iraventeari jaanicarica oavacaachane aisati Guézer,
22 Quibsaim jero Bet-horón, ocarati 4 nampitsipee ipacoyetaqueri paashitomashi.
23 Irioquea ishanincasanoripeeni Dan, ipayeetaqueri Eltequé, Guibetón,
24 Aialón jero Gat-rimón. Ocarati 4 nampitsipee ipacoyetaqueri paashitomashi.
25 Aisati iriori ishanincasanoripeeni Manasés, ipayeetaqueri acaquerocaniri iqueapinitinta catsirincaiteri, apite nampitsi: Taanac jero Gat-rimón, ipacoyeetaqueri aisati paashitomashi.
26 Ocarati 10 apatoanaca inampipee ishanincapeeni Quehat, yaacojeitaquero paashitomashi.
27 Yora ishanincajeitaniri Leví, ishanincasanoripeeni Guersón, ipeetaqueri apite nampitsi, yashitari ishanincasanoripeeni Manasés: Golán, quipatsiquiniri Basán irotaque aisati iraventeari oavacaachane, jero Beestera; ipacoyeetaqueri pashitomashi.
28 Jeri ishanincasanoripeeni Isacar ipayeetaqueri iriori nampitsipee: Quisón, Daberat,
29 Jarmot jero Enganim. Ocarati 4 nampitsipee ipacoyetaqueri paashitomashi.
30 Jeri ishanincasanoripeeni Aser, ipayeetaqueri iriori nampitsipee Misael, Abdón,
31 Helcat jero Rehob. Ocarati 4 nampitsipee ipacoyetaqueri aisati paashitomashi.
32 Aisati ishanincasanoripeeni Neftalí ipaqueri iriori mava nampitsipee aisati ipacoyeetaqueri paashitomashi: jero nampitsi Quedes Galileaquiniri, irotaque iraventeari oavacaachaneri; aisati Hamot-dor jero Cartán.
33 Ari ocarataque 13 apatoanaca inampipee ishanincapeeni iriori Guersón, yaacojeitaquero aparopeeni paashitomashi.
34 Aisati iriori ishanincajeitaniri Merari caariquera timatsiri inampipee. Ipaqueri iipatsitequi ishanincajeitaniri Zabulón ora nampitsipee: Jocneam, Carta, Dimná jero Naalal. Ocarati 4 nampitsi ipacoyeetaqueri paashitomashipee
35 -
36 Jeri ishanincasanoripeeni Rubén ipacoyeetaqueri nampitsi Béser, Jahas, Cademot jero Mefáat. Ocarati 4 nampitsi, ipacoyeetaqueri aisati paashitomashipee.
37 -
38 Aisati ishanincasanoripeeni Gad ipaqueri iriori: Ramot timatsiri Galaad irotaque aisati iraventeari oavacaachaneri, jero nampitsipee Mahanaim, Hesbón aisati Jazer. Ocarati 4 ipacoyetaqueri paashitomashipee.
39 -
40 Ocarataque 12 nampitsipee yaajeitaqueri iriori ishanincapeeni Merari.
41 Ari ocarati apatoanaca 48 nampitsipee yaajeitaqueri ishanincapeeni Leví iipatsitepeequiniri ishanincapee. Yaacoyetaquero paashitomashipee timayetatsiri otsapiiqui aparopeequi nampitsi.
42 -
Imoncaratasanotiro Tasorentsi icantasanotiri
43 Aitaque ocantacari ipaqueri Tasorentsi maaroni quipatsi ishanincajeitaniri Israel. Icashiacaaqueriri ora icantasanotaqueriri intacantajeitacariniri. Ari yashitasanojeitacaro quipatsi isavicajeitantacaro.
44 Yora Tasorentsi imoncarataquero icashiacaaqueriri, isavicacaajeitaqueri cameetsa maaroni iipatsitequi. Te irimajeiteriji quisajeitiriri irimanajeiteri; tempa imatacaasanotaqueri Tasorentsi yanaacojeitantacariri.
45 Tecatsi aparo impeacotimataquea Tasorentsi, imoncarataquero maaroni cameetsayetatsiri icashiacaaqueriri ishanincajeitaniri Israel.
