Josué 23:1-16
23 Ari osamaniiteanaque itasoncaventaqueri Tasorentsi maaroni ishanincajeitaniri Israel, isavicajeitanaque cameetsa te irimanajeitajeriji quisajeitiriri. Aisati anteashipatasanotapaaque Josué.
2 Ari icajemacantaqueri maaroni ishanincajeitaniri Israel, jivatacantajeitatsiri, cantacoventantatsiri, maaroni, icantiri:
“Meeca noshaninca, anteashipatasanotapaaquena, oshequitanaque nosarentsite.
3 Tempa pineajeitaquero jaoca icantaqueriri Tasorentsi maaroni savicajeitatsiniri aca yora quisajeivetaqueeri jocaajeivetavaqueeri. Iriotaque amitacotaqueeri atsoncaarantajeitantacariri.
4 Aisati novishonquimentaquero oca quipatsi nopajeitantaquempirori, amanatacoventajeitaqueri pisavicajeitantacari. Aisati nopajeitaquempiro caariquera amanatacoventajeiti oponeanacaro nijaqui Jordán irosati acaqueroquininri incajarequi Mediterráneo, iqueapinitinta catsirincaiteri.
5 Irio Tasorentsi matacaajeitempine pintsoncajeitanteariri savicajeitatsiri, paajeitantearori iipatsitepee; tempa irotaque icashiacaajeitaquempiri Avincatsarite Tasorentsi.
6 “Pinquearioventasanoteroqueti meeca pimoncaratero maaroni ocantiri isanquenatacaaqueriri Tasorentsi Moiseshini. Pimoncaratasanotero ocantayetiri.
7 Eiroquea piconoajeitantaritsi savicajeitatsiri aca. Eiro pipincatsatashiyetarotsi ijitasorentsitashiyetari. Eiro piquemisantashiyetarotsi. Eiro catsini piquenquetsatacotimatirotsi aisati eiro picantacotimatirotsi pimoncaratantearori pincanteri.
8 Apaniro pinquemisantasanojeiteri Avincatsarite Tasorentsi, pincanteani, aquempejeitaca meeca.
9 Tempa iriotaque matacaajeitaqueeri amajeitantacariri anaacojeitaqueri savicajeitatsiniri nampitsipeequi neaperotasanoyetachaniri. Tecatsi anaacojeiteene, irosati meeca.
10 Pincaravetearica aparoni, ario poimishiaqueri carajeivetachaneri 1,000 manavetempineri; tempa iriotaque Atasorentsite manacoventajeiteeri. Tempa aitaque icantasanotitaca.
11 Queariompiyea, paamaventacojeitea avisati, pinintasanoteri Avincatsarite Tasorentsi.
12 Nocoaque piojeitero oca: ariorica pojocanajeri Tasorentsi, pinconoajeitaquearirica saviquimojeitaqueeri aca, paajeitaquerorica irishintopee, eiro yamitacojeitajimpitsi Tasorentsi pintsoncajeitanteariri. Irotaque irishinetacoventajeitantempiri iroashinoncaajeitempi, oshequi catsini ompomerentsitimojeitempi. Onquempetaquea impasayeetempirica pitapiiqui aisati osataajatempirica quitotseequi poquiqui. Irosati pintsoncajeitanteari, tecatsi savicajeitanajantsine aipatsitequica cameetsatasanotatsiri ipavetaqueeri Avincatsarite Tasorentsi.
13 -
14 “Meeca narori irotaintsi noncame. Irotaque nocoacaasanotantaquempiri pinquenqueshiretasanotero, imoncaratasanotaquero Tasorentsi maaroni cameetsayetatsiri icantasanotaqueeri. Tecatsi catsini impeacotimataquea icashiacaajeitaqueeri.
15 Pineajeitaquero imatasanotaquero Tasorentsi, imoncarataquero maaroni cameetsayetatsiri icashiacaajeitaquempiri.
16 Aisati onquempetaquea, eirorica pimoncaratirotsi icantasanovetaquempiri, pimpincatsatashiyetaquearorica ijitasorentsitashiyeetari, aitaque inquisajeitanaquempi, intiancajeitempiro oashinoncantsipee. Irosati pintsoncajeitanteari, tecatsi savicajeitanajantsine aipatsitequica cameetsatasanotatsiri ipajeitaqueeri.”
