Josué 24:1-33
24 Ari yapatojeitaqueri Josué maaroni ishanincasanoripeeni Israel anta nampitsiqui Siquem. Icajemacantaqueri jivatacantajeitatsiri, irosati yapatotantacari itiminta Tasorentsi Inantariqui.
2 Icantiri maaroni ishanincapee:
—Jeroca icantiri Avincatsarite, iriotaque Itasorentsite Israel: ‘Peerani yora Térah jeri itomipee Abrahama aisati Nahor, iriotaque intacantajeitaquempiniri, isaviquimojeitironi otsapijaqui nija Éufrates. Ipincatsatashiyeveitaroni ijitasorentsitashiyetari.
3 Aitaque nocajemaqueri Abrahamani, namaqueri aca naniitacaaqueri maaroni quipatsiqui Canaán. Noshequiacaasanojeitaqueri ishanincajeitaniri. Nopaqueri jivatatatsiri itomi ipajiaqueri Isaac.
4 Aisati nopaqueri Isaac apite itomi iriori: Jacob jeri Esaú. Yora Esaú nopaqueri quipatsi toncaariquiniri Seír. Irintiquea Jacob jeri itomipee ijajeitaque Egiptoqui.
5 “Impoiji notiancaqueri Moiseshini jeri Aaróni, aisati noamaajeitaqueri egiptosati, irosati naajeitantajimpi avirori.
6 Isoquijajeitantanajari intacantajeitaquempiniri Egiptoqui, yora egiptosati yoijanajeivetavajari ishiacomentapeequi aisati iyavaayotepeequi, irosati incajarequi Quitioncari.
7 Impoiji yaventajeitaquena, irosati noantacaro mencori tsitenishaasanotatsiri jocaajeitavaqueriri caari ineajeitantari. Aisati nopiajatacaajaro incajare itsitiajeitantanacari. Pineajeitaquero oca nantaqueri Egiptoqui.
“Impoiji pisavicajeitapaaque avirori oshequi osarentsipee caaraiteriqui,
8 irosati namajeitantajimpi iipatsitequi amorreopee iquenapiniti catsirincaiteri anta intatiqueroqui nija Jordán. Imanajeivetavaquempi, iro cantaincha nomatacaajeitaquempi pitsoncajeitantacariri, paajeitantacarori iipatsite.
9 Aisati iquempevetaca Balac, pincatsariventajeivetariniri ishanincapeeni Moab, itomini Sipor, ipocajeivetaca imanajeitempime. Yora Balac itiancaque amenerine Balaam itomini Beor, irimatsitacantajeitantempimeri.
10 Iro cantaincha te noshineteriji irimatsitacantajeitempi. Irointi icantacoventapinijeitaquempi cameetsa notasoncacoventajeitantaquempiri. Aitaque ocantacari noavisaacojeitantaquempiri.
11 Irosati pimonteajeitantacaro nija Jordán, irosati pareejeitantacaro nampitsi Jericó. Yora savicajeitatsiniri (amorreopee, ferezeopee, cananeopee, hititapee, gergeseopee, heveopee jeri jebuseopee) imanajeivetavaquempi iriori. Iro cantaincha nomatacaajeitaquempi panaacojeitantacariri.
12 Aisati iquempetaca yora apitetatsiniri pincatsarini amorreo, te aviro tsoncajeiterine pisataamentoqui aisati piveanequi. Narotaque tiancaqueneriri tsaroantsi itsaroacaasanojeitantavaquempiri. Irotaque ishiapitsajeitantanaquempiri tequeratsita pareejeiteariji pimanajeitanteariri.
13 Nopajeitaquempiro quipatsi caari pantaveejeiti, aisati nampitsipee caari povetsiqui. Meeca pisavicajeitantacaro aisati poajeitacaro ovapee jero oitsoqui orivo caari pipanquijeiti.”
Ari yovaajiniri Josué aisati:
14 —Irotaque ocameetsatantari pimpincatsatasanoteri Tasorentsi aisati pantaveetasanoteneri cameetsa aisati pinquearioventero. Pojocajeitajeri ijitasorentsiyetiri yora ipincatsatashijeitaniri intacantajeitaquempiniri anta otsapijaqui nija Éufrates aisati anta Egiptoqui. Irointi pantaveetasanoteneri Tasorentsi.
15 Iro cantaincha terica pincoyeji pantaveeteneri Tasorentsi, aviro cantajeitatsine meeca jaanicarica pantaveeteneri: iriorica ijitasorentsitashiyeetari yora yantaveejeitinirini intacantajeitaquempiniri anta otsapijaqui Éufrates, irompa iriorica ijitasorentsiyetiri amorreopee savicantajeitarori oca quipatsi. Naroquea nainti aisati noshanincasanoripee, nantaveetasanojeiteneri Tasorentsi.
16 Ari icantajeitanaqueri maaroni ishanincapee:
—¡Eiro catsini ishinetanatsi Tasorentsi nojocajeiteri nantaveetanteneariri pashini ijitasorentsitashiyeetari!
17 Tempa iriotaque Tasorentsi oimishitoajeitajeeri aisati ashanincapeeni asavicantajeiveitaniri Egiptoqui yomperanajeitantavetaqueeri. Yonijaaqueero oshequi catsini caari aneapinijeiti. Iriotaque jocaacoventaqueeri aisati iticaacoventaquee apocajeitantacari, avisantayetanacarori nampitsipee.
18 Iriotaque joquimojeitaqueeriri maaroni nampitsipeequiniri aquenajeitapaaquenta, aisati amorreopee savicajeitatsiniri aca. Irotaque ocameetsatantari nantaveejeiteneri narori. Tempa iriotaque Atasorentsite.
19 Ari icantanajiri iriori Josué:
—Eiro pimajeitirotsi pinquemisantasanoteri, tempa iriotaque Tasorentsisanori icameetsatasanoti, itsaneacotimpiro. Pantajeiterorica caari cameetsatatsi, eiro yamavetacotimpirotsi eirorica piquemisantiritsi.
20 Icavintsaasanojeivetaquempi cameetsa, iro cantaincha ariorica pojocajeitaquero piquemisantiri, pimpincatsatashiyetanaquearorica pashinipee ijitasorentsitashiyeetari, aitaque iroashinoncaajeitaquempi intsoncajeitempi maaroni. Patsipetarocari pineajeivetacaro oshequi cameetsatasanotatsiri.
21 Ari icantajeitanaji iriori:
—Eiro avishimotanatsi oca; aitaque nompincatsajeitaqueri Tasorentsi.
22 Ari icantanajiri Josué:
—Aviroyeata avirojeitaque cantajeitaintsi; picoajeitaque pantaveeteneri Tasorentsi.
Yacajeitanaque:
—Jee, narojeitaque.
23 Irosati icantantanacari Josué:
—Meeca pojocajeitajeri maaroni pijitasorentsitashiyetari timimojeitimpiri. Pinquenqueshiretasanotajeri maaroni pishirequi Avincatsarite Itasorentsite Israel.
24 Ari icantajeitanaji aisati:
—Queario, aitaque nonquemisantasanojeitaqueri Atasorentsite. Ari nomoncarajeitaquero paitarica incoacayenari.
25 Ari icantavacaasanojeitaca Josué jeri ishanincapee anta nampitsiqui Siquemi.
Yoametaqueri icantacantayetiri Tasorentsi. Isanquenatacotaquero otiminta Icantacantiri. Impoiji yaaque Josué antearo mapi, yoaquero otsitiqui inchato encina catiimotarori Inantari Tasorentsi.
26 -
27 Ari icantiri maaroni ishanincapee:
—Oca mapi irotaque quenqueshireacaajeiteene maaroni icantasanojeitaqueeri Tasorentsi. Irotaque cantacoventajeitempineri avirori, eiroquea pitseeyacantaritsi Tasorentsi.
28 Irosati itiancantajari Josué ishanincapee inampipeequi.
Icamantacari Josué
(Jue. 2.6-10)
29 Ari osamaniiteanaji capichaji, irosati icamantaca Josué itomini Nun, quemisantiriri Tasorentsi. Ocaratanaque 110 irosarentsite.
30 Itijayeetaqueri iipatsitequi iriori pajitachari Timnat-sérah, timatsiri toncaaripeequi iipatsitequi ishanincasanoripeeni Efraín, otiminta aisati toncaari Gaas ocatoncotapaaque.
31 Yora ishanincajeitaniri Israel iquemisantasanotaqueri Tasorentsi ainiroquera yaneini Josué aisati yaneajeitini iriori jivatacantayetatsiniri neasanoyetironiri maaroni imayetaqueri Tasorentsi, yonijaajeitaqueriri.
Itijaquero itonquini José
32 Aisati itijaquero itonquini José Siquemiqui, yamajiri peerani Egiptoqui. Ora Siquem irotaque iipatsite Jacoboni yamanaqueriri itomipeeni Hamor iririni Siquem, ipinaventaquero 100 imentaqui quireequi. Irotaque yashijeitacari ishanincajeitaniri José.
Icamaque iriori Eleazar
33 Impoiji icamaque iriori Eleazar itomini Aarón. Itijaqueri otishitapai iipatsitequi itomi pajitachari Finees, ipaqueriri ishanincapeeni Efraín toncaariquiniri.
