Josué 3:1-17
3 Ari oquitaiteamanaque capichaji quitaite, yora Josué aisati maaroni ishanincapee iponeanaja Sitimiqui irosati yareetimojeitantacaro nijaqui Jordán. Aitaque isavicajeitapaaqueri tequeratsita irimonteajeitearo.
2 Ari avisanaque mava quitaiteri, irosati ijatantaca jivatacantayetatsiri isavicajeitapaaquenta ishanincapee.
3 Icantajeitiri: “Ariorica pineajeitavaqueri antaveeyetatsiri iravisacaanaquero Cajón onantari Icantacantiri Tasorentsi, pijajeiteyea avirori poijajeitanaqueri.
4 Irotaque piojeitanteari jaoca anquenajeitanaqueri, tempa acarajeitica tecatsi ioterone avotsi. Eiroyea piquempejijeitarotsi Cajón, ainti pintimajeitapee nijanta oncarate aparo kilometro.”
5 Yora Josué icantiri maaroni ishanincapee: “Poameetsajeitempa irineacameetsajeitantempiri Tasorentsi; tempa osaitequera ironijayeero caari aneapinijeiti.”
6 Aisati icantiri iriori antaveeyetatsiri: “Aviroyea jivajeitanaintsine amonteajeitantanaqueari, paanaquero Cajón onantari Icantacantiri Tasorentsi.”
Irosati yaajeitantacaro, yavisajeitanaqueri ishanincapee irijivatantanaqueari.
7 Ari icantajiri Tasorentsi Josué: “Meeca nomatacaasanotempiro cameetsatatsiri, iriojeitantanaqueari pishanincapee quiso noaquempi, noquempetiri Moiseshini.
8 Meeca aviro canterine antaveeyetatsiri, jivatacaanaquerone Cajón onantari Nocantacantiri, ariorica irareetapaquearo otsapijaqui Jordán, aitaque incatiajatacaapeerori.”
9 Impoiji icantiri Josué ishanincapee: “Pimpocajeitanaque aca, pinquemisantero icantaquenari Pivincatsarite Tasorentsi.
10 Irotaque ayojeitanteari icarajeitaquee Tasorentsisanori Aneasanotatsiri: ariorica avaajeitanaquea, iriotaque jivatanaqueene, intsoncajeiteri canaaneopee, hititapee, heveopee, ferezeopee, gergeseopee, amorreopee jeri jebuseopee.
11 Pamene, ora Cajón otimantari Icantacantiri Tasorentsi yora pincatsariventirori maaroni quipatsi, ojivatanaquempi omonteacotantanaquea.
12 Meeca pincoyeayete pishanincapee incarate 12 shirampari, aparopeeni ashanincasanoripee acarajeitica 12.
13 Yora antaveeyetatsiri aanaquerone Cajón otimantari Icantacantiri Tasorentsi pincatsariventirori maaroni quipatsi, ariorica iraticaajatapaaquero nija ontencareajatanaque nianqui. Irosati onticaajatantanaquea pocaajatatsiri catonco, eiro oshiaajatanajatsi antearo ovoncaatanaquea.”
Imonteajeitantanacarori nija Jordán
14 Yora ishanincajeitaniri Israel yojocanajiro isavicajeitapaaquenta, ijajeitanaque irimonteajeitantanaquearori nija Jordán. Irio antaveeyetatsiri jivatacaanaquerori Cajón onantari Icantacantiri Tasorentsi, icatiajatacaapaacaro otsapijaqui. (Ineapaaquero nija Jordán oquimojatasanoti, ainiroquera omoncarata yaviitanteetarori panquirentsipee.)
15 -
16 Ari yaaticajatantapaacarori antaveeyetatsiri, irosati oticaajatantanaca catonco otiminta nampitsi Adam, tsipanampitarori nampitsi tantotacotachari Saretán. Aitaque opiojatapaacari, te oshiaajatanaje. Aisati oshiaajatanaca iroori quirincaniri, aatejatantarori incajare Catiojari. Aitaque ocantari opirijatantanacari irosati imonteajeitantanca ishanincajeitaniri Israel. Imontetapaacaro nampitsi Jericó.
17 Irintiquea antaveeyetatsiri, quijacotirori Cajón, irosatiquera icatiajeita nianqui opirijaiteanaquenta Jordán, irosati itsoncajeitantaca yavisajeitanaque ishanincapee intatiquero.
