Josué 5:1-15
5 Maaroni pincatsariyetatsiri amorreopeequi, savicajeitatsiri acaqueroquinta nija Jordán iqueapinitinta catsirincaiteri jeri iriori pincatsariyetatsiri canaaneopeequi, saviquimojeitirori quempeji incajare Mediterráneo, iquemajeitaque yovirijantaquero Tasorentsi ora nija Jordán, imonteajeitantapaacarori ishanincajeitaniri Israel. Ari itsaroacaasanojeitacari catsini, irotaque caari ijatashijeitantari irimanajeitavaqueri.
2 Impoiji icantiri Tasorentsi Josué: “Povetsique mapi cotsiropee, pintoyeantacantajeiteri meeca maaroni pishanincapee.”
3 Ari yovetsicaque Josué cotsiropee itoyeantacantajeitantacariri shiramparipee toncaariqui Aralot, isavicajeitapaaquenta.
4 Aitaque itoyeantajeitanajari caari toyeantajeitachane. Tempa yora maaroni shiramparipee moncarajeitaquero 20 irosarentsipee poneajeivetajanchari Egiptoqui, camajeitaque nianqui caaraiteriqui.
5 Maaroni soquijajeitajantsiri Egiptoqui itoyeantajeita. Irintiquea timayetanajantsiri nianqui caaraiteriqui, te intoyeantajeiteaji.
6 Tempa ocarataque 40 osarentsi yaniijeitaqueni. Irotaque icamajeitantacari maaroni shiramparipee manajeitachaniri poneajeivetajanchari Egiptoqui. Te inquemisantajeiterini Tasorentsi, irotaque icantasanotantacariri: “Eiro pareejeitarotsi quipatsi nocantasanotaqueriri intacantajeitaquempiniri. Coajica nompajeiteri pishanincajeitajeari ora quipatsi oshiocasanoyetapai paitapeerica panquiveerentsiyetatsiri, eiro ocoiteimojeitaritsi.”
7 Irotaque itoyeantacantantacariri Josué itomipeeni ishaninca poyejeitajariri caari toyeantajeitachane, tempa irointita yaniijeitaqueni avotsiqui ipocajeitantacari.
8 Itsoncajeitantacari itoyeantajeitaca, iquempoyeajeitaca ivancojaniquipeequi irosati itecatsijeitantanaja.
9 Impoiji icantajiri Tasorentsi Josué: “Meeca pimataquero pitoyeantacantajeitaqueri, nopeacotacaajeitajimpiro yovashiventaajeivetaquempini egiptosati.” Irotaque ipajitasanotantacarori Guilgal; irosati ocanta meeca opajita.
10 Ainiroquera isavicajeitapaaque inampiqui Guilgal, opampaiteapai Jericó, caratanaque 14 iitaiterite cashiri, ari ishaavijiiteanaji catsirincaiteri, iquimoshireventajeitaquero Yavisantaniri.
11 Ari yoajeitacaro tanta caari tapiacha jero tirico tashiiquiyetachari. Impoiji oquitaiteamanaque irosati yoajeitantacaro panquirentsi shiocayetapaatsiri quipatsiqui Canaán.
12 Irosati te irineajeroji maná iroajeitajearo, irointi intajeitacaro yoajeitapaacaro panquiveerentsiyetatsiri timapaatsiri quipatsiqui Canaán.
Ineaqueri Josué Inampire Tasorentsi
13 Ari aparo quitaiteri ijataque Josué oquempejitapaaque nampitsi Jericó, irosati ineantacari aparo Shirampari yajiriqui isavirite. Ari ijatashitaqueri quempeji, isampitapaaqueri:
—¿Avirompa noshaninca? ¿Carimpimpa? ¿Avirompa quisajeitanari?
14 Ari yacanaqueri, icantiri:
—Caarina pishaninca aisati caarina quisajeitimpiri. Narotaque jivatacaajeitiriri inampirepee Tasorentsi.
Iquemantacariri, irosati itiyeroashitantanacari, yoivotanaca quipatsiqui ipincatsataqueri. Icantaqueri:
—Novincatsarite, ¿paitampa pincantenari?
15 Ari icantanaqueri:
—Pisapatorempa; tempa oca quipatsi irotaque inashitacaari Tasorentsi.
Ari iquemisantaqueri, isapatoreanaca.
