Josué 6:1-27
6 Yora savicajeitatsiri nampitsipeequi oshequi itsaroacaasanojeitacari ishanincajeitaniri Israel. Irotaque yashitasanotantacarori ashitacorontsi, tecatsi queajeitatsine aisati tecatsi soquijajeitatsine.
2 Ari icantiri Tasorentsi Josué: “Noshinetaquempiri savicajeitatsiri nampitsiqui Jericó, pintsoncajeiteri atiripee aisati ivincatsarite jeri manajeivetachari carajeitiriri.
3 Meeca nocoacaaquempi aisati maaroni pishanincapee manajeitachaneri, pishoncajeitearo nampitsi aparopeeni quitaiteri, irosati omoncaratantapempa 6 quitaiteri.
4 Aisati incarataque 7 antaveeyetatsiri iraayetanaque aparopee tiorentsi yovetsiqueetiri itseequi shirampari ovisha, irijivajeitanaqueri anatacojeitanaqueroneri Cajón onantari Nocantacantiri. Iro caratapaatsineri 7 quitaiteri irosati pishoncapinijeitantaquearo nampitsi. Oncarate 7 aisati iriori antaveeyetatsiri intiojeitanaque.
5 Ariorica pinquemajeitaqueri tiorentsipee intiotasanotanaqueri catsini, irosati pincajemasanojeitantanaquea avirori. Ontireantayetanaqueari otantotacoro nampitsi, omparianaque isaaviqui. Irosati pinqueajeitantanaquea pimanajeitanteariri savicajeitatsiri.”
6 Ari yapatotaqueri Josué antaveeyetatsiri, icantiri: “Avirojei aanaquerone Cajón onantari Icantacantiri Tasorentsi. Aisati icantiri caratatsiri 7: ‘Avirojei jivatanaquerone Cajón, paayetanaque tiorentsi.’ ”
7 Impoiji icantiri maaroni ishanincapee: “Pijajeite pishoncajeitearo nampitsi. Irioquea manajeitachaneri, irio jivajeitanaquerine aanaquerone Cajón.”
8 Ari imajeitaquero icantaqueriri Josué. Yora antaveeyetatsiri caratatsiri 7 ijivajeitanaqueri aajeitanaquerori Cajón otimantari Icantacantiri Tasorentsi, aisati itiojeitanaqueri tiorentsipee.
9 Aisati maaroni shiramparipee manajeitachaneri ijivajeitanaqueri antaveeyetatsiri. Irio pashinipee impoijeitanaintsiri, oijajeitaqueriri anatacojeitirori Cajón. Yora antaveeyetatsiri te iroimpacaimateroji itiojeiti.
10 Ari icantasanotaqueri Josué manajeitachaneri: “Ariorica ajajeitanaque, ocameetsati pimajerejeitanaque; irosati noncantantempiri, pincajemasanojeite catsini.”
Itsoncajeitaqueri ishanincajeitaniri Israel savicajeitatsiri Jericóqui
11 Irosati ijatantanaca Josué, icarajeitanaqueri ishanincapee aanaquerori Cajón, ishoncajeitacaro nampitsi. Impoiji ipiajeitanaja isavicajeitaquenta imaajeitapaaji.
12 Ari oquitaiteamanaji capichaji quitaite, itinaamanaja Josué jeri antaveeyetatsiri aapinitirori Cajón.
13 Aisati iriori caratatsiri 7 antaveeyetatsiri tiotirori tiorentsi jeri iriori shiramparipee manajeitachaneri ijivajeitanaji; aisati impoijeitanaji iriori oijatacoventirori Cajón. Ijajeitanaji aisati ishoncajeitajaro nampitsi. Te irimaoreimateji yaniijeiti, aisati iriori antaveeyetatsiri te iroimpacayeroji itiojeiti.
14 Irosati ipiajeitantanaja isavicajeitaquenta. Aitaque icantapinijeitacari irosati omoncaratantaca 6 quitaiteri.
15 Iro caratapaintsiri 7 quitaiteri, tsiteniquera ijajeitamanaque. Irosati ishoncapinijeitantacaro nampitsi ocarataque 7.
16 Ari itiotasanotanaquero antaveeyetatsiri tiorentsi caratapaintsiri 7, irosati icantantacari Josué ishanincapee. “¡Pincajemasanojeite! Yora Tasorentsi ishinejeitaqueero oca nampitsi antsoncajeitero.
17 Icoacaaquee antsoncasanojeiteri catsini savicajeitatsiri aisati maaroni yashiyetari; irotaque icoacaajeitaqueeri. Irointiquea Rahab, antashiyevetariri shiramparipee, eiro airotsi aisati ocarajeitaqueri ovancoqui. Tempa irotaque manavaqueriri chapinqui atiancaqueri amenanontaitirori nampitsica.
18 Aisati eiro catsini aajeitavaquetsi yashiyetari savicajeitatsiri; tempa icoasanotaque Tasorentsi antsoncasanojeitero. Ariorica paayetavaque, irotaque iroashinoncaajeitanteeri maaroni.
19 Irintiquea aajeitavaque oro, plata jero vetsicayetachari bronce aisati ashiroyetatsiri, anquempoyeero Inantariqui; irotaque ashitacayeariri.”
20 Irosati icajemajeitantanaca aisati itiojeitanaquero tiorentsipee opoimatasanotanaque. Iquemajeitantavacarori maaroni ishanincapee, icajemasanojeitanaque catsini; irosati otireantanaca otantotacotaniri nampitsi, oparianaque isaaviqui. Ari ijajeitanaque iqueanaque nampitsiqui.
21 Yoajeitapaaqueri shiramparipee, tsinanepee, evancaripee, anteashiparipee, aisati ivacatepee, irovishatepee jeri iraashinotepee; itsoncasanojeitaqueri catsini.
22 Impoiji icantiri Josué apitetatsiri amenanontaitirori: “Pijate anta ovancoqui antashiyevetariri shirampari, poimisoquijero aisati maaroni ocarajeitiri. Pimoncaratero picantasanojeitanaquerori.”
23 Irosati yoimisoquijantacaro Rahab, iri, iniro, ojariripee aisati maaroni oshanincapee. Yaajeitanaquero isavicajeitapaaquenta, yoisavicapaaquero nijanta.
24 Irosati itaantanacaro nampitsi aisati maaroni timayetatsiniri. Irintiquea yaayetavaque plata, oro jero vetsicayetachari bronce aisati ashiroyetatsiri, iquempoyeaquero Inantariqui Tasorentsi.
25 Irointiquea Rahab te iroyeroji aisati oshanincasanoripee. Tempa irotaque manavaqueriri amenanontaitirori Jericó itiancaqueri Josué. Irosati isaviquimojeitantacari oshanincajeitaniri Rahab ishanincapeeni Israel.
26 Impoiji icantasanoti Josué:“Iroasanquetayeri Tasorentsi coatsineirovetsicajero aisati oca nampitsini.Ariorica irovetsicavetajearo otincami,incame itomi jivatatsiri itimi.Aisati ariorica irovetsicavetajearo ashitacoro,incame iriori impoitatsiri.Iotiro Tasorentsi oca nocantasanotaqueri,aitaque omoncarataquea.”
27 Yora Tasorentsi quiso yoaqueri Josué, yamitacotaqueri. Yora atiripee savicajeitatsiri nampitsipeequi iquemacojeitaquero imataqueri.
