Josué 7:1-26
7 Iro cantaincha ainiro aparo ishanincani iriori Judá pajitachari Acán itomini Carmí, icharine Zabdí, icharine iriori Zérah. Yora Acán yaayetavaque paitapeerica icantavetacariri Tasorentsi Josué: “Pintsoncasanojeitero maaroni.” Irotaque icantacantantajeitacariri maaroni ishanincajeitaniri Israel, iquisasanotantacariri Tasorentsi maaroni.
Itiancaque Josué amenanontirori nampitsi Ai
2 Yora Josué itiancaque aparopee amenanontirori nampitsi Ai. Iponeanacaro Jericóqui irosati yareetantacaro Ai, montetarori Betel iquenapai catsirincaiteri aisati quempejitarori Bet-avén. Ijajeitantaitari yamenanontaitiro.
3 Impoiji ipiajeitajaro, icamantapaaqueri Josué: “Noneaitiro nampitsi, te irishequitasanojeiteji savicajeitatsiri aisati shentajeitirori. Eiro pitiancajeitiritsi maaroni manajeitachari, moncarataca incarate 2,000 teerica, 3,000 manajeiterine.”
Yora savicajeitatsiri nampitsiqui Ai yoaarantaqueri ishanincapeeni Israel
4 Aitaque ocantacari ijajeitanaque, icarajeivetanaca 3,000 imanajeivetapaacari savicajeitatsiri Ai. Iro cantaincha yanaacojeitavaqueri irinti aisati yoimishiajeitavaqueri.
5 Yoaarantavaqueri icarajeitaque 36 ishanincapeeni Israel. Aisati yoijanajeitanaqueri shiajeivetanainchari, iponeanacaro ashitacoroqui nampitsi irosati oirincaiteapai Sebarím. Irotaque icantashirejeitantanacari ishanincapee aisati itsaroasanojeitanaque.
6 Irosati itsereantanacaro Josué iitsaare jeri iriori jivatacantajeitatsiri. Aisati itijainajeitanacaro quipatsivane, yoashiretasanojeitanaca. Ari itiyeroajeitanaca quipatsiqui, yoivotashitanacaro Cajón onantari Icantacantiri Tasorentsi irosati ishaaviniji.
7 Ari icantiri Josué Tasorentsi:
—¡Notasorentsite! ¿Irompa pishinetantaquenari nomonteajeitacaro nija Jordán? ¿Picoaquempa intsoncajeitena amorreopee? ¡Ocameetsaveta nosavicajeitapeme intatiqueronta nija Jordán!
8 ¡Notasorentsite! ¿Paita noncanteri meeca, paita yanaacojeitantavacariri noshanincapee quisajeitanari?
9 Ariorica inquemacojeitaquena cananeopee aisati maaroni savicayetatsiri aca, irosati impocashijeitantaquena irimanajeitena. Intsoncajeitaquenarica, tecatsi inquenqueshireacoyeetajeri. ¿Paita incantajeiteri quemacojeitimpiri avirori?
10 Ari icantanaqueri Tasorentsi:
—¿Paita pitiyeroashitari quipatsiqui? ¡Pincatianaje!
11 Timatsi pishanincapee antajeitaquerori caari cameetsatatsi, te irimoncarajeitero nocantavetaquempiri. Iro cantaincha yaayetavaque paitapeerica intsoncasanotemeri, imanaquero. Itsipataaquero yashiyetari iriori, iovetaca te oncameetsate yantaqueri.
12 Irotaque caari imajeitantari iranaacojeiteri pishanincapee quisajeitimpiri. Yanaacojeitantavacariri irinti, yoimishiajeitavaqueri. Irisati pishanincapee tsoncacantajeitachane. Eirorica meeca pitsoncajirotsi intsipaite nocantaquempiri, eiro quiso noajeitajimpitsi.
13 Meeca pampatoteri maaroni pishanincapee. Pincantajeiteri irovetsicajeiteata, impocajeitanteari osaitequera irampatotimentena. Tempa narotaque Pitasorentsite piquemisantajeitiri, queario nocantaque: ‘Ainiro pishaninca aavaquerori paitapeerica pintsoncasanojeitemeri. Eirorica meeca pitsoncajirotsi timimotaquempiri, eiro pimajeitajirotsi panaacotajeri quisajeitimpiri.’
14 Ariorica impocajeitamanaque maaroni pishanincapee, pinashitacaajeitaqueari aparopee incarajeitaqueri ishanincasanoripee icharine. Niotacantempiriri jaoca itimiri cantacantajeitaquempiri. Iriotaque pinashitacaajeitaqueari ishanincapeeni aparopeeni shiramparipee, niotacantempiriri jaanica cantacaacarori.
15 Yora aaquerori nocantasanovetaquempiri; pintsonquero maaroni, ocameetsati pintaacanteri aisati maaroni ishanincasanoripee jero timimoyetiriri. Tempa yantasanotaquero caari cameetsatatsi, te irimoncarateroji nocantasanovetaquempiri.
Yoyeetaqueri Acán aisati ishanincasanoripee
16 Ari oquitaiteamanaque capichaji quitaite, itinaamanaca Josué, yapatojeitaqueri maaroni ishanincajeitaniri Israel, inashitacaayetacari ishanincasanoripee. Ari iotacaaqueri Tasorentsi Josué, irio antaquerori ishanincasanoripeeni Judá.
17 Irosati yamacantajeitantacari ishanincasanoripeeni Judá, ari yamacantaqueri iriori ishanincasanoripeeni Zérah, aisati yamacantaqueri ishanincasanoripeeni iriori Zabdí.
18 Ari ipocapaaque aparopeeni ishanincasanoripeeni Zabdí. Ari inashitacaacari Acán itomini Carmí, yora Carmí irio itomini Zabdí, yora Zabdí irio itomini Zérah, ishanincasanoripeeni Judá. Ari iotacaaqueri Tasorentsi Josué iriotaque antaquerori caari cameetsatatsi.
19 Ari icantiri:
—Noshaninca, ocameetsati pimpincatsateri Atasorentsite, nocoi pincamantasanotenaro pantaqueri. ¡Eiro pimanapitsatanarotsi!
20 Ari yacanaqueri iriori:
—Jee, queario nantimotaqueri Atasorentsite caari cameetsatatsi. Jeroca nantaqueri:
21 Chapinqui amanajeitantacariri savicajeitatsiniri Jericóqui, naavaque quitsaarentsi cameetsamaotasanotatsiri yovetsicayetiri Babeloniasati jeri imentaqui quireequi icarati 200 aisati oro icarati 600 gramo. Nonevetacari, irotaque nantacariri. Ainiro meeca novancojaniquiqui tsompoina, notijaqueri quireequi aisati iroori quitsaarentsi.
22 Irosati itiancantaca Josué aparopee ishaninca ivancojaniquiqui Acán. Ari ineajiro imanavetacari aisati quireequi yoavetacari tsompoina.
23 Ari yaanaqueneri yapatotimentajeitacarinta Tasorentsi, ineajeitantacarori maaroni ishanincapee.
24 Yora Josué jeri ishanincajeitaniri Israel yaajeitanaqueri Acán oirincaiteacotapai Acor, aisati yaajeitanaquero imanavetacari jeri iriori itomipee, irishintopee, ivacatepee, iraashinotepee, irovishatepee aisati maaroni timimoyetiriri.
25 Ari icantiri:
—¿Paitaquea pantantacarori oca? Poashinoncacantajeitaquee. Meeca iroashinoncaasanojeitempi avirori Tasorentsi.
Icantantacariri, irosati ipichaajeitantacari aisati ishanincasanoripee, irosati itaajeitantacari.
26 Impoiji ipiojeitantanacari mapi; irosati ocanta meeca. Aisati iroori oirincaiteapai, irosati ocanta meeca opajita Acor. Aitaque ocantacari imoncarataquero icantaqueriri Tasorentsi Josué. Irosati icatsimareantaja Tasorentsi iquisajeivetacari ishanincajeitaniri Israel.
