Josué 8:1-35
8 Ari icantajiri Tasorentsi Josué: “Eiro pitsaroitsi aisati eiro picantashiretitsi. Ocameetsati pampatojeitajeri pishanincapee, pijate pimanajeitajeri savicajeitatsiri nampitsiqui Ai. Nomatacayempi pintsoncajeitanteariri ivincatsarite aisati ishanincapee. Ora inampini aisati iipatsitepeeni irotaque pashijeiteari.
2 Ontimatiye pintsoncasanojeiteri savicajeitatsiri nampitsiqui Ai aisati ivincatsarite, piquempejeitaqueri savicantaroniri Jericó aisati ivincatsariteni. Irointiquea yashiyetaniri aisati ivirapeeni, paajeitavaqueri. Povetsicajeitempa pimapocajeitanteariri pimanajeiteri, pishoncajeitanaquero acaqueroca nampitsi.”
3 Irosati yapatojeitantacari Josué ishanincapee irimanajeitantajeariri savicantarori Ai. Icoyeajeitaque icarati 30,000 manajeitachaneri. Itiancaqueri tsiteniriqui.
4 Icantiri: “Pinquemajeitena, pinquenajeitanaque acaqueroca nampitsi, pimanajeitapempa quempeji, aisati povetsicasanojeitapempa pimanajeitanteariri.
5 Irioquea pashinipee, iriotaque noncarajeitanaqueri narori anta nampitsiqui. Ariorica irineajeitavaquena savicajeitatsiri, irishitoashijeitavaquenarica irimanajeitantavaquenari. Impoiji noshiapitsajeitanaqueari, aquempejeitaca chapinqui.
6 Iroijanajeitanaquena ariorica noshiapitsajeitanaqueari, ijitashijeivetaquea yoimishiajeitavajana.
7 Irosati pisoquijajeitantanaquea avirori pimanajeitapaacanta, pimanajeitantapemparori nampitsi. Tempa irio Avincatsarite Tasorentsi aquemisantajeitiri, shinejeitaqueeri antsoncajeitanteariri.
8 Ariorica pintsoncajeitaqueri, irosati pintaantajeitanaquearo inampini. Irotaque icantasanotaqueeri Tasorentsi amoncarateri.”
9 Irosati icantantacari Josué: “Meeca pijajeite.” Ari ijajeitanaque imanajeitapaaca onianquirequi Betel jero Ai iqueapinitinta catsirincaite. Ainiroquera irinti Josué, icarajeitaqueri itsipapee anta isavicajeitapaaquenta, imaajeitanaji.
10 Ari oquitaiteamanaque, capichaji quitaite itinaamanaca Josué, yapatojeitamanajiri manajeitachari. Ari ijivatacaajeitanaqueri icarajeitanaqueri jivatacaajeitiriri ishanincapee, irimanajeitanteariri savicajeitatsiri nampitsoqio Ai.
11 Ijajeitantanacari, yareejeitapaaca iquempejitapaacaro nampitsi irampatequi acaqueroca imontetapaacaro. Aitaque isavicajeitapaaqueri nianqui otimi oirincaiteacoti nampitsi.
12 Aisati imanapaaque Josué carajeitatsiri 5,000 manajeitachaneri nianqui nampitsi Betel jero Ai, iqueapinitinta catsirincaiteri.
13 Aitaque ocantacari inashitacaajeitacari apite. Imanajeitapaaca acaqueroca nampitsi iqueapinitinta catsirincaiteri, irio pashini isavicajeitapaaque irampatequi. Ari yovaajeitanaca Josué tsiteniriqui, irosati nianqui oirincaiteapai.
14 Ineantacariri pincatsaritatsiri anta nampitsiqui Ai ipocashijeitaqueri, ishintsitanaque isoquijajeitanaque irimanajeitantavaqueariri ishanincapeeni Israel oirincaiteacotapai nija Jordán. Te iriotacojeiteaji ainiro pashini ishanincapeeni Israel manajeitapainchari acaqueroca inampi.
15 Ineajeitantavacariri Josué, irosati ishiapitsajeitantanacari anta caaraiteriqui.
16 Ari icantiri pincatsari manajeitachari: “¡Pijajeite, poijanajeitanaqueri!” Irosati yoijanajeitantanacari maaroni Josué jeri manajeitachari carajeitiriri, yojocajeitanaquero inampi.
17 Te intimanaji aparoni shirampari savicanajatsine nampitsiqui Ai aisati nampitsiqui Betel, maaroni yoijanajeitanaqueri ishanincapeeni Israel. Irointita iquenqueshireajeitiro iroijanajeitanaqueri, tecatsi shentajeitanajerone nampitsi.
18 Irosati icantantacari Tasorentsi Josué: “Poanquero meeca pisataamento, pijicotero Ai; noshinetaquempiri pimanajeiteri savicajeitatsiri, pintsoncajeiteri.”
Irosati yoancantanacaro isataamento, ijicotaquero Ai, irimanajeitanteariri.
19 Ineajeitantacarori manajeitainchari, intsipaite isoquijajeitanaque, irosati iqueajeitantanaca nampitsiqui, yoajeitapaaqueri savicajeitatsiri aisati itaapaaquero nampitsi.
20 Ipitsocantajeitanacari oijanajeivetanacariri Josué, ineajeitatiiro inampi ocachaajencatanaque jenoqui. Tecatsi inquenajeitanaque irishiajeitanaque; tempa ipiajeitacari ishanincapeeni Israel shiajeivetanainchari, imanajeitaqueri.
21 Ineantacarori Josué jeri manajeitacharini carajeitiriri itaapaaquero nampitsini yora manajeitapainchari, irosati ipiashijeitantapaacari imanajeitapaaqueri savicantaroniri Ai.
22 Impoiji isoquijajeitanaji iriori taaquerori, iticaajeitavaqueri eiro imatantatsi irishiajeitanaque. Impoiji itsoncajeitaqueri yoajeitaqueri.
23 Irintiquea ivincatsarite te iroyeriji, yaanaqueneri Josué.
24 Itsoncajeitantacariri yoajeitaqueri oijanajeivetanacariri, irosati piashijeitantacari nampitsiqui, yoajeitapaaqueri timaarantavetanainchari.
25 Ora quitaiteri imanajeitantacarori nampitsi Ai, icamajeitaque caratatsiri 12,000 savicajeitatsiniri shiramparipee aisati tsinanepee. Tempa icantani Josué yoancaquero isataamento irosati itsoncasanojeitantacari maaroni.
26 -
27 Ari yaajeitanaqueri ivirapeeni aisati maaroni timimoyetiriniri. Imoncarataquero icantaqueriri Tasorentsi Josué.
28 Aitaque ocantacari itaajeitaquero nampitsini, otireayetanaque otantotacoroni. Irosati ocanta meeca.
29 Yora pincatsaritatsiniri itsatacantaqueri Josué inchatoqui, irosati ishaaviniji catsirincaiteri. Impoiji iqueanaji, yoaniireacantajiri inareanaqueri iqueantapinitarori inampini aisati ipiotantanacanari mapi. Irosati ocanta otimi opiota.
Ineanatiniri Josué ishanincapee Icantacantiri Tasorentsi toncaariqui Ebal
30 Impoiji yovetsicacantaque Josué altar otiminta toncaari Ebal, itaaqueneri Tasorentsi ivirapee.
31 Tempa irotaque icantanaqueriri Moiseshini, quemisantiriri Tasorentsi, irimoncaratacayeriri ishanincajeitaniri Israel isanquenatacotanaqueri Moiseshi: “Povetsiquena altar, eiro poameetsayetirotsi mapipee.” Ari itaasanojeitaqueneri Tasorentsi ivirapee aisati yoajeitaqueneri iraacameetsajeitantajeariri.
32 Impoiji isanquenataquero Josué mapiniqui icantacantayetiri Tasorentsi, ineacojeitaqueri ishanincapee.
33 Ari icatiimojeitapaacaro maaroni atiri Cajón ontimantari Icantacantiri Tasorentsi: jivatacantajeitatsiri, cantacoventantatsiri aisati pashinisatipee saviquimoyetiriri Imonteajeitapaacari antaveeyetatsiri quijacotirori. Inquemantearori tasoncacoventantsi, icatiimotaarantacaro cashetani toncaari Guerizim. Irio pashini catiimotaarantacarori toncaari Ebal. Imoncarataquero icantaqueriri Moiseshini, quemisantiriri Tasorentsi.
34 Impoiji ineanajeitaqueneri Josué aparopeeni icantacantayetiri Tasorentsi, cantacotirori jaoca incanteari itasoncacoventajeitanteariri, aisati paita iroasanquejeitanteariri.
35 Itsoteasanotaqueneri ineanataqueneri maaroni ishanincapee isanquenatacaaqueriri Tasorentsi Moiseshini; tecatsi impeacotaquea. Iquemajeitavaquero shiramparipee, tsinanepee, jananequipee aisati pashinisatipee saviquimoyetiriri.
