Levítico 16:1-34
16 Ari avisanaque icamantacari apite itomi Aarón. Iro icamantacari, iquempejitashitasanotacaro Inantari Tasorentsi. Ari iquenquetsatacaajiri Tasorentsi Moiseshi, icantiri:
“Pincanteri pirenti, eiro iqueashitatsi Nonantariqui timatsiri araquerora oticaashiro otimantari Cajón, iquempejitarocari otataro; icamicari. Tempa aitaque ontimeri mencori nonijantempiri.
2 –
3 Inqueanteari Aarón, incaatavaquetsita aisati inquitsaataquearo cameetsamaotatsiri jero itorosate iroicoteari, aisati ishiticatsaquiro jero isavoinaro; tempa irotaque nonashitacaanariri. Aisati iraye aparo vacajaniqui iroimenterori caari cameetsatatsi, aisati aparo ovisha intaasanoteri.
4 -
5 “Aisati inquempetaquea iriori pishanincapee. Iramaqueneri Aarón apite chiivo, iroimenteneriri caari cameetsatatsi yantayetiri, aisati aparo ovisha intaasanoteri.
6 Impoiji iroyeri vacajaniqui, iroimenterori caari cameetsatatsi yantayetiri iriori aisati yantayetiri ishanincasanoripee, nompeacotantajeanariri.
7 Irosati iramantaqueari apiiteroqueti chiivo piqueapinitiroca Pancotsi papatotimentajeitantanari.
8 Impoiji irovishonquimenteri paitarica, iriotanteari jaoca itimiri irashitacayenari, aisati irashiteari Azazel.
9 Yora chiivo irashitacayenari, iriotaque iroimenterori caari cameetsatatsi.
10 Irioquea itsipani chiivo irashi Azazel, eiro yoiritsi. Ocameetsati iramenari, nompeacotanteanariri yantajeitiri. Impoiji intianqueri anta caaraiteriqui.
11 “Yora vacajaniqui yoimentaquerori Aarón caari cameetsatatsi, yantayetiri iriori aisati ishanincasanoripee, nompeacotantajeanariri.
12 Irosati irantaquea otaapinitantari casancavaneri aisati iroaque omenqui paamari timatsiri antearoqui altar, irosati irantaquea iroori apivanete casancari tononcachari. Impoiji iraanaquero ara oticaashiroqui nonantasanotari.
13 Irosati intaavanetantaquearo oncachaajencatasanotantanaqueari ampataanaquero otataro Cajón onantari Icantacantiri Tasorentsi. Aitaque incantaquerori, eiroquea icamantatsi.
14 Aisati iraye capichaji iriraja vacajaniqui, irosati intsiquirijantaquearo iracotsapaquiqui araquerora otataroqui Cajón aisati acaqueroca, oncarate 7 irampiitaquero.
15 Impoiji irisoquijanaque iroyeri chiivo, iroimentero caari cameetsatatsi yantayetiri pishanincapee. Irosati impiantanajea tsompoina, iraanaquero iriraja intsiquirijero jenioquiji otataroqui Cajón aisati acaqueroca. Inquempetacantaquero itsiquirijantacarori iriraja vacajaniqui.
16 Aitaque oncanteari iroameetsatasanotaquero Nonantari tsompoinaqui; tempa ocaariperotaquero yantayetiri maaroni pishanincapee. Aisati inquempetaquero iroori Pancotsi papatotimentajeitantanari, pisatecajeitaqueri aisati caariperotaquerori.
17 “Tecatsiyea catsini queatsine Pancotsiqui Nonantariqui ainiroqueratatsirica Aarón tsompoina icantacoventiri nompeacotanteanariri yantayetiri iriori jeri ishanincasanoripee, aisati yantajeitiri maaroni pishanincapee.
18 Intsoncanaquerorica, irosati irisoquijantanaquea iroameetsatantearori iroori altar. Impoiji iraye capichaji iriraja vacajaniqui jero iriraja chiivo, irosati impantantaquearo oshevatapeequi aisati acaquerocapeequi.
19 Aisati intsiquirijantaquearo iracotsapaquiqui, oncarataque 7 irampiipinitaquero. Aitaque incanterori iroameetsatantearori; tempa ocaariperotaquero yantayetiri pishanincapee.
20 “Ariorica intsoncayetaque Aarón iroameetsayetaquero Nonantari tsompoinaqui, aisati papatotimentantanari, jero maaroni timayetatsiri aisati altar, irosati iramacantantaqueari chiivo aneatsiri.
21 Impoiji iroanquetero apiiteroqueti iraco iitoqui chiivo, incamantacotantayetearori caari cameetsatatsi yantayetiri pishanincapee. Irosati intiancantaquea aparoni aanaquerine, iroimpacanteariri caaraiteriqui. Aitaque oncanteari impeaquea chiivo caaraiteriqui tecatsinta timatsine, iraanaquero maaroni caari cameetsatatsi.
22 -
23 Irosati inqueantanajea Aarón Pancotsi, isapocajero iitsaare cameetsamaotatsiri iquitsaataca iqueacaapinitiri Nonantariqui noameetsatasanotiri.
24 Aitaque incaateri aisati inquitsaatajea pashini, irosati irisotoantanajea iramanteariri irashi aisati irashi iriori ishanincapee intaasanoteri. Irosati nompeacotantajeanari caari cameetsatatsi yantayetiri aisati iriori pishanincapee.
25 Irointiquea irejipee, ocameetsati intayero altariqui. Yora aanaquerine chiivo joquenerine caaraiteriqui, ocameetsati inquivajero iitsaare aisati incaataje, irosati inqueantapaajea pisavicajeitinta.
26 -
27 “Yora vacajaniqui jeri chiivo iqueacaanaqueri iriraja Nonantariqui, nompeacotantajeanariri caari cameetsatatsi, ocameetsati iraanaquero otsapitapaaca pisavicajeitantari imeshina, ivatsa jero itiapee, intaanteariri.
28 Irioquea yora tayerine, ocameetsati inquivajero iitsaare aisati incaataje. Irosati inqueantapaajea pisavicajeitinta.
29 “Oca nocantacantiri, oncanteani ontime. Ariorica omoncaratapinitea 10 iitaiterite cashiri sietetatsiri, ocameetsati pintijeitempa aisati eiro pantaveejeititsi; aisati inquempejeitea iriori pashinisati saviquimojeitimpiri.
30 Tempa irotaque quitaiteri nopeacojeitantimpirori caari cameetsatatsi pantimotaquenari, picameetsashirejeitantajari.
31 Queario oncanteani oca nocantacantiri. Ora quitaiteri irotaque pashijei nonashitacaaquempiri, pimacoreajeitanteari aisati pintijeitanteari.
32 Yora antaveetatsiri nocoyeaqueri poyeetajearine iriri, iriotaque moncaraterone incantacoventeri pishanincapee, nompeacotanteanariri caari cameetsatatsi yantajeitiri. Aisati inquitsaatearo iitsaare tijachari lino cameetsamaotasanotatsiri nonashitacaari.
33 Iriotaque oameetsantajerone tsompoinaqui Nonanteari cameetsatasanotatsiri otiminta Cajón aisati maaroni papatotimentantanari jero altar. Aisati nompeacojeitanteanariri yantayetiri iriori aisati yantayetiri maaroni pishanincapee.
34 “Irotaque oca nocantacantiri, oncanteani ontime: aparopee osarentsi inqueapinite antaveetatsiri incantacoventapinintanteariri pishanincapee, nompeacotanteanariri caari cameetsatatsi yantajeitiri.”
Ari imataquero Aarón icantaqueriri Tasorentsi Moiseshi.
