Levítico 17:1-16
17 Ari icantiri Tasorentsi Moiseshi:
2 “Pincanteri Aarón jeri itomipee aisati maaroni pishanincapee icantaque Tasorentsi:
3 “Intimerica pishaninca oyerine vaca, ovisha iriorica chiivo,
4 eirorica yamiritsi piqueapinitiroca Pancotsi papatotimentantanari, intaimotantenariri Nonantariqui, iriotaque cantacaashitearone; tempa yaparajatashitacaro iriraja. Eiro meeca ishanincatanajaritsi Tasorentsi.
5 Irotaque otimantari oca nocantacantiri, eiro yoashitaritsi ivira jaocapeerica. Ocameetsati irameneri antaveetatsiri piqueapinitiroca Pancotsi, iroantenariri naacameetsatantajeariri.
6 Iraantavaquearori antaveetatsiri iriraja, intsiquirijantearori altar timatsiri piqueapinitironta Pancotsi papatotimentantanari, aisati intaantenarori ireji noneacameetsajencatasanotiri.
7 Oca nocantacantiri oncanteani ontime, eiroquea itaantayetajanaritsi aisati camaaripee antacaayevetacariri paitapeerica. Ocameetsati pimoncarajeitero oca, aisati iriori pishanincajeitajeari.
8 “Noncantasanotempi aisati: Iriorica pishaninca, iriorica pashinisati saviquimoyetimpiri, ariorica iroashiyeteari jaocapeerica,
9 eirorica yamiritsi Pancotsi yapatotimentantanari, intaantenariri; eiro icaratajiritsi ishanincapee.
Te incoacanteroji Tasorentsi iroyeetearo iririja poshiniripee.
10 “Aisati te noncoacayeri maaroni pishanincapee jeri pashinisati saviquimojeitimpiri iroayetearo iriraja poshiniripee. Jaanicarica oaquearone, nojocajeri eiro icaratajiritsi ishanincapee.
11 Tempa irotaque iriraja oaneiriri maaroni. Irotaque pisaitapinitantearori altar pimpinacoventerori caari cameetsatatsi, nompeacojeitantempirori, eiroquea picamajeitantatsi.
12 “Irotaque nocantantimpiri: Eiro catsini poajeitarotsi iriraja, aisati iriori saviquimojeitimpiri.
13 Jaanicarica quenaveetatsine, iriorica pishanincapee iriorica saviquimojeitimpiri, ariorica inquente camatsatatsiri iriorica vanquitachari, yoyeetari; ocameetsati irojoquero iriraja, intijanaquero quipatsiqui.
14 Tempa irotaque oaneiriri maaroni timayetatsiri. Irotaque nocantantimpiri: Eiro poajeitarotsi iriraja. Jaanicarica oaquearone, ontimatiye irojocayeeteri.
15 “Jaanicarica oayetearine poshiniri camashitachari, iriorica yoarantacari maniti, ocameetsati inquivajero iitsaare aisati incaataje iriori. Eiro icameetsatanajitsi irosati ontsitenijencaiteanaje, impoiji incameetsatanaje.
16 Irompa eirorica iquivajirotsi iitsaare aisati eirorica icaatajitsi, irisati cantacaashitearone.”
