Levítico 19:1-37
19 Ari iquenquetsatacaajiri Tasorentsi Moiseshi icantiri:
2 “Jeroca pincanteriri pishanincapee.
“Pincameetsashiretasanojeitanaque avirori; tempa narotaque Tasorentsisanori Pitasorentsite, nocameetsatasanotaque.
3 “Pimpincatsajeiterii piri aisati piniro.
“Aisati pimoncarajeitero quitaiteripee nonashitacaacari pimaoreantapinijeitearo. Narotaque Tasorentsisanori Pitasorentsite.
4 “Eiro paventaritsi pijitasorentsitashiyetari. Eiro povetsicashiyetatsi paitapeerica pijitasorentsitantearori. Tempa narotaque Tasorentsisanori Pitasorentsite.
5 “Ariorica pamayetenari poimenterori naacameetsatantajempiri, ocameetsati pimoncaratasanotero nocantaquempiri, noneacameetsatantempiri.
6 Yora pamayetenari, ocameetsati poyeari quitaiteriqui poantacariri. Aisati ocameetsati poanontajea poamanajeari. Ariorica irimavatacotaque quitaiteri, ocameetsati pintaajeri. Poaquearirica, eiro noneacameetsatiritsi.
7 -
8 Yora oaquearine timanaque irantane; tempa icaariperotaqueri nonashitacaavetari. Ontimatiye eiro icaratajimpitsi.
9 “Ariorica omoncaratea paviitantarori pivanquire, eiro pitsoncasanotirotsi overapaaca poane, aisati eiro picoyeasanoyetirotsi oitsoqui timaarantanaintsiri.
10 Aisati otimirica poovamashite, eiro paviitasanoyetirotsi oitsoqui aisati eiro paayetirotsi pariiquiyetatsiri. Ocameetsati pojocanaqueneri pishanincapee aisati pashinisatipee caari otimimotasanoyeti paitapeerica. Tempa narotaque Tasorentsisanori Pitasorentsite.
11 “Eiro picoshititsi, eiro pitseeyatsi, aisati eiro pamatavitavacaajeitatsi.
12 “Eiro picantamempearitsi pishanincapee novajiroqui, pamatavitanteariri; picaariperotirocari novajiro. Tempa narotaque Tasorentsi.
13 “Eiro pishintsinatiritsi pishaninca, aisati eiro paitiritsi yashiyetari.
“Eiro picantiritsi antaveetimpiri: ‘Osaitequera nompinatamanajempi.’ Ocameetsati pimpinatiteari.
14 “Eiro poamaimatiritsi mayempiri.
“Eiro poashiyetiritsi maviteajari iravoqui paitapeerica intsitincanteari. Ocameetsa pimpincatsatena. Tempa narotaque Tasorentsi.
15 “Eiro picantacoventantashiyetatsi. Eiro pamitacotashiyetaritsi caari neaperotacha aisati eiro pineapincatsatashitaritsi neaperotachari. Irointi pincantacoventantasanote cameetsa.
16 “Eiro piquenacayetirotsi tseeyantsi poanteneariri pishanincapee.
“Eiro picaratiritsi itsipa oayetiriri pishaninca. Narotaque Tasorentsi.
17 “Eiro piquisanentiritsi pishaninca.
“Otimirica irantane, ocameetsati pincantimenteri, Eirorica picantiritsi, piquempetacari iriori, pantaquero caari cameetsatatsi.
18 “Eiro pipiatantatsi aisati eiro piquisanentashitaritsi picarajeitiri. Pininteri pishaninca, piquempetaca pinintaja avisati. Tempa narotaque Tasorentsi.
19 “Pimatasanojeitero nocantacantiri.
“Eiro pishinetiritsi pivacate iroavitearo pashinipee virantsi, inashiyetanacari irijani.
“Eiro pipanquiyetitsi poanequi pashiniyetatsiri panquirentsi, oconoayetanacacari.
“Eiro piquitsaatarotsi quitsaarentsi conoayetachari paitapeerica.
20 “Intimerica anterone nampirentsi, icashiacayeevetariri pashini shirampari, caariquera ipinacoventeeti aisati ainiroquera iperanayeetaro; ocameetsati impinaventajero. Eiro poacantiritsi; tempa irointi peranarontsi.
21 Yora antaquerori, ocameetsati iramaje aparoni ovisha piqueapinitiroca Pancotsi papatotimentantanari, iroimentajerori yantaqueri. Impoiji incantacoventajeri antaveetatsiri, irosati nompeacotantajeanari yantaqueri.
22 -
23 “Ariorica pareejeitaquearo quipatsi, pimpanquiyetapeerica pichochoquimashite, eiro poitarotsi oitsoqui oncarate mava osarentsi. Pinquempetacantero te oncameetsateji.
24 Ariorica oncaratapaaque 4 osarentsi, ocameetsati payero oitsoquipee pashitacayenaro, pimpasonquitantenari.
25 Iroquea oncaratapaaquerica 5 osarentsi ontimasanotanaque oitsoqui, impoijiquea poajeitearo avirori. Tempa narotaque Tasorentsisanori Pitasorentsite.
26 “Eiro poacotarotsi poshiniri iriraja.
“Eiro picoitsi pisheripiarite, aisati eiro picoitsi piotashiyetearo avisayetatsineri coajicani.
27 “Eiro pameetirotsi piishi pincaarapatiitotanteari, aisati eiro pitotirotsi overaapaaca pishipatona.
28 “Eiro pitoyetirotsi pivatsa ariorica pincamaarante. Aisati eiro pisatoncaatacoyetarotsi shiacantsi pivatsapeequi. Tempa narotaque Tasorentsi.
29 “Eiro pishinecoventirotsi pishinto ompempa antashiyetariri shiramparipee, picaariperotirocari. Otimasanotanaquecari caari cameetsatatsi piipatsitequi.
30 “Pimaoreantapinijeitearo quitaiteri sábado nonashitacaari, aisati pimpincatsatero Nonantari. Tempa narotaque Tasorentsi.
31 “Eiro paventaritsi quenquetsatacairiri camayetatsiri aisati iotashiyevetarori paitapeerica. Tempa ari nonquempetacantaquempi pipitsitasanotaque. Tempa narotaque Tasorentsisanori Pitasorentsite.
32 “Ocameetsati pimpincatsateri anteashipari, aisati narori pimpincatsatena. Tempa narotaque Tasorentsi.
33 “Eiro poashinoncairitsi pashinisati saviquimojeitimpiri.
34 Pinquempetacanteri pishanincasanori, ocameetsati pincavintsayeri oquempetaca picavintsaajeitaja avisati. Tempa piquempejeitacari iriori pashinisati pinajeitaque pisavicantajeivetacaniri Egiptoqui. Narotaque Tasorentsisanori Pitasorentsite.
35 “Eiro pamatavitavacantarotsi moncaramentotsiyetatsiri: iroorica metro, tenayetatsiri jero litropee.
36 Ocameetsati pimoncaratantearo cameetsa moncaramentotsipee, tenatatsiri aisati tsantsatatsiri. Narotaque Pincatsari Pitasorentsite oimishitoajimpiri Egiptoqui.
37 “Irotaque nocantantimpiri pimatasanojeitero nocantacantiri, pimoncarajeitero maaroni. Narotaque Tasorentsi.”
