Levítico 2:1-16
2 “Ariorica iramayete pishaninca ipanquiyetiri impayetenari, ocameetsati iramaque tirico cameetsavanetasanotatsiri, irisaitaquero quejitsi aisati casancavaneri.
2 Ari iramaqueneri itomipee Aarón. Impoiji aparoni icaratiri iraavaquero capichaji, irosati intaantaquearo altariqui. Irotaque inquenqueshiretantearori noneacameetsajencatasanotaquero oca itaaquenari.
3 Ora timaarantaintsiri nonashitacaacaro, te onquempetearoji pashinipee itaayetanari, ocameetsatasanotaque. Irotaque irashiteari iriori Aarón aisati irishanincajeitajeari.
4 “Ariorica iramayete ivanquire impapinitenari, ocameetsati iramaque tanta tashitachari, conoachari quejitsi aisati pochayetatsiri. Eiro yamirotsi conoachari tapiacaarori.
5 “Aisati onquempetea iroorica iramaque cheerencachari, ocameetsati irovetsique cameetsavanetasanotatsiri tirico inconoaquero quejitsi. Eiro iconoirotsi tapiacaarori.
6 Impoiji intsiquirijaquero quejitsi, irotaque iramenari.
7 “Aisati iroorica iramena cheerencachari, ocameetsati irivetsiquero cameetsavanetasanotatsiri tirico conoachari quejitsi.
8 Ariorica omposatanaque, ocameetsati iraanaquenaro impapeeri antaveetanari. Impoiji iraanaquero iriori anta altariqui.
9 Aitaque iravaqueri antaveetanari capichaji, intayenari altariqui inquenqueshiretantearori, noneacameetsajencatasanotaquero oca itaaquenari.
10 Ora timaarantaintsiri nonashitacaacaro, te onquempetearoji pashinipee itaayetanari; irointi ocameetsatasanotaque. Irotaque irayeri iriori Aarón aisati irishanincajeitajeari.
11 “Ariorica iramena tiricovane intaanteariri altariqui, eiro itsipatairotsi conoachari tapiacaarori aisati conoachari ija pitsi.
12 Ariorica iramenaro intarori oitsoquite ivanquire, ocameetsati intsipatayero tanta conoachari tapiacaarori aisati ija pitsi. Iro cantaincha eiroquea itairotsi irointi; tempa te onquempetearo noneacameetsajencatasanotiri.
13 “Maaroni pamayetenari ocameetsati pintiviyetero, eiro pamashiyetarotsi; tempa nocarajeitaquempi.
14 “Ariorica pamayetena pivanquire iroaquerari paviiti, ocameetsati pamaque sampatasanotanaintsiri tashiiquitachari aisati eerequi tononcaitachari.
15 Ocameetsati pisaitero quejitsi jero casancavaneri. Tempa irotaque oitsoqui pivanquire.
16 Impoiji intayenaro antaveetatsiri capichaji ora tononcainchari aisati saitainchari quejitsi, intsipataquero casancavaneri. Irotaque inquenqueshiretantearori itaaquenaro ipincatsatantanari.
