Levítico 20:1-27
20 Ari iquenquetsatacaajiri Tasorentsi Moiseshi icantiri:
2 “Jeroca pincanteriri pishanincapee: Intimerica pishanincapee aisati iriorica pashinisati saviquimojeitimpiri, tayenerine itomipee ijitasorentsiyeetiri Moloc, ocameetsati impicheeri picarajeitiri.
3 Aitaque noasanquetaaqueri, nontsoncaqueri, eiro itimajitsi. Tempa icaariperotaquero Nonantari aisati icaariperotaquero Novajiro; itseencasanotaquena.
4 Ariorica iramenashijeitaqueari, teerica incoyeji iroyeri, irosati noasanquetantaqueari iriori aisati ishanincasanoripee. Aitaque nompoyereaqueri nontsipataaqueri icarajeitaqueri icaariperojeitacaacari Moloc.
5 -
6 Aisati intimerica aventearine ishire camayetatsiri, aisati iotashiyevetarori paitapeerica; tempa iquemisantashitacari icaariperotaca irisati. Aitaque noasanquetaaqueri, nontsoncaqueri eiro itimajitsi.
7 “Pinashitasanojeitanaquea aisati pincameetsashiretasanotanaque. Tempa narotaque Tasorentsisanori Pitasorentsite.
8 Pimatasanojeitero nocantacantiri, pimoncarajeitero. Tempa narotaque Tasorentsisanori nashitacaasanotaquempiri.
9 “Jaanicarica oamaimaterine iriri iroorica iriniro, ocameetsati iroyeeteri. Irisati oacantajanchane; tempa icantimataqueri iriri.
10 “Intimerica antacoterine ijina ishaninca, yaimentacaro ijina aisati aimentacari ojime. Ocameetsati iroyeeteri apiiteroqueti.
11 “Intimerica oonaiterine ijina iriri, te impincatsateri irisanori, ontimatiye iroyeeteri apiiteroqueti. Irisati oacantajanchane.
12 “Intimerica anterone iraniro, ocameetsati iroyeeteri apiiteroqueti. Irisati oacantajanchane; tempa yantasanotaquero catsini caari cameetsatatsi.
13 “Intimerica oonayerine ishiramparirinte inquempetacantero tsinane, ontimatiye iroyeeteri apiiteroqueti Irisati oacantajanchane; tempa yantasanotaquero catsini caari cameetsatatsi.
14 “Intimerica shirampari jinantearone irishinto aisati iniro, yantasanotaquero catsini caari cameetsatatsi. Ontimatiye irojoqueeteri paamariqui intayeeteri aneatsiquera, eiroquea ishequiantanacatsi antayeterone caari cameetsatatsi picarajeitiri.
15 “Intimerica antayeterine virantsi, ocameetsati iroyeeteri, aisati iriori virantsi.
16 “Ontimerica tsinane antacaayetearine virantsi, ontimatiye iroyeetero aisati iriori virantsi. Irosati oacantajanchane.
17 “Intimerica jinantajearone iritsirosanori, iroorica iritsirotsori; tempa yantajiro ishanincasanori; yoashiventaajeitaqueri ishanincapee. Ontimatiye intianqueeteri jaocarica, irineajeitanteariri maaroni. Tempa yantasanotaquero caari cameetsatatsi; irisati cantacaacaro.
18 “Intimerica oonayerone tsinane neaventachari, yantacotitaquero iraja, ontimatiye intianqueeteri apiiteroqueti jaocarica. Eiro icarajeitajiritsi ishaninca.
19 “Eiro pantayetirotsi pinirotsori aisati pairo; tempa irotaque pishanincasanori. Yora antaquerone ishanincasanori, apiiteroqueti irashinoncaimentearo caari cameetsatatsi.
20 “Intimerica oonaiterine iriritsori ijina, te impincatsateri. Timanaque irantane apiiteroqueti. Incamashitaquea, eiro itimitsi itomipee.
21 “Intimerica aapitsaterine ijina irirenti, te impincatsateri. Te oncameetsateji catsini yantaqueri. Eiro itimitsi itomipee.
22 “Ocameetsati pimatasanojeitero nocantacantiri. Pimoncaratero maaroni, eiroquea nojocantimpitsi piipatsitequi, naanajempita pisavicajeitantapaajeari.
23 Eiro pantayetapairotsi yantajeitiri atiripee savicayetatsiri. Te oncameetsateji catsini yantapinijeitiri, eiro namavetajirotsi. Irotaque nojocanteariri.
24 Tempa nocashiacaasanotaquempiro pashijeitajearo isavicantajeivetari. Narotaque pempirone quipatsi pisavicajeitantajeari, oshiocasanoyetapai paitapeerica panquirentsiyetatsiri.
“Tempa narotaque Tasorentsisanori Pitasorentsite nashitacaaquempiri, te pinquempejeiteariji itsipapee atiri.
25 Irotaque ocameetsatantari avirori pinashitacayeteari poshiniripee pintayenari aisati caari pintayena: camatsayetatsiri, vanquiyetachari, noshicayetachari aisati cameetsatatsiri, caari cameetsatatsi jeri yoyeetari aisati caari yoyeeyeta; eiro picaariperotacaaritsi.
26 Ocameetsati pincameetsatasanojeitanaque; tempa narotaque Tasorentsisanori nocameetsatasanotaque narori. Nonashitacaaquempi noshanincatasanotantempiri. Te pinquempejeiteariji pashinisatipee atiri.
27 “Yora shirampari iroorica tsinane itimantacari camaari, aisati iotashiyetarori paitapeerica avisayetatsine; ontimatiye impicheeri irosati incamantaquea. Irisati oamaacantajanchane.”
