Levítico 22:1-33
22 Ari iquenquetsatacaajiri Tasorentsi Moiseshi icantiri:
2 “Pincanteri Aarón aisati irishanincajeitajeari, ocameetsati iraamaventacotearo cameetsatasanotatsiri inashitacaanari ishanincajeitaniri Israel. Eroquea icaariperotimotantanarotsi. Tempa narotaque Tasorentsisanori.
3 “Pincantajeiteri meeca aisati coajicani yora irishanincajeitajeari, ariorica icaariperotaca iromaquenarorica cameetsatasanotatsiri inashitacaayetarori ishanincajeitaniri Israel; te oncameetsateji. Ocameetsati pojoqueri. Narotaque Tasorentsisanori cantatsiri.
4 “Eiro itimitsi irishanincajeitajeari Aarón mantsiati aaqueririca patsaarontsi, teerica, yaparajatiro ishiramparitantari. Eiro yoarotsi paitapeerica cameetsatasanotatsiri inashitacayeetanari. Irosati iravisacotantajeari.
“Yora antaquerine caariperotacantatsiri, iriorica camatsiri, teerica, yantitaqueri aparajatirori ishiramparitantari,
5 irompa icaariperotacaacaririca, yantaqueri noshicayetachari, teerica, yantaqueri shirampari mantsiatatsiri; irotaque eiro icameetsatantanajatsi.
6 Eiro icameetsatanajitsi irosati ontsitenijencaiteanaje, aisati eiro yoajarotsi inashitacaayeetanari, tequerarica inquivajea. Ariorica inqueanaje catsirincaiteri, cameetsatanaji ini. Impoijiquea iroajearo cameetsatatsiri inashitacaayeetanari; tempa irotaque yopinitari.
7 -
8 Te oncameetsate iroyeari ivatsa camashiyetachari, iriorica yatsicayetiri maniti, icaariperotacaaricari. Tempa narotaque Tasorentsisanori.
9 “Pincanteri, ocameetsati irimoncaratero nocantacantiri, eiroquea otimantatsi irantane aisati eiro icamajeitantatsi. Tempa narotaque Tasorentsisanori nashitacaacariri.
10 “Te oncameetsateji iroyearo oanarontsi nonashitacaari caari antaveetatsine, aisati maimotiriri ivancoqui jeri iveranaro.
11 “Ariorica iramanante antaveetatsiri iveranaro, ocameetsati iroyearo nonashitacaari, aisati maaroni itomipee timaintsiri ivancoqui.
12 “Otimirica irishinto antaveetatsiri aaquerica ojime caari ishanincasanori, eiro yoarotsi ipeeyetiriri antaveeyetatsiri.
13 Irompa ariorica incamaque ojimeni, teerica yojocashitajaro, aisati te intime otomipee, ompianajerica ivancoqui iri oquempetaca osavicashitani; ocameetsati oacotajeari yoari. Irintiquea itsipasatipee caari antaveeyetatsi, eiro catsini yoarotsi.
14 “Jaanicarica oashitaquearone nonashitacaari, ocameetsati iroimpiajeneri antaveetatsiri yoitacariri, iroanaajeneri aisati capichaji.
15 Eiro ishinetiritsi antaveetatsiri ishanincapee incaariperotacantero paitapeerica ipaquenari, otimasanoticari irantane iroaquearorica cameetsatasanotatsiri. Tempa narotaque Tasorentsisanori nashitacaacarori.”
16 -
Cameetsayetatsiri virantsi iramayeteri.
17 Ari icantiri aisati Tasorentsi Moiseshi:
18 “Pinquenquetsatacayeri Aarón aisati itomipee, jeri aisati maaroni pishanincapee; pincanteri: Ariorica intaasanotenari ivira pishaninca aisati pashinisati saviquimojeitimpiri, irimoncaratero icashiacaanari aisati iriorica ipashitanari;
19 ocameetsati iramaque aparoni shirampari vaca, iriorica ovisha jeri chiivo. Ocameetsati iramaque cameetsatasanotatsiri noneacameetsatanteariri. Eiro yamashitaritsi amashitachari; eiro noneacameetsatiritsi.
20 -
21 “Ariorica iramayetena iroimenterori naacameetsatantajeariri, irompa iroorica irimoncaratero icashiacaanari aisati iriorica ipashitanari; ocameetsati iramaque vaca iriorica ovisha caari amashitacha, noneacameetsatanteariri.
22 Te oncameetsate iramenari maviteajari, piticayetachari, caarapontsoquiri, matsari, patseyetatsiri aisati quitejayetatsiri imeshinaqui. Eiro itaayetanaritsi altariqui yocapee.
23 Ariorica iramashitenari vaca, iriorica ovisha, teerica omoncaratavacayeaji iiti yamashiquiitaca, cameetsataque. Iro cantaincha iroorica iramimentero irimoncaratantearomeri icashiacaanari, eiro noneacameetsatiritsi.
24 Aisati eiro yamanaritsi amashitachari iyashiitsoqui, aisati yaitsoquiyeetiri. Eiro pamashiyetanaritsi piipatsitequi pisavicajeitapaajenta.
25 Aisati eiro yairitsi amashiyetachari, impayeveteariri pashinisati incashiacantenariri, eiro noneacameetsatiritsi.”
Irineacameetsatanteariri Tasorentsi virantsi iroyeneriri.
26 Ari icantajiri Tasorentsi Moiseshi:
27 “Ariorica intimanaque vacajaniqui, iriorica ovishajaniqui jeri chiivojaniqui, intimavaquetsita iriniroqui irantsotavaquetsita oncarataque 7 quitaiteri. Ariorica oncaratapaaque 8 quitaiteri noneacameetsataqueri, moncarataca pintaantenariri.
28 “Eiro pitsonquitaritsi iroyeri aparoni quitaiteriqui vaca, iriorica ovisha jeri aisati irijani.
29 “Ariorica pamenari pimpasonquitantenari, ocameetsati pimoncaratenaro nocoacaaquempiri, noneacameetsatantempiri.
30 Aisati ocameetsati poyeari quitaiteriqui poantaquenariri, eiro poanontajatsi poamanajeari. Tempa narotaque Tasorentsisanori.
31 “Ocameetsati irimatasanojeitero nocantacantiri, aisati irimoncaratero maaroni. Tempa narotaque Tasorentsisanori.
32 “Eiro piquempetacantanatsi paitapeerica, ocameetsati pimpincatsatasanojeitena. Tempa narotaque Tasorentsisanori nashitacaaquempiri. Narotaque Tasorentsisanori oimishitoajeitajimpiri peerani Egiptoqui, Nontasorentsitantempiri.”
33 –
