Levítico 23:1-44
23 Ari icantajiri Tasorentsi Moiseshi:
2 “Pincanteri pishanincapee: Jero oca quitaiteri inashitacaacari Tasorentsi. Te onquempetearoji otsipapee quitaiteri, ocameetsatasanotaque. Irotaque pampatotimentapinijeitanteariri.
3 “Ocameetsati irantaveetapinijeite oncarate 6 quitaiteri. Iro 7 quitaiteri, irimaoreajeite. Eiro yantaveetantarotsi, irointi irampatotimentajeitena jaocapeerica irisavicayeteri. Oca quitaiteri irotaque irimaoreantapiniteari aisati impincatsatantenari.
4 “Irotaque oca quitaiteri nonashitacaari, ocameetsatasanotaque. Irotaque irampatotimentapinijeitantenari inquimoshireventajeitena, impincatsajeitena.
Inquimoshireventapinitantearori Yavisantaniri.
(Núm. 28.16-25)
5 “Yora intanajarori aparo cashiri, iro 14 quitaiteri, ariorica irishaavijiiteanaje, inquimoshireventero Yavisantaniri, impincatsatantenari. (Icanteetiro oca Pascua.)
6 “Iro 15 quitaiteri irisati cashiri, inquimoshireventero iroori tanta caari conoacha tapiacaarori, impincatsatantenari. Oncarate 7 quitaiteri iroapinitearo tanta caari tapiacha.
7 Ora quitaiteri irintantanaquearori inquimoshireventero, irampatotimentajeitavaquearotsita, eiro catsini yantaveejeititsi.
8 Aisati irintanaquearo intaapinitenari yamayetanari, irosati omoncaratanteari 7 quitaiteri. Impoiji irampatotimentajeitena maaroni catsini. Tecatsi antaveetatsine.”
Inquimoshiventapinitantearori intarori yaviitiro ivanquire.
(Núm. 28.26-31)
9 Icantiri aisati Tasorentsi Moiseshi:
10 “Jero oca pincanteriri pishanincapee: Ariorica irareejeitaquearo quipatsi nomperiri, iraviiyeterorica itiricote, ocameetsati iramaqueneri antaveetatsiri intarori oanayeta ivanquire iroisovatitanaquero.
11 Ariorica onquitaiteamanaje quitaiteri pimaoreajeitantari, impoiji irayero antaveetatsiri iroanquenaro inashitacaanari noneacameetsatantearori.
12 Ariorica iramaquero tirico oisovatitachari, aisati iramaque aparo ovishajaniqui cameetsatasanotatsiri moncarataquerori aparo irosarentsite. Iriotaque intaasanotenari impincatsatantenari.
13 Aisati iramaque 4 kilo ari nianqui cameetsavanetatsiri tirico conoavatsatachari quejitsi, aisati iramaque aparo litro ovaja irisaitantavaquearori intayenari, noneacameetsajencatasanotantearori.
14 Tequeratsitarica iramayetenaro ocapee, eirotsita yoajeitarotsi vetsicachari tanta aisati tirico tashiiquitachari jero janaquiro. Oca nocantacantiri, oncantaitatiyempani. Irotaque irimoncarajeiteri irishanincajeitajeari jaocapeerica irisavicayeteri.
Iriveshireimentapinitearo omoncaratearica 50 quitaiteri.
15 “Ariorica avisanaque quitaiteri imaoreantari yamantaquenarori oisovatitachari tirico, onquitaiteamanaquerica; aitaque irintanaquearori irimoncaratero 7 tomincopee.
16 Irosati omoncaratantajeari quitaiteri imaoreajeitantari, irotaque omoncaratanteari 50 quitaiteripee. Impoiji iramajenaro aisati iroaquerari tirico inashitacaanari.
17 Aisati iramayetaque ivancoqui apitepee tanta vetsicachari tirico cameetsavanetatsiri, conoachari tapiacaarori, oncarate 4 kilo aparopeeni. Irotaque incashiacayenari jivatatsiri oitsoquiyeti ivanquirepee.
18 Ariorica iramaque tantapee, aisati iramaque 7 ovishajaniqui caari amashiyetacha moncarataquerori aparo irosarentsite; aisati aparo vacajaniqui jeri apite ovisha, intsipataaquero ivanquire jero ovaja. Iriojeitaque intayenari, noneacameetsajencatanteariri.
19 “Aisati iramaque chiivo iroimentajerori caari cameetsatatsi, jeri apite ovisha moncarataquerori aparo irosarentsite, iroimentajerori, naacameetsatantajeariri.
20 Impoiji irayeri antaveetatsiri apiitero ovishajaniqui, iroanquenari aisati intsipataaqueri tantapee. Irotaque nonashitacaanariri iriori antaveetatsiri.
21 “Irotaque oca quitaiteri irampatotapinijeitanteari inquimoshireventajeitero. Eiro yantaveejeitantaro paitapeerica. Oca nocantacantiri oncantaitatiyempani. Irotaque irimoncarajeitajeri irishanincatajeari jaocapeerica irisavicayeteri.
22 “Ariorica omoncaratea iraviitantearori ivanquirepee, eiro itsoncasanotirotsi iraviitero overapaaca iroane. Aisati eiro icoyeasanoyetirotsi oitsoqui timaarantanaintsiri. Ocameetsati irojocanaqueneri ishanincapee aisati pashinisati caari otimimotasanoti paitapeerica. Tempa narotaque Tasorentsisanori Pitasorentsite.”
Inquimoshireventantearori itiotanteetarori tiorentsi.
(Núm. 29.1-6)
23 Ari icantiri Tasorentsi Moiseshi:
24 “Jero oca pincanteriri pishanincapee: Ora intanajearone quitaiteri, sietetapaatsiri cashiri, aparo quitaiteri pimaoreajeitantari nonashitacaari, ocameetsati pampatojeitea maaroni pinquimoshireventajeitero itiotanteetarori tiorentsi.
25 Aisati irotaque intaantenariri ivira impincatsatantenari. Eiro catsini yantaveejeitantarotsi.”
Quitaiteri ipeacotantarori Tasorentsi caari cameetsatatsi.
(Núm. 29.7-11)
26 Icantiri Tasorentsi Moiseshi:
27 “Irisati cashiri sietetatsiri, iro 10 quitaiteri, irotaque quitaiteri nompeacotantempirori caari cameetsatatsi. Ocameetsati irampatotimentajeitena, intijeitempa, aisati intayenari ivira impincatsatantenari.
28 Eiro yantaveejeitantarotsi; tempa irotaquequitaiteri nompeacotantempirori caari cameetsatatsi. Tempa narotaque Tasorentsisanori Pitasorentsite.
29 Jaanicarica caari titachane quitaiteriquica, ocameetsati irojoqueeteri, eiro icarajeitajiritsi ishanincapee.
30 Aisati antaveetantaquearoneri, nompeajeri, eiro icarajeitajiritsi ishanincapee.
31 “Eiro catsini yantaveejeitantarotsi. Oca nocantacantiri oncantaitatiyempani. Irotaque irimoncarajeiteri iriori pishanincajeitajeari aisati itomipee jaocapeerica irisavicayeteri.
32 Irotaque oca quitaiteri irimaoreantapinijeiteari aisati intijeitempa. Ocameetsati irintanaquearo ishaaviniji ora quitaiteri 9 irisati cashiri sietetatsiri, irosati onquitaiteamanaque, ari ishaaviniji irovecaraanajero.”
Inquimoshireventantearori ivancoshetajaniquipee.
(Núm. 29.12-40)
33 Icantiri Tasorentsi Moiseshi:
34 “Jeroca pincanteriri pishanincapee: Ora quitaiteri 15 irisati cashiri sietetatsiri, ocameetsati inquimoshireventero yovetsicantayetarori ivancojaniquipee, impincatsatantenari oncarate 7 quitaiteri.
35 Irintanaquearorica irampatotimentajeitena, eiro catsini yantaveejeitantarotsi.
36 Oca caratatsineri 7 quitaiteri, ocameetsati intaapinitenari icashiacayetanari, impincatsatantenari. Iroquea onquitaitetamanaque 8, irosati irampatojeitantajea aisati, intaajenari ivira. Irotaque oca inquimoshireventapinijeitantenari, eiro catsini yantaveejeitantarotsi paitapeerica pomerentsitasanoyetachari.
37 “Irotaque oca quitaiteripee nonashitacaacari, irampatotimentapinijeitantenari iramapinijeitantenarori icashiacayetanari: intaimenterori caari cameetsatatsi, intaasanoyetenari ivanquirepee, iroimenterori naacameetsatantajeariri, aisati ovaja itsipatairori itaayetanari. Ocameetsati iramapiniyetero aparopeeni quitaiteri nonashitacaayetacari.
38 Irointiquea imaoreapinijeitantari, ipincatsatantanari, aisati iramapinijeitantenarori impashiyetenari jero icashiacaanari.
39 “Ora quitaiteri 15 irisati cashiri sietetatsiri, ariorica intsoncaquero yaviiyetaquero ivanquirepee, ocameetsati inquimoshireventero, impincatsatantenari oncarate 7 quitaiteri. Irintanaquearo quitaiteri imaorejeitantari irosati ochotapaatsine, irimaorejeitantajeari aisati.
40 Ora intarori quitaiteri, ocameetsati iraajeite cochoquipee ontime inchato cameetsayetatsiri aisati compiroshipee, inchashimpopee, jero pashini shiocayetatsiri nijaqui icanteetiri álamo. Irotaque inquimoshireventajeitantenari oncarate 7 quitaiteri; tempa narotaque Tasorentsisanori Pitasorentsite.
41 Ocameetsati inquimoshireventapinijeitero oca aparopee osarentsi, oncarate 7 quitaiteri yora cashiri sietetatsiri impincatsatantenari narori Tasorentsisanori. Oca nocantacantiri, oncantaitatiyempani impincatsajeitena. Irotaque irimoncarajeiteri aisati iriori irishanincajeitajeari.
42 Oca quitaiteri caratatsineri 7, ocameetsati irisavicantajeitearo pishanincapee ivancoshetajaniquipee.
43 Irotaque inquenqueshiretapinijeitantearori pishanincatajeari coajicani, peerani noimishitoajeitantajimpiri Egiptoqui. Tempa irotaque pisavicantajeitacari pivancoshetajaniquipee. Narotaque Tasorentsisanori Pitasorentsite.”
44 Irotaque icantaqueriri Tasorentsi Moiseshi. Ari icamantaqueri iriori ishanincapee oca quitaiteripee inashitacaayetacari Tasorentsi.
