Levítico 25:1-55
25 Iquenquetsatacantacariri Tasorentsi Moiseshi toncaariqui Sinaí. Icantiri:
2 “Jero oca pincamanteriri pishanincapee: Ariorica pareejeitaquearo quipatsi nompempiri, ocameetsati pishinetero quipatsi omaoreavaquetsita, pimpincatsatantenari.
3 Ocameetsati pantaveetapinite poanequi aisati pintojempequitantayetearori povamashite jero paviitantayetearori oitsoquipee oncarate 6 osarentsi,
4 Iroquea sietetapaatsiri osarentsi, ocameetsati pishinetero quipatsi ontimashitavaqueata, pimpincatsatantenari. Eiro pipanquiveetantajarotsi aisati eiro pitojempequitantayetajarotsi povamashite, ocantavacatsita quipatsi iroori.
5 Aisati eiro pipesayetajirotsi tirico shiocashiyetanajanchaneri poveraantavacarori paviitavajiro. Aisati eiro picoyeayetirotsi oitsoquipee povamashite caari pitojempequiyeti, omaoreasanoteta iroori quipatsi.
6 Maaroni shiocashiyetanajanchaneri osarentsiqui pimaoreantari, irotaque poajeiteari iriori aisati piveranaropee, antaveeyetimpiri, jeri pashinisatipee saviquimoyetimpiri, aisati pivirapee jeri covencatatsiri, camatsayetatsiri timayetatsiri quipatsiqui.
7 -
Osarentsi Yoipacanteetarori.
8 “Ocameetsati pimoncaratero 7 otomincotepee osarentsi, irosati omoncaratantaquea 49 osarentsipee.
9 Yora cashiri caratapaatsineri 7 iro 10 quitaiteri, irotaque nopeacotantarori caari cameetsatatsi. Ocameetsati pintiotero itseequi ovisha, ojajencatanaque maaroni nampitsipeequi.
10 Ariorica omoncaratapaaquea 50 osarentsi pincamantacotero nonashitacaacaro: ocameetsati pineacameetsatasanojeitero. Pincamanteri pishanincapee: ‘Oca osarentsi irotaque irashi peranarontsipee pishinejeitantajeariri impiashijeitanajeri ishanincasanoripee aisati iipatsitepeequi irisavicajeitapaajeta.’
11 Ora caratatsineri 50 osarentsi, irotaque poimpacaajeitantearori pantaveerepee, eiro pipanquiveeyetajitsi, eiro pipesacoyetajirotsi tirico shiocashiyetanajanchaneri, eiro pitojempequiyetajirotsi povamashite aisati eiro paviiyetajirotsi oitsoquipee.
12 Tempa irotaque osarentsi cameetsatasanotatsiri oipacaacoventajeitimpiri. Irointi poapinijeitea shiocashiyetanajachari.
13 “Oca osarentsiqui poipacantarori pantaveere, oshinetanta paayetajero maaroni piipatsitepee.
14 Intimerica pimanterone iipatsite, irompa iriorica itsipa amananterone, eiro yamatavitavacaimentarotsi;
15 yora amananterone, ocameetsati impinatero osarentsipeequi jaocarica oncarate irantaveetapinitantearo, irintanaquearo Osarentsi Yoipacaacoventanteetajariri. Aisati pimanterone, ocameetsati incoacotante osarentsipeequi omoncaratapinita yaviitapinitanteetarori panquirentsi.
16 Oshequitatsirica osarentsi iraviitapinitantearori ivanquire, ocameetsati incoacotasanoteri quimota ovinaro. Irompa teerica oshequitanaje, ocameetsati incoacoteri capichaji. Irointiquea incoacotasanoteri ariorica oshequite ivanquire.
17 “Eiro catsini pantanatavacaimentarotsi. Ocameetsati irointi pimpincatsatena. Tempa narotaque Tasorentsisanori Pitasorentsite.
18 Ocameetsati pimoncarajeitero nocantacantiri aisati pimatasanojeitero nocoacaimpiri. Ariorica pimoncarajeitero, cameetsa pisavicajeite piipatsitequi.
19 Oncanteani oitsoquiyete pivanquirepee, irotaque poajeiteari pinquemapinijeitearo, tecatsi coiteimojeitempine.
20 “Ariorica pinquenqueshiretea, pisampitavacaayetea: ‘¿Paitampa avajeiteari omoncaratapemparica 7 osarentsi, eirorica apanquiveetajitsi, aisati eirorica aviiyetajirotsi oitsoquipee?’
21 Tempa aitaque nontasoncaventaquempi oncaratapaaquerica 6 osarentsi, ontimanteari oitsoquitasanoyete pivanquire poajeiteari, pimoncaratantearori mava osarentsi.
22 Irotaque poajeiteari piquempoyeanontacari irosati areetantapaajea ochotapaatsiri osarentsi pimpanquijeitantajeari. Aisati ariorica oncaratapaaje 9 osarentsi, irosatiquera poajeitearo piquempoyeanontacari; irosati omoncaratantajea paviitantajearori pivanquire.
23 “Eiro pipimantasanotirotsi quipatsi; tempa irointi nashi. Noshinetashitimpiro pisavicantearo, noshiacantaquempi quivantanari.
24 Irotaque nocantantari: Ora quipatsi pamanantavetari, ocameetsati pishinetajeri ashitasanotarori impinacoventajero, iraantajearori aisati.
25 “Intimerica pishaninca oncoiteimotasanoteari paitapeerica, impimantaquerorica iipatsite, itimirica ishanincasanori; ocameetsati impoque impinacoventajero, iraantajearori ipimantavetacari ishaninca.
26 “Irompa eirorica itimitsi ishanincasanori aajerone, ariorica irampatotimentajero ovinaro irisati aajerone; ocameetsati irimoncaratajero osarentsipee ipimantantacarori. Impoiji impinatajeri quireequi amanantaquerori. Irosati iraantajearo aisati iipatsite.
27 -
28 Irompa teerica intimasanoteji iireequite iraantajearori iipatsite, irosati oncantea irashitearo amanantaquerori. Ariorica omoncaratapaajea Osarentsi Yoipacanteetarori, ari ontimashitanajea. Impoijiquea oshinetantajea iraajero pimantavetacarori, irisavicantajearo.
29 “Intimerica pimanterone pancotsi timatsiri nampitsiqui tantotacotachari, ocameetsati irampiitajero iramanantajero omoncaratapaajearica aparo osarentsi ipimantantacarori.
30 Irompa eirorica yamanantitajarotsi, omoncaravetapemparica aparo osarentsi; irosati oncantea, ontime irashitasanotearo amanantaquerori jeri irishanincajeitajeari. Aisati eiro oshinetantajatsi ariorica omoncaravetapaajea Osarentsi Yoipacanteetarori.
31 Irointiquea pashini pancotsipee timatsiri nampitsiqui caari tantotacotachane, aisati oquempetaro quipatsi. Ocameetsati irayeetajero aisati oshinetantajea Osarentsiqui Yoipacanteetarori.
32 “Irointiquea ivancopee ishanincapeeni Leví timatsiri nampitsiqui tantotacotachari, oshinetanta iramanantapinitero.
33 Iriorica ishanincasanori amanantajerone, ocameetsati irojocanajero omoncaratapemparica Osarentsi Yoipacanteetarori, irijatanaje otiminta ivanco iriori. Tempa irotaque irashisanori iriori pancotsi timatsiri nampitsiqui, isaviquimojeitantariri pishanincapee.
34 Aisati oquempeta quipatsi oshiocantayetari paashitopee otimayetinta inampipeequi, irotaque irashitasanori iriori, eiro catsini ipimantayetirotsi.
35 “Intimerica pishaninca oncoiteimotasanotearirica paitapeerica, impocashitempirica, ocameetsati pamitacoteri. Pinquempetacanteri pashinisati avisayetatsiri, poisavicavaqueri pivancoqui.
36 Eiro paapitsatavaqueritsi yashitari, aisati eiro picoacotasanotiritsi iroimpiajempi quimota paitarica pimperiri. Nocoasanotaque pimpincatsatasanotena; tempa narotaque Pitasorentsite. Irotaque nocantantimpiri, paacameetsatavaqueri pishaninca pivancoqui.
37 Eiro picoacotiritsi iroimpiajempi quimota quireequi ariorica pimperi, aisati eiro poanairotsi ovinaro oanarontsi pimperiri.
38 Narotaque Tasorentsisanori Pitasorentsite, oimishitoajimpiri Egiptoqui, pisavicajeitantajeari quipatsiqui Canaán Pintasorentsitantenari.
39 “Intimerica pishaninca saviquimotempine oncoiteimotasanotearirica paitapeerica, incantempirica: ‘Pantaveetacayena’, eiro pantaveetacaasanotiritsi piquempetacantiricari iperanayeetari.
40 Irointi pinquempetacanteri antaveetatsiri quitaiteripeequi, aisati iriorica quivantimpiri. Ocameetsati irantaveetempi, irosati omoncaratantapaajea Osarentsi Yoipacanteetarori.
41 Irosati irojocantanajearo pivanco, iraajeitanajeri itomipee impiantanajeari iipatsitequi ishanincasanori.
42 Tempa iriotaque iriori quemisantajeitanari; aisati narotaque oimishitoajimpiri Egiptoqui. Te oncameetsateji pinquempetacantavacayea iperanayeetari.
43 Eiro poashinoncairitsi, ocameetsati pimpincatsatasanotena; tempa narotaque Pitasorentsite.
44 “Picoirica intime shirampari, iroorica tsinane, piveranaro, ocameetsati pamananteri savicayetatsiri nampitsipeequi.
45 Aisati noshinetempi pamananteri pashinisati saviquimotimpiri. Aisati itomipee timayetaintsiri piipatsitequi, iriojeitaque pamananteri pashitasanotanteariri. Iriotaque pojocanajeneriri pitomipee ariorica pincamaque, imperanajeiteari iriori. Irintiquea pishanincasanori, eiro piperanatasanojeitaritsi, poashinoncairicari.
46 -
47 “Iriorica pashinisati saviquimotempine piipatsitequi irashitaarantanaquearica, aisati intimerica pishanincasanori tsipanampitariri oncoiteimotasanotaqueari paitapeerica, incanteririca: ‘Nocoi nantaveetempi’, impoiji imperanatasanoteari, iriorica itsipa pashinisati; itimirica ishanincasanori: iriorica irirentisanori, iriritsori, irentitsori, ocameetsati impinacoventajeri iroimpacantajeariri. Irompa timatsirica iireequite, irisati pinacoventajachane.
48 -
49 -
50 Irimoncaratajeneri osarentsipee intantanacarori yomperanatacantaca, irosati Osarentsiqui Yoipacanteetarori. Aisati ocameetsati irimoncaratero osarentsipee jaoca ocarati yantaveetaqueneri. Aisati jaoca ocarati ipinayeetiri antaveetapiniyetatsiri.
51 Oshequitatsirica osarentsi irisaviquimoteri, ocameetsati impinatajeri quimota.
52 Irompa teerica oshequitapaaje osarentsi omoncaratantajeari yoipacanteetarori, ocameetsati impinatajeri capichaji.
53 Ocameetsati inquempetacanteri antaveetatsiri aparoni osarentsi; eiro pishinecoventiritsi iroashinoncaasanoyeeteri.
54 “Irompa tecatsirica pinacoventitajearine aisati itomipee, ocameetsati irishinetajeri irijajeitaje omoncaratapaajearica Osarentsi Yoipacanteetarori.
55 Maaroni pishanincapee, iriojeitaque quemisantanari. Narotaque Tasorentsisanori Pitasorentsite, oimishitoajimpiri Egiptoqui.
