Levítico 26:1-46
26 “Eiro povetsicashiyetatsi paitapeerica pijitasorentsitantearori, aisati eiro poatiayetirotsi mapipee pinampiqui, aisati eiro pisanquenayetirotsi, pimpincatsatantearori; tempa narotaque Tasorentsisanori Pitasorentsite.
2 Pimaoreantapinijeitearo quitaiteri sábado nonashitacaari aisati pimpincatsatero Nonantari: narotaque Tasorentsisanori.
3 “Irosatirica pincanteani pimoncarajeitero nocantacantiri aisati pimajeitaquerorica nocoacaimpiri; aitaque nontiancaquempiro incani omoncaratapiniyetea oshiocantayeteari pivanquirepee, oitsoquitantayeteari aisati inchatopee.
4 -
5 Ontimasanoyete tirico irosati paviitantajearori iroori ovapee, aisati ontimasanote iroori ovapee, irosati omoncaratantajea pimpanquitantayetajeari. Pincanteani poapinijeitearo tanta pinquemapinijeitea. Pincanteani pisavicajeite cameetsa piipatsitequi.
6 “Narotaque savicacayempine cameetsa, tecatsi antanatempine, cameetsa pimaapinijeite. Narotaque ticaacoventempine eiro imapocantimpitsi covencayetatsiri aisati manajeitempineri.
7 Avintiquea oimishiajeiterine manajeivetempine, poijanajeitanaqueri poajeitavaqueri pisataamentopeequi.
8 Ariorica pincarajeivetea 5, aitaque poimishiajeitaqueri carajeivetachane 100. Aisati pincarajeivetearica 100, aitaque poimishiajeitaqueri carajeivetachane 10,000, poajeiteri pisataamentopeequi.
9 “Namenacoventasanotempi aisati noshequitacaasanotajempi, irosati noncanteani nomoncaratempiro nocantasanotitaquempiri, noncarajeitempi.
10 Pincanteani poapinijeitearo tirico piquempoyeanontacari avisanaintsiri osarentsipeequi, irosati pijocashitantajearo pinquempoyeantajearori iroaqueratatsiri.
11 “Noncanteani nosaviquimotempi, eiro nojoquimpitsi; quiso noasanotempi. Narotaque Pitasorentsite, avirojeitaque noshanincapee.
12 -
13 Narotaque Tasorentsisanori Pitasorentsite oimishitoajimpiri Egiptoqui, eiroquea iperanajeitantajimpitsi. Narotaque oipacaacoventajimpiri yoashinoncaasanojeivetaquempini; meeca nontimacayempi cameetsa, tecatsi oashinoncaajempine.
Icantasanotiri Tasorentsi iroasanquetayeri caari quemisantiri.
(Deut. 28.15-68)
14 “Irompa eirorica piquemisantanatsi aisati eirorica pimoncaratirotsi maaroni nocantacantiri, irointi pintseencaquero nocantasanovetaquempiri noncarajeitempi,
15 -
16 aisati nonquempetempi narori nontianquempiro oashinoncantsi: pintsaroasanojeite, mantsiarentsijenca, oamaantatsiri, catsiirentsi, catsijarentsi aisati catsinaveerentsi; pantsipetearo pimpanquiyevetea, iroitajeitempiro manajeitempine.
17 Aitaque nonquisanaquempi, noshineteri manajeitempine intsoncajeitempi; iranaacojeitempi quisanentajeitimpiri aisati pishiashijeitea, tecatsi oijanavetempine.
18 “Pineavetaquearorica ocapee, aiquero pijatatiye eiro piquemisantanatsi, noasanquetaasanotempi oncarate 7. Noasanquetaimentapinitempiro pantayetaqueri caari cameetsatatsi.
19 Noncantacaashireasanotempi eiroquea pishemetantanajatsi; aisati noncantaitetacayearo inquite eiro opariantajatsi incani, onquisoiteanaqueta quipatsi eiro oshiocayetanajitsi pivanquirepee.
20 Pantsipetearo pishintsiventero pantaveere, eiro pineirotsi oitsoquiyete pivanquire, aisati iroori inchatopee, eiro oitsoquiyetanajitsi.
21 “Irosatirica pincantea pimpiatsatena, eirorica pinquemisantanatsi, aitaque noasanquetaajempi aisati; oncarate 7 noasanquetaimentapinitempiro pantayetaqueri caari cameetsatatsi.
22 Nontianquempiri covencayetatsiri intsonquitajeitapempiri pitomipee aisati irantsiquitayetapempiri pivirapee. Eiro pishequiasanojeitanajitsi, tecatsi timatsine aniiyetanajantsine avotsipeequi.
23 “Ariorica pineajeivetaquearo ocapee, eirorica piquenqueshirejeitajatsi, irosatirica pincantea pimpiatsatena; aisati nonquempetajempi narori, oncarataje 7 noasanquetaimentapinitempiro pantayetaqueri caari cameetsatatsi.
24 -
25 Nontianquempiri manajeitempineri, iroimentempiro te pimoncaratero nocantavetaquempiri, nocoaveta noncaratempine. Pishiajeivetanaquea pinampipeequi aisati nontianquempiro mantsiarentsipee, irosati intsoncajeitantempi manajeitempine.
26 “Ariorica nontsonquitaquempiro piquempoyeantayetarori poayetari, ontimanaje aparoni otashitapinitantari tanta. Oncaraterica 10 tsinane tashitantearone, ariorica ompajeivetaquempi, eiro piquemajeitanajarotsi.
27 “Pineajeivetaquearorica ocapee, aiquero pijatanaitiye eiro piquemisantanatsi, aiquero narori nonquisasanotempiri; oncarataje 7 noasanquetaimentasanojeitempiro caari cameetsatatsi.
28 -
29 Irosati poajeitantanaqueari pitomipee aisati pishintopee.
30 Nompoyereasanotero pipincatsatapinitantarori povetsicashiyetari, aisati pitaapinitantaroniri casancavaneri. Pintsoncasanojeitea pincamajeite, pincaratero povetsicashiyetari onareajeitea pivatsapeeni; niotacaasanotempi queario nopincaquero.
31 Aisati oncaaraiteanaque pinampipeeni, nontsonquero pancotsipee pipincatsatashitantanri pijitasorentsitane. Aisati eiro noneacameetsajencatajirotsi casancajencayetatsiri pintayevetenari.
32 “Nontsoncasanotero pinampini, impoiji impocajeite quisajeitimpiri iroajeitapaaque cavaco, irosati irisavicajeitantapaajea.
33 Avirojeiquea pinquenayetanaque otsipapeequi nampitsi, iroijanajeitanaquempi oajeitempineri tecatsi paanaque; pintsaroasanojeitanaque pojocanaquero piipatsiteni aisati iroori pinampipeeni. Tecatsi timajeitantajearone.
34 Irosati ontojasheiteantanajea quipatsi, tecatsi antaveetanajerone, oncanteani ontimashitanajea. Avirojeiquea savicatsine iipatsitequi quisanentimpiri. Aitaque oncanteari omoncaratajea te pishineteroni ontimashitea.
35 Oncanteani ontimashitanajea quitaiteripeequi, eiro oquempetaja ainiroquerani pisavicantajeitaro te pishineteroji ariorica omoncaraveta Osarentsi Yoipacanteetarori.
36 “Yora pishanincapee caari yoyeeti, savicatsine iipatsitequi quisajeitimpiri, noncantashireacaasanoteri intsaroashiretasanotanteari. Inquemayeterorica ompoimate inchatoshi ompariayete, irishiapitsatashiyetearo inquempetacantanaquea iroijanayeteririca iroyeeteri. Aisati irimpariashiyetea tecatsi oijanavetearine;
37 intsitincavacaashiyetanaquea tecatsi oijanajeivetearine, inquempetacantanaquea irimapoqueeteririca irimanayeeteri. ¡Eiro catsini itimitsi aparoni picarajeitica piatearine manajeitempine!
38 Ari anta nampitsipeequi pisavicaveeteri, pimpeajeiteari, intsoncajeitempi quisajeitimpiri.
39 Yora caari yoyeeveta oamaajeiteri irantane, ¡inquempejeiteari intacantajeitimpiniri oamaaqueri iriori yantajeitiniri!
40 “Ariorica pinquenqueshirejeivetanajea, piotacojeivetanajea te oncameetsateji pantajeitaqueri; piquempejeitacari intacantajeitimpiniri, te inquemisantenaji, irointi ipiatsataquena.
41 Irotaque nompiatantempiri narori, iraajeitanaquempitai iipatsitequi quisajeitimpiri. Ari pinquenqueshireacojeivetapaajeari te pincameetsate. Irotaque pashinoncaimentantacarori caari cameetsatatsi.
42 Irosati nonquenqueshireantanajearo nocantasanotaqueriri Jacoboni, Isaacani jeri Abrahamani: ‘Noncarajeitempi’; aisati nonquenqueshireacotanajero quipatsi pojocajeitanaqueri.
43 Otimashitasanotanaca ainiroquera avirori pisavicajeiti areejiqui pashinoncaimentearo pantaqueri; tempa pitseencajeitaquero nocantaquempiri, te pinquemisanteroji nocantacantaqueri.
44 “Oncantavetaquea pisavicajeite iipatsitequi quisajeitimpiri, eiro nopeacojeitimpitsi, eiro nojocajeitimpitsi, eiro notsoncajeitimpitsi aisati eiro nopeacotarotsi noncarajeitaquempi. Tempa narotaque Tasorentsisanori Pitasorentsite.
45 Irointiquea nonquenqueshireapinitero nocarajeitaqueri noimishitoantajariri Egiptoqui, Itasorentsitantanari. Tempa ineajeitaquero nampitsiquiniri nomataqueri. Narotaque Tasorentsisanori.”
46 Irotaque oca icantasanotaqueriri Tasorentsi Moiseshi toncaariqui Sinaí. Yoametaqueri maaroni icantacantiri, icamantajeitantariri ishanincapee.
