Levítico 4:1-35
4 Ari icantajiri Tasorentsi Moiseshi aisati.
2 “Pincanteri pishanincapee: Itimirica omapocaqueri caari cameetsatatsi yantashitacaro, te irimoncarateroji nocantacantiri, jero oca iranteri:
3 “Iriorica anterone jivatacairiri antaveetatsiri caari cameetsatatsi; tempa icantacantajeitaqueri maaroni pishanincapee, ocameetsati intaajenari vacajaniqui caari amashitacha, intaimentajero yantaqueri.
4 Iramaqueri piqueapinitiroca Pancotsiqui papatotimentantanari, iroanqueteneri iraco iitoqui, irosati iroantaquenari.
5 Impoiji iraajatavaque capichaji iriraja, inqueacaanaquero Pancotsiqui papatotimentantanari,
6 irosati iroviincantaquearo iracotsapaqui, intsiquirijimotenaro ishaaviji oticaashiroqui Nonantari; oncarate 7 irampiitapinitaquero.
7 Aisati impantayetero iroori oshevatapeequi orijaniqui altar nonashitacaari itaantarori casancavaneri timatsiri tsompoina. Iroquea timaarantaintsiri irisaitero ocatiantari antearo altar timatsiri piqueapinitiroca Pancotsi.
8 Irosati iraitantayetaqueari maaroni irejipee manacotirori iramporetsa iroimenterori caari cameetsatatsi,
9 aisati apiiteroqueti ishonquepeo, jero ireji itepoquiquiniri, aisati iranatarequiniri.
10 Inquempeyeetiri vaca yaiteetiri maaroni, itaimenteetirori naacameetsajeitantajeariri. Irosati antaveetanari intaasanotantaqueari maaroni altariqui.
11 Irointiquea imeshina, ivatsa, iito, ivoripee jero iramporetsapee, itia,
12 ocameetsati iraanaqueri otsapitapaaca pisavicajeitantari yojocapinitironta isamampovanere itaapinitiri altariqui. Irosati intaantaqueari.
13 “Omapocaqueririca maaroni pishanincapee caari cameetsatatsi, tecatsirica aparo iotacotachane yantashitacaro caari nocoacaavetari; tempa icantacantajeitaca maaroni.
14 Ariorica iriotacojeitajea te oncameetsate ora yantaqueri, ocameetsati iramajena Pancotsiqui yapatotimentantanari aparoni vacajaniqui iroimentajerori yantajeitaqueri.
15 Impoiji iroanquejeiteneri iraco iitoqui jivatacantajeitatsiri, irosati iroantaqueari.
16 Yora jivatacairiri antaveetatsiri iraajatavaque capichaji iriraja, inqueacaanaquero Nonantasanotariqui.
17 Impoiji iroviincaatero iracotsapaqui intsiquirijimotero oticaashiro Pancotsi yayatotimentantanari; oncarate 7 irampiitapinitaquero.
18 Impoiji impantayetero capichaji iriraja oshevatapeequi orijaniqui altar. Ora timaarantaintsiri irisaitero ocatiantari antearo altar.
19 Aisati iraayetavaquero maaroni ireji, intayero altariqui,
20 inquempetacantajeri itaimentiniriri yantayetiri itsipapee, nopeacotantajanariri.
21 Aisati inquempetaqueri iriori, iraanaqueri maaroni ivatsa otsapitapaaca pisavicajeitantari. Irosati intaantaqueari; tempa iriotaque intaimenterori yantajeitaqueri maaroni pishanincapee.
22 “Iriorica omapocaqueri jivatacantatsiri caari cameetsatatsi, yantashitacaro caari nocoacaavetari, timanaque irantane.
23 Ariorica iriotacotajea te oncameetsate yantaqueri, ocameetsati iramajena aparoni chiivo caari amashitacha.
24 Impoiji iroanqueteneri iraco iitoqui, irosati iroantaqueari anta yoapinitirinta itaimentirori caari cameetsatatsi. Iriotaque iroimentajerori yantaqueri.
25 Irosati iraantavaquea antaveetatsiri capichaji iriraja, iroviincaatero iracotsapaqui impantayetero oshevatapeequi antearo altar. Ora timaarantaintsiri irisaitero ocatiantari.
26 Irosati intaantaquearo maaroni ireji, inquempetacantaquero itaimentirori naacameetsatantariri, aisati inquempetacantajero intaimentajeneriri yantaqueri jivatacantatsiri, irosati nompeacotantajeanari.
27 “Itimirica aparoni pishaninca omapocaqueri caari cameetsatatsi, terica iriotacoteaji yantashitacaro caari nocoacaavetari; tempa irisati cantacaaro.
28 Ariorica iriotacotajea te oncameetsate yantaqueri, ocameetsati iramaje aparoni chiivo caari amashitacha, iroimentajerori yantaqueri.
29 Impoiji iroanqueteneri iraco iitoqui, irosati iroantaqueari.
30 Yora antaveetatsiri iraajatavaquero capichaji iriraja, impoiji iroviinquero iracotsapaqui impantayetero oshevatapeequi antearo altar. Ora timaarantaintsiri irisaitero ocatiantari.
31 Aisati iraayetavajero irejipee inquempetacantajeri yaitayetiri itaimentirori naacameetsatantariri, irosati intaantaqueari altariqui. Tempa iriotaque noneacameetsajencatasanotiri. Irosati intaantaquenari, intaimentajero yantaqueri pishaninca, irosati nompeacotantajeanari.
32 “Yora pishaninca, iriorica iramaje ovisha iroimenterori caari cameetsatatsi, ocameetsati iramaje tsinane caari amashitacha.
33 Impoiji iroanquetenero iraco oitoqui, irosati iroantaquearo yoapinitirinta.
34 Yora antaveetatsiri iraajatavaquero capichaji iriraja, impoiji iroviinquero iracotsapaqui impantayetero oshevatapeequi itaantapinitariri. Iroquea timaarantaintsiri irisaitero ocatiantari.
35 Aisati iraayetavaquero maaroni orejipee, iquempetiri shirampari ovishajaniqui yoayetaqueri intaimentirori, naacameetsatantariri. Impoiji intayero maaroni altariqui, intaimentajero yantaqueri yora pishaninca, irosati nompeacotantajeanari.
