Levítico 6:1-30
6 Ari icantajiri Tasorentsi Moiseshi:
2 “Itimirica pishanincapee antimoyetenaroneri caari cameetsatatsi, amatavitiriri ishaninca, teerica incoyeji iroimpiajeneri iquempoyeacaavetariri, ariorica ipavaqueri, irompa ariorica icoshitashitacari, teerica, yaapitsatashitacari;
3 aisati icantashitarica: ‘Te noneeroji pipeaqueri. Ioti Tasorentsi queario nocantasanotaque’; jaanicarica antayeterone ocapee, timanaque irantane,
4 iriotaque cantacayearone oca yantaqueri. Ocameetsati iroimpiajeneri maaroni icoshitaqueriri aisati yaapitsatashitacariri, aisati irorica iquempoyeacaavetacariri, ariorica ineacoyetajiri,
5 aisati paitapeerica icantashitacari: ‘Te noneeroji’. Ocameetsati iroimpiajeneri ashitarori, aisati irovanaavajeneri impinatajeri, ariorica iraanaje virantsi iroyeri impinacoventajeari.
6 Impoiji iramajeneri antaveetanari aparoni ovisha caari amashitacha, aisati irimoncarataqueri ivinaro. Irotaque intaimentajeneriri yantaqueri, irosati nompeacotantajeanari.”
7 -
Iquenquetsatacotiro intayeteri.
8 Ari icamantiri aisati Tasorentsi Moiseshi, icantiri:
9 “Pincanteri Aarón aisati itomipee oca noncamantayetempiri, jaoca incanterori ora intaasanotenari. Ocameetsati iroanqueteri altariqui, intaasanotantanaqueari tsiteniriqui irosati onquitaiteamanaque.
10 Ari onquitaiteamanque inquitsaatearo antaveetatsiri iitsaare aisati intorosataquea jentamaotasanotatsiri, irosati iraantaquearo isamampore itaaqueri iroyero araquerora altar.
11 Impoiji inquitsaatajea pashini, irosati iraantanaquearo samampo cameetsaiteriqui otsapitapaaca pisavicajeitantari.
12 “Ora paamari amorecatsine altariqui, eiro otsivacanetitsi. Yora antaveetatsiri iriotaque oisapiniterone capichaji quitaiteri, aisati iroameetsatashiyeteri virantsi intayeri, aisati intayero ireji intaimenterori naacameetsatantajeariri.
13 Ora paamari timatsiri altariqui, oncanteani amoreque.”
Iquenquetsatacotiro iramayeteri ivanquirepee.
14 “Jero pashini icantiriri jaoca incanterori ivanquirepee yamayetiri: Yora antaveeyetatsiri ocameetsati iramaquenaro altariqui.
15 Aparoni icaratiri ocameetsati iraaye capichaji tiricovane yamaquenari, aisati quejitsi. Impoiji intsipataaquero maaroni casancavaneri, irosati intaantaquearo altariqui, noneacameetsajencatasanotantearori. Irotaque nonquenqueshiretantearori.
16 Ora timaarantaintsiri irotaque iroyeari iriori Aarón aisati itomipee oyaaraiteritequica Pancotsi papatotimentantanari; eiro oconoatsi tapiacaarori.
17 Aisati ariorica intashitero, eiro itsipatairotsi tapiacaarori. Tempa irotaque nocashiacaaqueriri iroyeari iriori. Noameetsatasanotaquero catsini oquempetacaro itaimentirori caari cameetsatatsi yantayetiri.
18 Yora antaveeyetatsiri irishanincajeitajeari coajicani Aarón, incanteani iroapinitearo ora itaarantapinitanari; tempa noameetsatasanotaquero catsini. Jaanicarica oyearoneri oca, nonashitacaasanotacari.”
Iramayeteri antaveeyetatsiri.
19 Icantajiri aisati Tasorentsi Moiseshi:
20 “Jero iramayetenari Aarón aisati irishanincajeitajeari ariorica irisaiyeeteri iitoqui impeanteari antaveetatsiri: Oncarate 2 kilo tirico cameetsavanetatsiri, ocameetsati iraarante cashetani intayeri onquitaiteamane. Iro pashini intaajero ishaaviniji. Eiro yoavisairotsi aparo quitaiteri.
21 Ocameetsati incheerenquero iramenari, inconoasanotaquero quejitsi, impoiji incotaaquero. Irotaque noneacameetsajencatasanotiri.
22 Aitaque incanterori irovetsiquero jivatatsiri yantaveetacanti yora irishanincajeitajeari Aarón nonashitacaajari poyeetajearine irantaveetaje.
23 Maaroni iramayetenari antaveetanari, ocameetsati intaasanotero maaroni. Tecatsi catsini oyearone.”
Iquenquetsatacotiro intaimenterori caari cameetsatatsi.
24 Icantajiri Tasorentsi Moiseshi:
25 “Poameteri Aarón aisati itomipee jaoca incanteriri intaimenterori caari cameetsatatsi. Yora virantsi ocameetsati iroyenari yoapiniyeetirira. Tempa irotaque nonashitacaasanotari, ocameetsatasanotaque.
26 Yora antaveetatsiri taimenterone caari cameetsatatsi, ocameetsati iroaarantea ivatsa oyaaraiteritequica Pancotsi papatotimentantanari
27 Paitapeerica anterine ivatsa, nonashitacaacari. Aisati intsiquirijacotaqueririca iriraja iitsaarequi, ocameetsati inquivajero oyaaraiteritequica.
28 Irorica coviti icotantariri ivatsa, ocameetsati imporoquero. Irompa irorica icotantacari ooya broncenaqui, ocameetsati iramecajero aisati inquivajero cameetsa.
29 “Yora intayeri nonashitacaasanotacari, apaniro iroyeari irinti antaveeyetatsiri. Tempa ocameetsatasanotaque.
30 Irintiquea itaimentirori caari cameetsatatsi yantayetiri, nopeacotantanariri, ora iqueacaanaqueri iriraja tsompoina Nonantariqui; eiro yoaritsi. Ocameetsati irointi intaasanoteri.
