Levítico 8:1-36
8 Ari icantiri Tasorentsi Moiseshi:
2 “Pamaqueri Aarón aisati itomipee, aisati inquitsaateari irantaveetanteari jeri quejitsi pisainatanteariri, jeri vaca intaimenterori caari cameetsatatsi, aisati apite chiivo jero cantirijaniquiqui tanta caari conoacha tapiacaarori. Impoiji pampatojeiteri pishanincapee piqueapinitiroca Pancotsi papatotimentantanari.”
3 -
4 Ari imataquero Moiseshi icantaqueriri Tasorentsi. Yapatojeitaqueri ishanincapee anta iqueapinitantaroriqui Pancotsi, icantiri: “Jero oca icantaquenari Tasorentsi nanteri.”
5 -
6 Irosati icajemantacari Aarón jeri itomipee. Ari yaaque nija iquivajeitaqueri.
7 Impoiji yaaquero quitsaarentsi cameetsamaotatsiri, iquitsaataqueri Aarón aisati ishiticatsaquitaqueri shiticacorontsi. Impoiji iquitsaataqueri pashini iroicoteari aisati iquitsaataqueri jenioquiji efod tontamaotatsiri vecaraachari itsaquiqui, irosati ishiticacotantacari.
8 Impoiji yoaqueneri aisati pectoral irinejitacoteari, aitaque yoaquerori Urim jero Tumim.
9 Irosati isavoinatantacari turbante aisati ipatacacotaqueneri oro ivancainaqui ipeantacari antaveetatsiri. Tempa irotaque icantaqueriri Tasorentsi.
10 Impoiji yaaque quejitsi inashitacaari, irosati isaitantacaro Inantari Tasorentsi aisati maaroni timayetatsiri tsompoina, yoameetsatantayetacarori.
11 Irosati itsiquirijantacaro iroori altar, ocarati 7 yapiitapinitaquero. Aisati isaitaquero maaroni timayetatsiri jero chomo aisati osavicantari, yoameetsatantacarori.
12 Impoiji isaitaqueri iriori Aarón iitoqui, ipeantacari antaveetatsiri.
13 Irosati iquitsaatantayetacari iriori itomipee aisati ishiticatsaquiyetaqueri shintoropee, impoiji isavoinayetaqueri. Tempa irotaque icantaqueriri Tasorentsi.
14 Irosati yamacantantacari Moiseshi vacajaniqui intaimenteneriri caari cameetsatatsi. Yora Aarón aisati itomipee yoanquetaqueneri iraco iitoqui.
15 Irosati yoamantacari Moiseshi aisati yaavaquero iriraja yoviincaajataquero iracotsapaqui, irosati ipantantacaro oshevatapeequi altar aisati acaquerocapeequi. Ora timaarantaintsiri iriraja isaitantacaro ocatiantari altar. Aitaque ocantacari yoameetsantaquero, irotaque impeacotapinitanteanariri Tasorentsi caari cameetsatatsi yantajeitiri.
16 Irosati yaantacaro maaroni ireji iramporetsaquiniri, iranatarequiniri aisati ishonquepeoquiniri aisati yaaquero apiiteroqueti ishonquepeo, irosati itaantacaro altariqui.
17 Irointiquea imeshina, ivatsa jero ivojeayetaqueri, itaaquero otsapitapaaca isavicajeitantari. Tempa irotaque icantaqueriri Tasorentsi.
18 Impoiji yamacantaqueri aisati Moiseshi ovisha. Yora Aarón jeri itomipee yoanquetaqueneri iraco iitoqui.
19 Irosati yoamantacari, aisati isaitantacaro iriraja altar jenioquiji aisati acaquerocapee.
20 Ari itoyetaqueri maaroni. Yaaquero iito jero ireji, impoiji iquivaquero iramporetsa jero ivoripee, irosati itaantacaro maaroni altariqui. Ari ineacameetsajencatasanotaquero Tasorentsi.
21 -
22 Irosati yamacantantacari Moiseshi pashini ovisha, intaimentantearori irinashitacaayeteanariri. Yora Aarón jeri itomipee yoanquejeitaqueneri iraco iitoqui.
23 Irosati yoamantacari. Ari yaavaque capichaji iriraja iracotsapaquiqui ipantantacari Aarón overaapaaca iyempita iracosanoriquiniri aisati iquempetaquero jivatatsiri iracotsapaqui jero jivatatsiri iititsapaqui.
24 Ari icajemaqueri itomipee Aarón, aisati iquempetaqueri iriori ipantayetaqueri. Ora timaarantaintsiri iriraja isaitantacaro altar jenioquiji aisati acaquerocapeequi.
25 Impoiji yaaquero irishichomequi aisati maaroni ireji iramporetsaquiniri, iranatarequiniri, ishonquepeoquiniri aisati apiiteroqueti ishonquepeo jero ivori iitisanoriquiniri.
26 Impoiji yaacotaquero cantirijaniquiqui tanta caari tapiacha iroapiniteneriri Tasorentsi. Aisati yaaquero aparo tanta quimomerontari caari tapiacha conoachari quejitsi aisati cayeta pochari, itsipataaquero maaroni ireji aisati ivori iitisanoriquiniri,
27 yoaqueneri iracoqui Aarón aisati itomipee; irosati yoancantacanari Tasorentsi.
28 Impoiji yaajiro Moiseshi yovancajeitaqueri, irosati itaantacaro altariqui. Itaimentaquero irinashitacaayeteanariri. Ari ineacameetsajencatasanotaquero Tasorentsi.
29 Ari yaaquero aisati ineji, yovancaqueneri ishevashevataqueri. Iriotaque yaaqueri iriori; tempa irotaque icantaqueriri Tasorentsi.
30 Irosati yaantaca Moiseshi capichaji quejitsi inashitacaari jero iriraja itsiquirijaarantaquerori altar. Itsiquirijaqueri Aarón jeri itomipee aisati maaroni iitsaare yantaveetacari. Aitaque ocantacari ipeajeitantacari antaveetatsiri.
31 Impoiji icantiri Aarón jeri itomipee: “Pintashiteri ivatsa aqueapinijeitiroca Pancotsi apatotimentantariri, poajeiteari, pisomatanteari tanta cantirijaniquiquiniri anashitacaacari. Tempa irotaque icantaquenari Tasorentsi: ‘Yora Aarón aisati itomipee, ocameetsati iroyeari ivatsa.’
32 Itimaarantapaaquerica ivatsa jero tanta, ocameetsati pintayeri. Aisati pintimajeitavaquetsita aqueapinijeitica oncarate 7 quitaiteri, irosati omoncaratantaqueari irinashicaasanotempi Tasorentsi.
33 -
34 Tempa irotaque icoacaaquempiri, impeacojeitantempirori caari cameetsatatsi pantayetiri.
35 Irotaque ocameetsatantari pintimavaquetsita aqueapinijeitiroca Pancotsi apatotimentantariri, quitaiteriqui aisati tsiteniriqui, irosati omoncaratanteari 7 quitaiteri. Pimpincatsatero icantacantaqueri Tasorentsi, eiroquea picamajeitantatsi; tempa irotaque icantasanotaquenari.”
36 Ari imataquero Aarón aisati itomipee maaroni icantaqueriri Tasorentsi Moiseshi.
