Números 10:1-36
10 Ari iquenquetsatacaajiri Tasorentsi Moiseshi, icantiri:
2 “Paye plata povetsicacante apite tiorentsi, iro irovetsicantearori martiyo. Irotaque intiotanteeteariri pishaninca ariorica pampatojeiteri aisati ariorica povaajeitanajea.
3 Ariorica intioyeetero apiiteroqueti, ocameetsati impocashitempi maaroni pishaninca, irampatojeitapempa piqueapinitiroca Pancotsi papatotimentantanari.
4 Irompa intioyeeterorica aparoni, irinti ampatojeitachane jivatacaayetiriri aparopee pishaninca.
5 Ariorica intioyeetero aisati incajemasanotanaque, iriojeitanteari savicajeitatsiri acaqueroca iquenapai catsirincaiteri irovaajeitanajea.
6 Aisati irampiitajerorica intiotero, irovetsicajeitanteari savicajeitatsiri acaqueroca oquirincatanaque iroijajeitantanaqueariri iriori. Ariorica intioyeetero aisati incajemasanotanaque, irotaque iriojeitanteari pishanincapee povaajeitanajea.
7 Irompa intioyeeterorica aisati eiro icajemitsi, irointi irampatojeitanteari pishanincapee.
8 Yora itomipee Aarón antaveetatsiri iriojeitaque tioterone. Oca nocantacantiri, oncantaitatiyempani; irotaque irimoncarajeitajeri iriori irishanincajeiteari coajicani.
9 “Ariorica pareejeitaquearo quipatsi nocashiacaaquempiri, irimanajeitempirica quisajeitimpiri, ocameetsati intioyeetero tiorentsi aisati incajemasanotanaque, pimanajeitanteariri. Irosati nonquenqueshireacotantempiri aisati noavisaacojeitempi, eiro imajeitantimpitsi quisajeitimpiri. Tempa narotaque Tasorentsisanori Pitasorentsite.
10 Aisati ocameetsati pintiotero quitaiteripeequi pinquimoshirejeiterica, irishoncapaajerica iroaquerari cashiri, ariorica pintaasanotenari pivira aisati poyenaririca naacameetsatantajempiri. Aitaque pincantajeiteari nonquenqueshireacotantempiri. Tempa narotaque Tasorentsisanori Pitasorentsite.”
Yovaajeitanaja ishanincajeitaniri Israel.
11 Ari ocaratanaque 20 iitaiterite, apitetatsiri cashiri aisati apitetapaatsiri osarentsi, ari ovancanaja mencori jenioquiji tsimancacotirori Inantari Tasorentsi.
12 Irosati yovaajeitantanaja ishanincajeitaniri Israel yojocanajiro Sinaí. Ora mencori otimapaaji caaraiteriqui Parán.
13 Ari imoncarajeitaquero icantaqueriri Tasorentsi Moiseshi.
14 Intanacaro ijajeitaque oijajeitirori ivanteerate Judá. Irio Nahasón itomi Aminadab jivatacairiri.
15 Ari yoijajeitanaqueri ishanincapeeni Isacar. Irio Natanael itomi Suar jivatacairiri.
16 Aisati yoijajeitanaqueri ishanincapeeni Zabulón. Irio Eliab itomi Helón jivatacairiri.
17 Impoiji yora ishanincapeeni Guersón jeri Merari itireajeitanajiro Inantari; tempa iriotaque inintacayeetaqueri iraapinitero. Irosati yoijajeitantanacari yaajeitanajiro.
18 Ari ijajeitaque oijajeitirori ivanteerate Rubén. Irio Elisur itomi Sedeúr jivatacairiri.
19 Ari yoijajeitapaaqueri iriori ishanincapeeni Simeón. Irio Selumiel itomi Surisadai jivatacairiri.
20 Aisati yoijajeitapaaqueri iriori ishanincapeeni Gad. Irio Eliasaf itomi Reuel jivatacairiri.
21 Impoiji yoijajeitapaaqueri ishanincapeeni Quehat, yaajeitanaquero iriori paitapeerica inashitacaayetari. Yareetantapaacari, ineapaajiro vetsicanaja Inantari.
22 Ari ijajeitaque oijajeitirori ivanteerate Efraín. Irio Elisamá itomi Amihud jivatacairiri.
23 Ari yoijajeitapaaqueri ishanincapeeni Manasés. Irio Gamaliel itomi Pedasur jivatacairiri.
24 Aisati yoijajeitapaaqueri ishanincapeeni Benjamín. Irio Abidán itomi Guidoní jivatacairiri.
25 Irio vecarantapaarori ijajeitaque oijajeitirori ivanteeratei Dan. Irio Ahiézer itomi Amisadai jivatacairiri.
26 Ari yoijajeitapaaqueri ishanincapeeni Aser. Irio Paguiel itomi Ocrán jivatacairiri.
27 Aisati yoijajeitapaaqueri ishanincapeeni Neftalí. Irio Ahirá itomi Enán jivatacairiri.
28 Aitaque icantajeitacari yovaajeitantanajari ishanincajeitaniri Israel.
Yaanaqueri Moiseshi iraniri.
29 Ari aparo quitaiteri icantiri Moiseshi iraniri Hobab itomi Reuel madiánasati:
—Meeca nojajeite anta quipatsiqui icashiacaaquenari Tasorentsi impajeitenaro. Tsame poijatanaquena, arionea naacameetsatapaaquempi. Tempa icantasanotaquena Tasorentsi incavintsaasanojeitena.
30 Ari yacanaqueri iriori:
—Eiro noijatimpitsi; nompianajeta noipatsitequi narori isavicajeitinta noshanincapee.
31 Icantasanotiri Moiseshi:
—Eiro pipianajatsi. Avirotaque iotirori jaocarica asavicayetanaqueri caaraiteriqui, aisati avirotaque jivajeitanaquenane.
32 Ariorica poijajeitanaquena, aitaque nompaarantaquempi cameetsayetatsiri impajeitenari Tasorentsi.
Ari ipianaja iraniri Moiseshi inampiqui.
33 Aitaque ocantacari yovaajeitanaja, yojocanajiro toncaari Sinaí. Ocarati mava quitaiteri yaniijeitaque. Iro jivatacotantanaintsiri Cajón onantari Icantacantiri Tasorentsi, yamenanontayetantari irisavicajeitantapempari.
34 Yaniijeitantanacari, oijatitari mencori otsimancacojeitaqueri.
35 Yaniitacantanacarori Cajón, icanti Moiseshi:“¡Tsamequeti, Notasorentsite!¡Poimishiajeiteri quisajeitimpiri!¡Irineavaquempirica, irishiapitsajeitanaquempi!”
36 Ariorica icatiacaapaacaro Cajón, icanti Moiseshi:“¡Pimpiashijeitena meeca, Notasorentsite;tempa oshequi catsini inajeiti noshanincapee!”
