Números 11:1-35
11 Aparo quitaiteri yora ishanincajeitaniri Israel icantavacaajeitaca icantimataqueri Tasorentsi, ineaquero oshequi opomerentsitimojeitacari paitapeerica avishimoyetaqueriri. Ari iquemaqueri Tasorentsi, irosati iquisasanotantanaca, itiancaqueneri paamari oshoncapaacari amorecanaque isavicajeitaquenta.
2 Ari icajemajeitanaque ishanincapee, yaventanacari Moiseshi iramitacoteri. Irosati icantacoventantajari Tasorentsiqui, ari otsivacanaji.
3 Irotaque opajitantari isavicajeitapaaquenta Tabera. Aitaque amorequimojeitaqueriri paamari itiancaqueri Tasorentsi.
Icashiacaaqueri Tasorentsi ishanincajeitaniri Israel vatsatsi.
4 Yora pashinisatipee saviquimojeitiriri, iquenqueshireapinijeitaquero iroasanotea. Irotaque iquenqueshireacaajeitantacariri iriori ishanincajeitaniri Israel, iraacojeitaquero icanti: “¡Cantenane intime vatsatsi avajeiteari!
5 ¡Aquempetani asavicajeitini Egiptoqui avajeitani shima! Aisati avayetaroni pepinopee, melonepee, sevoyayetatsiri jero aajopee.
6 Irompa meeca aca, aasanojeitaquee atashe irotaintsi ancamajeite. Tecatsi aneimataque pashini aimateari, apatirotaque maná.”
7 (Ora maná quiteriitaque oni oquempevetaro oitsoqui cilantro aisati oquempevetaro oyashi inchato, irotaque yaapinijeitiri itononcaquero oquempetanacaro tiricovane icotaquero, aisati yovetsiquiro oquempeyetanacaro tanta.
8 -
9 Ariorica tsiteniriqui oparii cajashiiteri isavicajeitaquenta aisati opariayeti iroori maná.)
10 Yora Moiseshi iquemaqueri ishanincapee iraajeitaca ivancojaniquipeequi. Ari iquisasanotanaca Tasorentsi aisati te onimotanajeriji Moiseshi.
11 Irosati iquenquetsatacantacari Tasorentsi, icantiri:
—¿Paita poashinoncantaquenari; tempa naro quemisantimpiri? ¿Paita piquisantanari poatsinaacantaquenari noshanincapeeca nojivatacaajeitaqueri?
12 ¿Narompa meeca iriri aisati iriniro picoacantaquenari naajeitanaqueri? Nonquempetacantanaqueri jananequi atsotatsiri itsoompiyeetiri, nareetacanteariri quipatsiqui picantasanotaqueriri intacantajeitaquenaniri.
13 ¿Jaocame nayeriri narori vatsatsi nomperiri iroajeiteari? Oshequi ipocashitaquena iraimotapaaquena, icantana: ‘Pimpajeitena ivatsa noyeari.’
14 Eiro meeca nomatajirotsi apaniro naajeitanajeri yocapee, oshequi catsini opomerentsitimotaquena.
15 Irosatirica pincanteani pincantacanentena meeca: ocameetsati poamayena pinintasanotanarica, eiroquea noneantajarotsi ompomerentsitimotajena.
16 Ari icantanaqueri Tasorentsi:
—Pampatotena 70 pishanincapee iotasanotatsiri ijivatacanti, pamaqueri aca Pancotsiqui papatotimentantanari incaratantempiri, poyeajeitena.
17 Aitaque naniireimotempiri nonquenquetsatacantempiri. Impoiji nompaaranteri noshire nopaarantaquempiri, inquempetantempiri avirori, irimajeitantearori iramitacotempi irijivajeiteri pishanincapee, eiroquea opomerentsitimotantajimpitsi apaniro.
18 Impoiji pincanteri maaroni pishanincapee iroameetsajeitempa, osaitequera iroajeitea vatsatsi. Tempa noquemaqueri iraacojeitaqueri, icantajeiti: ‘¡Cantenane intime vatsatsi avajeiteari! ¡Ocameetsavetaca asavicajeivetani Egiptoqui!’ Meeca nomperi vatsatsi iroajeiteari.
19 Eiro yoaritsi aparo, apite, cinco, diez, teerica 20 quitaiteri; incanteani iroapinijeiteari aparoni cashiri, irosati impincantanaqueari, eiro yoanajaritsi. Te inquemisantenaji narovetaca Itasorentsite saviquimojeitiriri, iraashijeitaca icantimotaquena: ‘¿Paitaquea ajocantajeitanajarori Egiptoni?’
20 -
21 Ari icantanaqueri iriori Moiseshi:
—Iro cantaincha icarajeiti noshanincapee 600,000 shiramparipee. Meeca picanti: ‘Nompajeiteri vatsatsi iroapinijeiteari aparoni cashiri.’
22 Ariorica noajeivetaqueari oshequi ovisha aisati vaca, ¿Ariompa irimoncarajeitaqueari maaroni? Aisati inquempetaquea shima incajarequiniri nampatovetaqueari, eiro imoncarajeitaritsi.
23 Ari icantanajiri Tasorentsi:
—¿Pijitaquempa orijaniqui ora notasorenca? Meeca ari pineaquero ariorica nomoncarataquero, irompa eirorica nomoncaratirotsi nocantaqueri.
Itasoncacoventaqueri Tasorentsi 70 jivatacantajeitatsiri.
24 Ari isoquijanaji Moiseshi Inantariqui Tasorentsi, irosati icamantajeitantacari ishanincapee icantaqueriri Tasorentsi. Aisati yapatojeitaqueri 70 jivatacaajeiterine ishanincapee. Yoatiajeitaqueri acaquerocapeequi Inantari Tasorentsi.
25 Ari isaviincapaaque Tasorentsi mencoriqui, iquenquetsatacaapaaqueri Moiseshi. Irosati ipantacari Ishire jivatacantatsineri caratatsiri 70 ipaarantaqueriri Moiseshi, iquempetantanacariri. Omapocantacariri Ishire Tasorentsi opocashijeitapaaqueri, irosati ineaveetantanaca, iquempetanacari quenquetsatacantatsiri. Iro cantaincha te irampiitajero aisati.
26 Ari itimi apite shirampari pajitachari Eldad irio itsipa Medad, iriotaque icoyeajeitaqueri carajeitatsiri 70. Iro cantaincha te irijateji Pancotsiqui yapatotimentantariri Tasorentsi. Aisati iriori opocashitapaaqueri Ishire Tasorentsi. Irosati ineaveetantanaca iquempetanacari quenquetsatacantatsiri.
27 Ineantacariri aparoni evancari, irosati ishiantanaca icamantapaaqueri Moiseshi:
—¡Yora Eldad jeri Medad ineaveetanaque asavicajeitinta, iquempetacari quenquetsatacantatsiri!
28 Iquemantavacariri Josué itomi Nun, iriotaque amitacotiriri Moiseshi yevancaritantapaacari, icantanaqueri:
—¡Novincatsarite Moiseshi, poimajerentaiteri!
29 Ari icantanaqueri:
—¿Pitsaneacotanampa? ¡Cantenane Tasorentsi intianqueneri Ishire maaroni ashanincapee, impeajeitanaqueata quenquetsatacantatsiri!
30 Irosati ipiantanaja Moiseshi aisati jivatacaayetiriri ishanincapee isavicajeitinta.
Itiancaqueri Tasorentsi contonapee.
31 Impoiji itiancaquero Tasorentsi antearo tampea oquenapaaque incajarequi, amaqueri contonapee. Ipariajeitapaaque saiteriqui isavicajeitaquenta aisati ishoncajeitapaacaro ipiojeitapaaca irosati areejiqui aparoni quitaiteri avisanteariri. Ocarati ipiotaca irovetaincha aparoni metro.
32 Maaroni quitaiteriqui aisati tsiteniriqui irosati pashiniqui quitaiteri icantani yaajeitaqueri contonapee. Ainiro aasanoyetaintsiri icarataque 10 ipioyetaqueri aisati yoroayetaqueri isavicajeitaquenta.
33 Iro cantaincha yoantajeivetacariri ivatsa, ainiroquera yatsiquiri, irosati iquisantacari Tasorentsi, yoasanquetaajeitaqueri, oshequi catsini camajeitaintsi. Irotaque ipajitantacarori isavicajeitapaaquenta Kibrot-hataavá. Aitaque itijaqueriri maaroni quenqueshireapinitirori iroasanotea.
34 -
35 Impoiji yovaajeitanaja irosati yareetantacaro Haserot, aitaque isavicajeitapaajiri.
