Números 15:1-41
15 Ari iquenquetsatacajiri Tasorentsi Moshishi, icantiri:
2 “Jero oca pincamanteriri pishanincapee: Ariorica irareejeitaquearo quipatsi nompajeiteriri irisavicajeitanteari,
3 ariorica iramena vaca shirampari, iriorica ovisha intayenari impincatsatantenari, aisati iroorica irimoncaratantearori icashiacaanari, irompa yamashitanaririca, aisati iroorica yamimentirori inquimoshirejeitanteari, aisati iroorica intaasanoyetenari noneacameetsajencatasanotiri;
4 ocameetsati iramaque aisati 2 kilo ovane tirico conoachari quejitsi aparoni voteyaqui. Aisati iramaque aparoni voteyaqui ovaja intsipataayetaqueri aparopeeni ovishajaniqui iroyenari.
5 -
6 Irompa iriorica anteari ovisha iroyenari, ocameetsati iramaque 4 kilo ovane tirico, aisati aparo voteyaqui quejitsi iroanaavaqueri capichaji jero aisati ovaja, noneacameetsajencatasanotantearori.
7 -
8 Irompa iriorica iroye vacajaniqui intaasanotenari naacameetsatantajeariri, aisati iroorica irimoncaratero icashiacaanari, ocameetsati iramaque 6 kilo ovane tirico conoachari apite voteyaqui quejitsi, aisati apite voteyaqui ovaja, noneacameetsajencatasanotanteariri intaaquenaririca.
9 -
10 -
11 Aitaque incantayeteriri aparopeeni, anteari vaca iriorica ovisha, ovishajaniqui aisati iriorica chiivojaniqui intayenari.
12 Jaocarica incarayeteri virantsipee intayenari, aitaque oncarateri aisati intsipataayetavaqueriri.
13 Maaroni pishanincapee ocameetsati irimoncarajeitero oca nocantaquempiri, ariorica intayenari ivira, noneacameetsajencatasanotanteariri.
14 “Iriorica pashinisati quivantatsiri aisati iriorica saviquimojeitimpiri icoaquerica iriori intayenari ivira aisati inquempejeitempi avirori, irimoncaratero maaroni nocantaquempiri, noneacameetsajencatasanotanteariri intayenari.
15 Oca nocantacantiri otimi aparoni oncanteani ontime, irotaque pashijei aisati pashinisati saviquimojeitimpiri. Ocameetsati pimoncarajeitero aisati irimoncarajeitero iriori pishanincajeitajeari coajicani.”
16 -
Irinashitacayeanari Tasorentsi intarori oitsoquiyeti ivanquirepee.
17 Aisati icantiri Tasorentsi Moiseshi:
“Jero pincamanteriri aisati pishanincapee, ariorica irareejeitaquearo quipatsi naajeitanajerinta, impanquiyetapaaquerica tirico, ontimanaquerica oitsoqui, ocameetsati irinashitacayena narori iramayetenari.
18 -
19 -
20 Ariorica impaquenaro tirico ijivataqueri yaviitaquero, aisati inquempetaquero ijivataqueri yovetsiquiro tanta impenaro.
21 Irotaque incanteani impapinitenaro aisati inquempejeitea pishanincajeitajeari coajicani.
22 “Ariorica impeacotaquearo maaroni pishanincapee oca nocantaquempiri, eirorica imoncaratirotsi meeca aisati coajicani, jeroca iranteri irimoncaratantajearori. Ocameetsati iramajeitajena aparoni vacajaniqui intaasanotajenari. Aisati intsipataayetaquero ivanquirepee jero ovaja noneacameetsajencatasanotanteariri, irimoncaratero nocoacaaqueriri. Aisati iroyena chiivo, iroimentajero caari cameetsatatsi yantaqueri.
23 -
24 -
25 Impoiji intaimentajeneri antaveetatsiri yantajeitaqueri maaroni pishaninca, nompeacotantajeanariri. Tempa te irantashitearoji, irointi ipeacotacaro.
26 Nompeacoteanari pishanincapee aisati pashinisati saviquimoyetiriri, teerica intsataashiteaji irantashitearo.
27 “Itimirica aparoni pishaninca, teerica intsataashiteaji irantashitearo, ocameetsati iramaje aparoni chiivojaniqui, moncarataquerori aparoni irosarentsite iroimentajerori.
28 Yora antaveetatsiri intaimentajero yantaqueri pishaninca, impoijiquea nompeacotajeanari.
29 Oca nocantacantiri, irotaque irashijei pishaninca aisati iriori saviquimojeitiriri, teerica intsataashiteaji irantashitearo.
30 “Irintiquea tsataashitachari yantashitacaro, iriorica pishaninca aisati iriorica pashinisati saviquimojeitiriri, yantimotaquenaro caari cameetsatatsi. Ocameetsati iroyeeteri, eiro icarajeitajiritsi.
31 Tempa itseencaquero noneane, te irimoncarateroji nocantacantiri. Irotaque iroanteeteariri, irashinoncaimentearota yantaqueri.”
Yoyeetaqueri caari pincatsatiro quitaiteri imaoreantari.
32 Isavicajeitantacari ishanincajeitaniri Israel caaraiteriqui, ineetaqueri aparoni ishaninca yai itsima quitaiteriqui imaoreanteetari.
33 Yora neaqueriri yaanaqueneri Moiseshi jeri Aarón, aisati ineajeitaqueri maaroni ishanincapee.
34 Ari yoiminqueaqueri, ishentajeitaqueri tequeratsita irioteji jaoca incanteriri.
35 Impoiji icantaqueri Tasorentsi Moiseshi: “Yora shirampari ontimatiye poacanteri. Iraanaquerita pishanincapee nijanta ovecaratapaca pisavicajeitantari, impichaajeiteri.”
36 Irosati yaajeitantanacari anta ipichaajeitaqueri, irosati icamantaca. Imoncarataquero icantaqueriri Tasorentsi Moiseshi.
Ishiroquiyetaquero iitsaare ocaramaotapaaque.
37 Aisati icantiri Tasorentsi Moiseshi:
“Pincanteri pishanincapee oca iranteri: ‘Avirojei aisati pishanincajeitajeari, ocameetsati iroayetero oshiroquipee ocaramaotapaaque iitsaare. Irovetsicantearo quitioncatsanirori.
38 -
39 Ariorica pineapinijeitero oshiroquipee, pinquenqueshiretapinijeitero maaroni nocantacantayetiri nocantaquempiri pimoncarajeitero. Eiroquea pantashitantarotsi piquenqueshireashiyetari aisati picoashiyetari. Irotaque caari piquearioventantaro pinquemisantasanotena.
40 Aitaque oncanteari pinquenqueshiretapinitantearori maaroni nocantacantiri. Impoiji pimoncarajeitero aisati pincameetsatimentena. Tempa narotaque Pitasorentsite.
41 Narotaque Tasorentsisanori aajeitajimpiri Egiptoqui Pintasorentsitanteari. Narotaque Tasorentsisanori Pitasorentsite.’ ”
