Números 16:1-50
16 Yora Coré itomi Ishar, ishanincasanoripeeni Quehat iriotaque ishanincapeeni Leví, icarajeitaqueri mava ishanincapeeni Rubén: yora Datán jeri Abiram itomipee Eliab, aisati On itomi Pélet,
2 ipiatsajeitacari Moiseshi. Yapatojeitaqueri 250 ishanincapee icarajeivetari jivatacantayetatsiri, quenquejantatsiri ineacameetsajeivetari ishanincapee.
3 Yapatotashijeitacari Moiseshi jeri Aarón, icantajeitaqueri:
—¡Aitapaaque pijivatacaajeitaqueri ashanincapee! Tempa aitaque inashitacaajeitaquee Tasorentsi, aquempeavacaajeitaca quiso yoajeitaquee maaroni. ¿Paita picoantacari pimpeajeitea pincatsari, pimpincatsariventasanotanteariri ishanincajeitacari Tasorentsi?
4 Iquemantacarori Moiseshi icantaqueriri, yoivotanaca quipatsiqui.
5 Ari icantiri Coré aisati oijajeitaqueriri:
—Osaitequera capichaji quitaite aitaque iriotacaajeiteeri Tasorentsi jaanicarica icoyeaqueri aisati inashitacaacari tayenerineri yameeyetiniriri. Apaniro intayeneri jaanicarica icoyeasanotaqueri.
6 Jero panteri: pamaquero pintaantearori casancavaneri aisati iriori picarajeitiri.
7 Pimorequero paamari, impoiji pintevanetero casancavaneri, osaitequera poimotamaneri Tasorentsi. Yora atiri jaanicarica icoyeaqueri Tasorentsi, iriotaque inashitacaasanotacari. ¡Aitapaaque, ishanincapeeni Leví!
8 Aisati icantiri Moiseshi Coré jeri icaratiri:
—Pinquemena noshanincapee, ¿Pitseencaquerompa icoyeaquempi Tasorentsi apaniro pinquempejitanteariri, pantaveetanteari Inantariqui, pantaveeventanteariri ashanincapee?
9 -
10 Icoacaaquempi Tasorentsi aisati iriori pishanincasanoripee inquempejitanteariri iriori. ¿Picoasanotaquempa pinquempetasanoteari antaveetiniriri?
11 Tecatsi ijitea Aarón pincantimatanteariri. Iriniti picantimataque Tasorentsi aisati iriori picarajeitaqueri itseencajeitaqueri.
12 Impoiji icajemacantaqueri Moiseshi Datán aisati Abiram itomipee Eliab. Iro cantaincha, icantajeitaque:
—Te nocoyeji nojajeite. ¿Te pinquenqueshireteroji pamajeitantajanari nosavicajeiveitani Egiptoqui oshiocasanoyetapaini panquirentsiyetatsiri, poamaacantajeitantenari aca caaraiteriqui. Aisati picoaque pimpempa pincatsariventasanojeitenaneri?
13 -
14 Te pareetacaajeitimatenaji quipatsiqui oshiocasanoyetapai panquiveerentsiyetatsiri aisati te pimpajeitenaji quipatsi aisati ovamashi. ¿Picoashitaca pamatavijeitena, pinquempetacantena mavitiajari? Eiro catsini nojajeititsi nonempi.
15 Iquemantavacariri Moiseshi, irosati iquisasanotantanaca, icantiri Tasorentsi:
—Eiroyea pineacameetsatiritsi iramayetempiri. Te catsini naitayeteriji aparoni iraashinote aisati te noashinoncaimateriji.
16 Impoiji icantiri Coré:
—Pijatamaneyea osaitequera Iantariqui Tasorentsi jeri picarajeitaqueri, aisati iriori Aarón incarajeitaquempi.
17 Paayetanaque aparopeeni casancavaneri aisati pitaantarori, picarajeitira 250, aisati iriori Aarón iraanaque. Poajeitapeero Inantariqui Tasorentsi.
18 Ari imataquero yaayetanaque aparopee itaantayetarori, yoaquero omenqui paamari aisati itevaneyetaquero casancavaneri. Icatiimojeitapaacaro Pancotsi yapatotimentantariri Tasorentsi, icarajeitaqueri Moiseshi jeri Aarón.
19 Yora Coré yapatotimentajeititacari ishanincapee imontetapaacaro Pancotsi. Irosati oconijatimotantapaacari maaroni ishanincapee ishipaquireane Tasorentsi.
20 Ari icantiri Tasorentsi Moiseshi jeri Aarón:
21 —¡Pinijantareajeitanaqueri caari cameetsajeitatsi, nontsoncajeiterita intsipaite!
22 Ari yoivojeitanaca quipatsiqui, icantajeitiri:
—Notasorentsite, avirotaque oaneajeitiriri maaroni atiripee. ¿Pinquisajeitimenterimpa noshanincapee yantaqueri caari cameetsatatsi aparo shirampari?
23 Impoiji icantiri Tasorentsi Moiseshi:
—Pincanteri pishanincapee irinijantareajeiterota isavicajeitinta Coré, Datán jeri Abiram.
24 -
25 Ari icatianaja Moiseshi, ijatanaque isavicajeitaquenta Datán jeri Abiram. Aisati yoijajeitanaqueri jivatacantajeitatsiri.
26 Icantapaaqueri ishanincapee:
—Pinijantareajeitanaqueri yora caari cameetsajeitatsi piatsajeitainchari. Eiroyea paitayetanaqueritsi timimoyetiriri, picamimentajeitirocari avirori caari cameetsatatsi yantajeitaqueri.
27 Irosati inijantareantajeitanacaro isavicajeitinta Coré, Datán jeri Abiram. Yora Datán aisati Abiram ainiro isavicajeitaque iqueapinitiro ivanco, icarajeitiro ijinapee jeri itomipee.
28 Aisati icanti Moiseshi:
—Irotaque piotantenari irio Tasorentsi tiancaquenari nantantayetarori paitapeerica, te nantashitearoji nocoiri narori.
29 Ariorica incamashijeitaquea yocapee, inquempejeiteari pashinipee camashiyetachari, piojeitanaque te irio tianquenane Tasorentsi.
30 Irompa ariorica irantero Tasorentsi caari aneapinijeiti, ontencareanaque quipatsi oniajeitaqueri aneatsiquera yorapee aisati maaroni timimoyetiriri, impariajeitanaque tsompoina; impoiji piojeitanaque iriojeitaque tseencaqueriri Tasorentsi.
31 Yoverantacarori ineaveeti Moiseshi, irosati otencareanaque quipatsi isavicajeitinta, oniajeitaqueri maaroni icarajeitaqueri Coré aisati ishanincasanoripee jero timimoyetiriniri.
32 -
33 Ipariajeitanaque aneatsiquera tsompoina. Impoiji ashitanaja aisati. Aitaque ocantacari itsoncaarantajeiteetaqueri ishanincajeitaniri Israel.
34 Iquemantacariri icajemajeitanaque, ishiajeitanaca maaroni itsipanampiyetaniri, icantajeiti: “¡Oniajeiteecari arori quipatsi!”
35 Aisati itiancaquero Tasorentsi paamari otaajeitapaaqueri carajeitatsiniri 250 taayevetacarori casancavaneri.
36 Ari icantajiri Tasorentsi Moiseshi:
“Pincanteri Eleazar, itomi Aarón, iraayetajerota itaantacarori casancavaneri; tempa nonashitacaasanotacaro, aisati irojocajerota areejiqui omenqui paamari.
37 -
38 Ora itaantaniri camimentajeitaquerori yantaqueri, nonashitacaajeitacaro; tempa irotaque yaaqueri itaimotantavetaquenarori casancavaneri. Pimpeajerotea ashiro pimpatacantayetajearori altar. Irotaque inquenqueshiretapinitantearori pishanincapee eiro yantashitarotsi iriori.”
39 Irosati yaantajaro antaveetatsiri Eleazar itaantayevetarori casancavaneri vetsicachari bronce, ora yamayevetacari camajeitaintsiri otaaqueri paamari. Ipeajiro ashiro impatacantayetajearori altar.
40 Irotaque icantasanotaqueriri ishanincapee, eiroquea yantashitantarotsi, caaririca ishanincasanoripee Aarón, iquempejeitaricari Coré aisati icarajeivetacari, inquempejitaquearorica altar intaanteanariri Tasorentsi casancavaneri. Ari imoncarataquero Eleazar icantaqueriri Tasorentsi Moiseshi.
Yoasanquetaarantajiri aisati Tasorentsi ishanincajeitaniri Israel.
41 Ari oquitaiteamanaji maaroni ishanincajeitaniri Israel icantimajeitajiri aisati Moiseshi jeri Aarón; icantajeitaqueri:
—¡Avirojeitaque oacantajeitaqueriri ashanincapeeni icoyeaqueri Tasorentsi!
42 Ishonquimentajeitapaacari Moiseshi jeri Aarón. Iro cantaincha iquenajeitanaquero Pancotsiqui yapatotimentantariri Tasorentsi. Irosati omanantapaacaro mencori Pancotsi, aisati oconijatapaaque ishipaquireane Tasorentsi.
43 Irosati ijatantanaca Moiseshi jeri Aarón imontetapaacaro Pancotsi. Ari icantiri Tasorentsi Moiseshi:
44 -
45 —¡Pinijantareanaqueri yora atiripee! ¡Nontsoncajeiterita intsipaite!
Irosati itiyeroajeitantanaca, yoivotanaca quipatsiqui.
46 Ari icantiri Moiseshi Aarón:
—¡Pamaquerota pitaantarori, paye paamarimenqui timatsiri altariqui, pisoque casancavaneri! Pijate intsipaite isavicajeitaquenta ashanincapee, pincantacoventajeiteri Tasorentsiqui impeacojeitajenerita yantajeitaqueri. Tempa itiancaqueneri Tasorentsi, caamanentsi.
47 Ari imataquero Aarón icantaqueriri Moiseshi, ishianaca yapatojeitacanta ishanincapee. Ora oashinoncantsi itiancaqueri Tasorentsi aitaque oamaajeitapaaqueri. Irosati itaantapaacaro Aarón casancavaneri, icantacoventajeitajiri Tasorentsiqui, ipeacojeitantajanariri.
48 Icatiimotapaacari camajeitaintsiri aisati caariquera camajeitatsi. Irosati opeantanaja caamanentsi.
49 Iro cantaincha aitaque icamaarantaque 14,700 atiripee, te irampatoyeriji camajeititainchari ipiatsatantacari Coré.
50 Opeantanajari caamanentsi, irosati ipiantanaja Aarón Pancotsiqui yapatotimentantariri Tasorentsi, icaratapaajiri Moiseshi.
